“O Maa Piɛɛ Ye He Ngɛ Paradeiso”

1. Benɛ e piɛ bɔɔ nɛ Yesu ma gbo ɔ, mɛni e de yayami peelɔ ko nɛ e ngɛ e kasa nya a? (Luka 23:39-43)

YESU kɛ yayami peeli enyɔ nɛ a sɛu mɛ ngɛ e kasa nya a ngɛ nɔ́ nae, nɛ e piɛ bɔɔ nɛ a ma gbo. (Luka 23:32, 33) Yayami peeli enyɔ nɛ ɔmɛ tsuo ye Yesu he fɛu, enɛ ɔ tsɔɔ kaa tsa pi e kaseli ji mɛ. (Mat. 27:44; Maak. 15:32) Se a kpɛti nɔ kake tsake e tsui. E de ke: “Yesu, ke o sɛ o Matsɛ Yemi ɔ mi ɔ, mo kai mi.” Yesu ha lɛ heto ke: “Ngɛ anɔkuale mi ɔ, i ngɛ mo dee mwɔnɛ ɔ ke, o maa piɛɛ ye he ngɛ Paradeiso.” (Kane Luka 23:39-43.) Nɔ́ ko be nɛ tsɔɔ kaa yayami peelɔ nɛ ɔ kplɛɛ sɛ gbi nɛ a fiɛɛ kaa “hiɔwe Matsɛ Yemi ɔ su si ta” a nɔ. Nɛ Yesu hu de we gblee kaa nyumu nɛ ɔ maa sɛ Matsɛ Yemi ɔ mi ngɛ hiɔwe. (Mat. 4:17) Yesu ngɛ Paradeiso nɛ maa ba zugba a nɔ hwɔɔ se ɔ he munyu tue. Mɛni he je nɛ wa ma nyɛ ma de jã a?

2. Kɛ wa plɛ kɛ le kaa eko ɔ, yayami peelɔ nɛ e tsake e tsui ɔ ji Yuda no ha kɛɛ?

² Eko ɔ, yayami peelɔ ɔ nɛ e tsake e tsui ɔ ji Yuda no. E de e nyɛmi yayami peelɔ ɔ ke: “Amlɔ nɛ ɔ nɛ a ngɛ o kɛ lɛ tsuo nyɛ tue gblae fiee nɛ ɔ, anɛ o yi Mawu gbeye kulaa lo?” (Luka 23:40) Yuda bi ɔmɛ jaa Mawu kake pɛ, se nihi nɛ a ngɛ je ma amɛ a mi ɔ lɛɛ a jaa mawuhi fuu. (2 Mose 20:2, 3; 1 Kor. 8:5, 6) Kaa yayami peeli nɛ ɔmɛ hu je je ma amɛ a mi ɔ, jinɛ eko ɔ, sane nɛ nɔ kake ɔ ko bi ji, “Anɛ o yi mawu ɔmɛ gbeye kulaa lo?” Jehanɛ hu ɔ, pi nihi nɛ a je je ma amɛ a mi ɔ a ngɔ nɛ a tsɔ Yesu, mohu ɔ, a tsɔ lɛ “Israel we jijɔ ɔmɛ nɛ a laa amɛ a ngɔ.” (Mat. 15:24) Mawu ha nɛ Israel bi ɔmɛ le kaa e ma tle nihi nɛ a gbo ɔ si. Eko ɔ, yayami peelɔ nɛ e tsake e tsui ɔ le nɔ́ nɛ ɔ, nɛ nɔ́ nɛ e de ɔ tsɔɔ kaa e susu kaa Yehowa ma tle Yesu si nɛ e ba ye matsɛ ngɛ Mawu Matsɛ Yemi ɔ mi. Eko ɔ, e ngɛ hɛ kɛ nɔ fɔmi kaa ke e gbo ɔ, Mawu ma tle lɛ hu si. Enɛ ɔ he ɔ, e ma nyɛ maa pee kaa yayami peelɔ nɛ ɔ ji Yuda no.

3. Benɛ Yesu tu Paradeiso ɔ he munyu ɔ, eko ɔ, kɛ yayami peelɔ ɔ nɛ e tsake e tsui ɔ nu sisi ha kɛɛ? Moo tsɔɔ nya. (1 Mose 2:15)

³ Akɛnɛ yayami peelɔ nɛ e tsake e tsui nɛ ɔ ji Yuda no he je ɔ, eko ɔ, e le Adam kɛ Hawa kɛ Paradeiso ɔ nɛ Yehowa ngɔ mɛ kɛ wo mi ɔ he sane. Lɔ ɔ he ɔ, eko ɔ, yayami peelɔ nɛ ɔ he ye kaa Paradeiso ɔ nɛ Yesu tu he munyu ɔ maa pee abɔɔ ko nɛ ngɛ fɛu ngɛ zugba a nɔ.​—Kane 1 Mose 2:15.

4. Mɛni nɛ e sa nɛ nɔ́ nɛ Yesu de yayami peeli ɔmɛ a kpɛti nɔ kake ɔ nɛ e ha nɛ e hi wa juɛmi mi?

⁴ E sa nɛ nɔ́ nɛ Yesu de yayami peelɔ ɔ nɛ wo wɔ he wami nɛ wa susu bɔ nɛ si himi ngɛ Paradeiso ɔ mi maa hi ha a he. Ngɛ anɔkuale mi ɔ, tue mi jɔmi nɛ Matsɛ Salomo ná ngɛ e nɔ yemi ɔ mi ɔ ma nyɛ maa tsɔɔ wɔ nɔ́ ko ngɛ Paradeiso ɔ he. Baiblo ɔ tsɔɔ kaa Yesu nɔ kuɔ pe Salomo. Enɛ ɔ he ɔ, wa ma nyɛ maa hyɛ blɔ kaa Yesu kɛ nihi nɛ a maa piɛɛ e he kɛ ye matsɛ ɔ ma ha nɛ́ zugba a nɛ pee paradeiso nɛ ngɛ fɛu. (Mat. 12:42) E ngɛ heii kaa e sa nɛ ‘jijɔ kpa amɛ’ nɛ a le nɔ́ nɛ e sa nɛ a pee konɛ a nyɛ nɛ a hi si ngɛ Paradeiso ɔ mi kɛ ya neneene.​—Yoh. 10:16.

KƐ SI HIMI NGƐ PARADEISO Ɔ MI MAA HI HA KƐƐ?

5. Kɛ o susu kaa si himi ngɛ Paradeiso ɔ mi maa hi ha kɛɛ?

⁵ Ke o susu bɔ nɛ si himi maa hi ha ngɛ Paradeiso ɔ mi ɔ he ɔ, mɛni baa o juɛmi mi? Eko ɔ, o susu kaa e ngɛ kaa he ko nɛ ngɛ fɛu wawɛɛ kaa Eden abɔɔ ɔ mi. (1 Mose 2:7-9) Eko ɔ, o ma kai gbami nɛ Mika gba kɛ kɔ Mawu we bi a he kaa “nɔ tsuaa nɔ maa hi si ngɛ . . . e wai tso loo e ngmɔkɔ tso sisi” ɔ. (Mika 4:3, 4) Jehanɛ hu ɔ, o ma kai nɔ́ nɛ Baiblo ɔ de kaa zugba a maa ba ní fuu ɔ. (La 72:16; Yes. 65:21, 22) Lɔ ɔ he ɔ, moo po he foni kaa o ngɛ a bɔɔ ko nɛ ngɛ fɛu mi, nɛ o hii si ngɛ okplɔɔ ko he kɛ e nɔ niye ní ngɔngɔɛ fuu. Mɔmɔ ɔmɛ ha nɛ kɔɔhiɔ ɔ mi ngɛ via jee. O ngɛ nue nɛ o weku li kɛ o huɛmɛ nɛ́ nihi nɛ a tle mɛ si ɔ hu piɛɛ he ɔ ngɛ a hɛja jee, nɛ a bua jɔ nɛ a ngɛ muɔe. Ní nɛ ɔmɛ ɔ ji níhi nɛ maa ba mi nitsɛnitsɛ. Wa ngɛ nɔ mi mami kaa ní nɛ ɔmɛ maa ya nɔ ngɛ zugba a nɔ. Ngɛ Paradeiso ɔ mi ɔ, wa ma tsu ní tsumi nɛ ngɛ bua jɔmi hulɔ.

6. Mɛni wa maa pee ngɛ Paradeiso ɔ mi?

⁶ Yehowa bɔ wɔ kaa wa ná bua jɔmi ngɛ wa ní tsumi mi. (Fiɛlɔ 2:24) Ngɛ Kristo Jeha Akpe Nɔ Yemi ɔ mi ɔ, wa ma tsu ní wawɛɛ. Nihi nɛ a maa po amanehlu ngua a kɛ nihi ayɔhi abɔ nɛ a ma tle mɛ si ɔ maa hia tadehi, niye ní kɛ hwɔ he. Bɔ nɛ pee nɛ wa nyɛ nɛ wa ha mɛ ní nɛ ɔmɛ ɔ, e ma bi nɛ wa tsu ní tsumi slɔɔtohi nɛ ngɛ bua jɔmi! Kaa bɔ nɛ a de Adam kɛ Hawa kaa a hyɛ abɔɔ ɔ nɛ ji a we ɔ nɔ saminya a, wɔ hu wa ma ná he blɔ kɛ tsu ní tsumi nɛ ngɛ bua jɔmi konɛ zugba a nɛ pee Paradeiso. Wa ma na he blɔ kɛ tsɔɔ nihi ayɔhi abɔ nɛ a tle mɛ si nɛ a li Yehowa kɛ e yi mi tomi ɔ he níhi fuu ɔ ní. Jehanɛ hu ɔ, wa maa ye bua anɔkualetsɛmɛ nɛ a gbo loko Yesu ba zugba a nɔ ɔ konɛ a kase Yehowa he ní fuu. Hyɛ bɔ nɛ e maa pee bua jɔmi ha!

7. Mɛni nɔ mi mami wa ma nyɛ ma ná, nɛ mɛni he je?

⁷ Wa ma nyɛ ma ná nɔ mi mami kaa wa maa hi si ngɛ Paradeiso ɔ mi ngɛ tue mi jɔmi mi, wa nine maa su nɔ́ fɛɛ nɔ́ nɛ wa hia a nɔ, nɛ a maa to nɔ́ fɛɛ nɔ́ he blɔ nya saminya. Kɛ wa plɛ kɛ le kɛɛ? Yehowa sɛ hlami nɛ e tsɔɔ wɔ bɔ nɛ si himi ɔ maa hi ha ngɛ e nɔ yemi ɔ sisi. Matsɛ Salomo nɔ yemi ɔ ji enɛ ɔ he nɔ hyɛmi nɔ́.

MATSƐ SALOMO NƆ YEMI Ɔ JI PARADEISO Ɔ HE NƆ HYƐMI NƆ́

8. Mɛni blɔ nɔ nɛ munyu nɛ ngɛ La 37:10, 11, 29 ɔ ba mi benɛ Matsɛ David ngma munyu nɛ ɔ se ɔ? (Hyɛ “Sane Bimihi Nɛ Je Ní Kaneli A Ngɔ” nɛ ngɛ Hwɔɔmi Mɔ nɛ ɔ mi ɔ.)

⁸ Yehowa ha nɛ Matsɛ David ngma bɔ nɛ si himi maa hi ha hwɔɔ se ke matsɛ nɛ e le ní nɛ e yeɔ anɔkuale ba bɔni nɔ yemi. (Kane La 37:10, 11, 29.) Ke waa kɛ nihi ngɛ Paradeiso nɛ maa ba a he ní sɛɛe ɔ, wa pɔɔ La 37:11 ɔ kanemi. E hi kaa wa peeɔ jã, ejakaa Yesu tsɛ jamɛ a ngmami ɔ se ngɛ e Yoku ɔ Nɔ Fiɛɛmi ɔ mi, nɛ e tsɔɔ kaa e maa ba mi hwɔɔ se. (Mat. 5:5) Se David munyu ɔ hu tsɔɔ bɔ nɛ si himi ɔ maa hi ha ngɛ Matsɛ Salomo be ɔ mi. Benɛ Salomo ngɛ Israel nɔ yee ɔ, Mawu we bi hi si ngɛ tue mi jɔmi mi ngɛ “zugba kpakpa nɛ baa ní saminya” a nɔ, nɛ a ngɛ nɔ́ fɛɛ nɔ́. Mawu de mɛ ke: ‘Ke nyɛ bu ye gbi tue ɔ, ma ha nyɛ tue mi maa jɔ nyɛ ngɛ nyɛ zugba a nɔ. Nyɛ maa hwɔ mahe fuaa, nɛ nyɛ be nɔ ko gbeye yee.’ (3 Mose 20:24; 26:3, 6) Si womi nɛ ɔmɛ ba mi benɛ Salomo ngɛ Israel ma a nɔ yee ɔ. (1 Kron. 22:9; 29:26-28) Yehowa wo si kaa yiwutsotsɛmɛ nɛ a jaa mawu kpahi ɔ, a be mɛ “nae hu.” (La 37:10) Lɔ ɔ he ɔ, munyu nɛ ngɛ La 37:10, 11, 29 ɔ, ba mi ngɛ blema be ɔ mi, nɛ e maa ba mi hwɔɔ se hulɔ.

9. Mɛni nɛ manyɛ Sheba de ngɛ Matsɛ Salomo nɔ yemi ɔ he?

⁹ Benɛ Salomo ngɛ nɔ yee ɔ, manyɛ Sheba nu kaa Israel bi ɔmɛ ngɛ tue mi jɔmi, nɛ a ngɛ nɔ́ fɛɛ nɔ́. E hia blɔ kɛ je tsitsaa kɛ ba Yerusalem konɛ lɛ nitsɛ e ba na kɛ e hɛngmɛ. (1 Ma. 10:1) Benɛ e na níhi nɛ ngɛ nɔ yae ngɛ Salomo nɔ yemi ɔ mi ɔ, e de ke: ‘Mamoo, i nui e mi fa po tete. O we bi ɔmɛ ngɛ bua jɔmi pɛ! O tsɔli ɔmɛ nɛ sɔmɔɔ mo daa, nɛ a nuɔ o nile munyu ɔmɛ ɔ, mɛ hu a ngɛ bua jɔmi pɛ!’ (1 Ma. 10:6-8) Bɔ nɛ níhi ya nɔ ha ngɛ Salomo nɔ yemi ɔ mi ɔ ha nɛ wa níhi nɛ Yehowa maa pee ha adesahi ngɛ e Bi Yesu nɔ yemi ɔ sisi.

10. Mɛni blɔhi a nɔ nɛ Yesu nɔ kuɔ pe Salomo?

¹⁰ Yesu nɔ kuɔ pe Salomo ngɛ nɔ́ fɛɛ nɔ́ mi. Salomo ji adesa nɛ e yi mluku, nɛ e tɔ̃ tɔmihi nɛ hɛdɔ ngɛ he nɛ lɔ ɔ ngɔ haomihi kɛ ba Mawu we bi a nɔ. Se Yesu lɛɛ, e ji Nɔ Yelɔ nɛ e ye mluku nɛ tɔmi ko be e he. (Luka 1:32; Heb. 4:14, 15) Ngɛ kahi nɛ a mi wa nɛ Satan kɛ ba Yesu nɔ ɔ tsuo se ɔ, e ya nɔ nɛ e ye Mawu anɔkuale. Kristo pee níhi nɛ tsɔɔ kaa e be yayami pee gblee, aloo e be nɔ́ ko pee nɛ maa ye e sɔmɔli anɔkualetsɛmɛ awi. Lɛ ji Matsɛ nɛ se be nɛ wa ma nyɛ ma ná.

11. Mɛnɔmɛ nɛ a maa piɛɛ Yesu he kɛ ye matsɛ?

¹¹ Yesu kɛ nimli 144,000 nɛ a maa piɛɛ e he kɛ ye matsɛ ɔ ma tsu adesahi a hiami níhi a he ní ha mɛ konɛ Yehowa yi mi tomi kɛ ha zugba a nɛ ba mi. (Kpoj. 14:1-3) Benɛ a ngɛ zugba a nɔ ɔ, a gblee kahi kɛ haomihi fuu a mi. Enɛ ɔ he ɔ, a maa nu níhi nɛ nihi nɛ a ngɛ zugba a nɔ ɔ ngɛ mi gblee ɔ sisi saminya. Mɛni tutuutu nɛ nihi nɛ a maa piɛɛ Yesu he kɛ ye nɔ ɔ ma tsu?

MƐNI NÍ TSUMI NƐ NIHI NƐ A PƆ MƐ NU Ɔ MA TSU?

12. Mɛni ní tsumi nɛ Yehowa kɛ maa wo nimli 144, 000 ɔ a dɛ?

¹² Ní tsumi nɛ nihi nɛ a maa piɛɛ Yesu he kɛ ye matsɛ ɔ ma tsu ɔ kle kulaa pe ní tsumi nɛ Salomo tsu ɔ. Matsɛ Salomo hyɛ nihi ayɔhi abɔ a nɔ ngɛ ma kake pɛ mi. Se nihi nɛ a maa ye matsɛ ngɛ Mawu Matsɛ Yemi ɔ mi ɔ lɛɛ a maa ye bua kɛ hyɛ adesahi ayɔhi akpehi abɔ a nɔ ngɛ je kɛ wɛ. Enɛ ɔ ji he blɔ nɛ se be nɛ Yehowa kɛ ha nihi 144, 000 ɔ!

13. Mɛni ní tsumi klɛdɛɛ nɛ nihi nɛ a maa piɛɛ Yesu he kɛ ye matsɛ ɔ ma tsu?

¹³ Nihi 144,000 ɔ maa piɛɛ Yesu he kɛ sɔmɔ kaa matsɛmɛ kɛ osɔfohi. (Kpoj. 5:10) Ngɛ Mose Mlaa a mi ɔ, osɔfo ɔmɛ ji nihi titli nɛ a hyɛɔ konɛ ma mi bi ɔmɛ nɛ a ná nɔmlɔ tso mi he wami kpakpa nɛ a hɛ kɛ su Yehowa he. Jamɛ a Mlaa a ji “ní kpakpahi nɛ maa ba a he nini.” Enɛ ɔ he ɔ, wa ma nyɛ ma de ke Yesu kɛ nihi nɛ a maa piɛɛ e he kɛ ye matsɛ ɔ maa ye bua Mawu we bi konɛ a ná nɔmlɔ tso mi he wami kpakpa nɛ a hɛ kɛ su Yehowa he. (Heb. 10:1) Amlɔ nɛ ɔ, wa li blɔ nɔ nɛ matsɛmɛ kɛ osɔfo nɛ ɔmɛ maa gu nɛ a kɛ blɔ tsɔɔmi ma ha Matsɛ Yemi ɔ sisi bimɛ nɛ a maa hi zugba a nɔ ɔ. Se wa ma nyɛ ma ná nɔ mi mami kaa blɔ nya fɛɛ blɔ nya nɛ Yehowa maa to ngɛ Paradeiso ɔ mi ɔ maa ye bua nihi nɛ a maa hi zugba a nɔ ɔ nɛ a nine maa su blɔ tsɔɔmi nɛ a maa hia a nɔ.​—Kpoj. 21:3, 4.

MƐNI NƐ E SA KAA ‘JIJƆ KPA AMƐ’ NƐ A PEE KONƐ A NYƐ NƐ A HI PARADEISO Ɔ MI?

14. Mɛni blɔ nɔ nɛ ‘jijɔ kpa amɛ’ kɛ “to kuu nyafii” ɔ pee kake?

¹⁴ Yesu tsɛ nihi nɛ a maa piɛɛ e he kɛ ye matsɛ ɔ ke “to kuu nyafii.” (Luka 12:32) E kpale tu kuu enyɔne ko he munyu, nɛ e tsɛ mɛ ke “jijɔ kpahi.” Kuu enyɔ nɛ ɔmɛ peeɔ to kuu kake. (Yoh. 10:16) Mwɔnɛ ɔ, nihi nɛ a ngɛ kuu enyɔ nɛ ɔmɛ a mi ɔ pee kake kɛ ngɛ ní tsue, nɛ a maa ya nɔ maa pee jã ke zugba a plɛ pee Paradeiso. Jamɛ a be ɔ mi ɔ, “to kuu nyafii” ɔ maa hi hiɔwe, nɛ ‘jijɔ kpa amɛ’ maa hi zugba a nɔ kɛ bua jɔmi kɛ ya neneene. Se ní komɛ ngɛ nɛ e sa kaa ‘jijɔ kpa amɛ’ nɛ a pee konɛ a nyɛ nɛ a hi Paradeiso ɔ mi.

15. (a) Mɛni blɔ nɔ nɛ ‘jijɔ kpa amɛ’ piɛɛ Kristo nyɛmimɛ ɔmɛ a he kɛ ngɛ ní tsue? (b) Mɛni blɔ nɔ o maa gu kɛ kase nyɛminyumu ɔ nɛ e ngɛ tsopa juami he ɔ? (Hyɛ foni ɔ.)

¹⁵ Yayami peelɔ nɛ e tsake e tsui ɔ ná we he blɔ nɛ e kɛ maa tsɔɔ kaa e bua jɔ nɔ́ nɛ Kristo pee ha lɛ ɔ he loko e gbo. Se wɔ nɛ wa ji ‘jijɔ kpa amɛ’ lɛɛ, wa ngɛ he blɔhi fuu amlɔ nɛ ɔ nɛ waa kɛ maa tsɔɔ kaa wa bua jɔ nɔ́ nɛ Yesu pee kɛ ha wɔ ɔ he. Kaa nɔ hyɛmi nɔ́ ɔ, bɔ nɛ waa kɛ nihi nɛ a pɔ mɛ nu ɔ hiɔ si ha a lɛ tsɔɔ bɔ nɛ wa suɔ Yesu ha. Yesu tsɔɔ kaa e maa da bɔ nɛ jijɔ kpa amɛ kɛ e nyɛmimɛ nɛ a pɔ mɛ nu ɔ maa hi si ha a nɔ kɛ kojo mɛ. (Mat. 25:31-40) Nɔ́ kake nɛ wa ma nyɛ maa pee kɛ ye bua Kristo nyɛmimɛ ɔmɛ ji kaa waa kɛ kã maa fiɛɛ nɛ́ waa pee nihi kaseli. (Mat. 28:18-20) Enɛ ɔ he ɔ, e sa nɛ waa kɛ Baiblo kasemi womi ɔmɛ nɛ tsu ní saminya. Eko ji, Ná Bua Jɔmi Kɛ Ya Neneene! womi ɔ. Ke o kɛ nɔ ko kase we Baiblo ɔ lolo ɔ, mo kɛ pee oti kaa o kɛ nihi ma bɔni Baiblo ɔ kasemi.

16. Mɛni wa ma nyɛ maa pee amlɔ nɛ ɔ kɛ tsɔɔ kaa wa dla wa he kaa wa maa hi Paradeiso ɔ mi?

¹⁶ E sɛ nɛ waa mlɛ nɛ waa su Paradeiso ɔ mi loko waa pee níhi nɛ Yehowa suɔ kaa nihi nɛ a maa hi lejɛ ɔ nɛ a pee ɔ. Amlɔ nɛ ɔ, e sa nɛ waa bɔ mɔde nɛ waa ye anɔkuale ngɛ wa munyu tumi kɛ wa ní peepee mi, nɛ́ waa ba wa je mi saminya. E sa nɛ waa ye Yehowa, wa hunomɛ loo wa yihi, kɛ wa nyɛmimɛ Kristofohi anɔkuale. Ke wa bu Yehowa tue ngɛ je yaya nɛ ɔ mi amlɔ nɛ ɔ, e be yee ha wɔ kaa wa maa bu lɛ tue ngɛ Paradeiso ɔ mi. Wa ma nyɛ maa kase ní tsumi komɛ kɛ su kpahi nɛ maa ye bua wɔ ngɛ je ehe ɔ mi hulɔ. Ke wa pee jã a, lɔ ɔ tsɔɔ kaa wa ngɛ wa he dlae kaa wa maa hi lejɛ ɔ. Hyɛ munyu nɛ ji, “Anɛ O Suɔ Kaa O ‘Nine Nɛ Su Zugba a Nɔ’ Lo?” nɛ ngɛ Hwɔɔmi Mɔ nɛ ɔ mi ɔ.

17. Anɛ e sa nɛ yayami nɛ wa pee be ko nɛ be ɔ nɛ ha nɛ wa kɔni mi nɛ jɔ̃ lo? Moo tsɔɔ nya.

¹⁷ Ke be ko nɛ be ɔ, wa pee yayami nɛ hɛdɔ ngɛ he nɛ loloolo ɔ, e ngɛ wɔ haoe ɔ, e sa nɛ waa bɔ mɔde nɛ wa je ngɛ wa juɛmi mi. Ngɛ anɔkuale mi ɔ, enɛ ɔ tsɔɔ we kaa kpɔmi nɔ́ ɔ he je ɔ, ‘wa maa je blɔ nɛ waa pee yayami.’ (Heb. 10:26-31) Se wa ma nyɛ ma ná nɔ mi mami kaa ke wa tsake wa tsui niinɛ, nɛ wa bi yemi kɛ buami kɛ je Yehowa kɛ asafo mi nikɔtɔma amɛ a ngɔ, nɛ wa tsake wa je mi bami ɔ, lɛɛ Yehowa kɛ wa tɔmi ɔ ke wɔ kulaa. (Yes. 55:7; Níts. 3:19) Mo kai nɔ́ nɛ Yesu de Farisi bi ɔmɛ ɔ. E de mɛ ke: “I ba konɛ ma ba tsɛ yayami peeli, se pi dali.” (Mat. 9:13) Ngɛ anɔkuale mi ɔ, kpɔmi afɔle sami ɔ ma nyɛ ma je wa yayami ɔmɛ tsuo kɛ je.

O MA NYƐ MAA HI PARADEISO Ɔ MI KƐ YA NENEENE

18. Mɛni o maa suɔ kaa o kɛ yayami peelɔ ɔ nɛ e gbo ngɛ Yesu kasa nya a nɛ sɛɛ?

¹⁸ Moo po he foni kaa o ngɛ Paradeiso ɔ mi, nɛ o kɛ yayami peelɔ ɔ nɛ e kɛ Yesu tu munyu ɔ ngɛ ní sɛɛe. E ngɛ heii kaa nyɛ ni enyɔ ɔmɛ tsuo nyɛ maa tsɔɔ bɔ nɛ nyɛ bua jɔ Yesu afɔle sami ɔ he ha. Eko ɔ, o maa suɔ nɛ e de mo ní kpahi nɛ ya nɔ benɛ e piɛ bɔɔ nɛ Yesu ma gbo ɔ, kɛ bɔ nɛ e nu he ha benɛ Yesu de lɛ ke e maa piɛɛ e he ngɛ Paradeiso ɔ. Eko ɔ, lɛ hu e maa suɔ nɛ o de lɛ bɔ nɛ níhi ya nɔ ha ngɛ Satan je yaya nɛ ɔ nyagbe ligbi ɔmɛ a mi. E ji he blɔ ngua nɛ wa ma ná kaa waa kɛ nihi nɛ a ngɛ kaa jamɛ a nyumu ɔ maa kase Mawu Munyu ɔ!​—Efe. 4:22-24.

19. Mɛni he je nɛ si himi ngɛ Paradeiso ɔ mi ɔ be wa nya gbee gblegbleegble ɔ? (Hyɛ foni nɛ ngɛ womi ɔ hɛ mi ɔ.)

¹⁹ Si himi be wa nya gbee ngɛ Paradeiso ɔ mi gblegbleegble. Waa kɛ nihi nɛ a he ngɛ bua jɔmi maa kpe be fɛɛ be, nɛ wa ma tsu ní tsumi nɛ ngɛ bua jɔmi. Nɔ́ nɛ pe kulaa a, daa ligbi ɔ, wa maa le wa hiɔwe Tsɛ ɔ saminya, nɛ wa bua maa jɔ níhi nɛ e haa wɔ ɔ a he. Be fɛɛ be ɔ, wa maa kase níhi fuu ngɛ Yehowa kɛ níhi nɛ e bɔ ɔ a he. Daa je nanɛɛ ɔ, suɔmi nɛ wa ngɛ kɛ ha Mawu ɔ hu mi maa hi wae. Wa bua jɔ wawɛɛ kaa Yehowa kɛ Yesu wo wɔ si kaa wa ma nyɛ maa hi si kɛ ya neneene ngɛ Paradeiso ɔ mi!