Voorkom brande in die huis

DAAR word gesê dat mev. Patrick O’Leary se koei die paraffienlamp in die skuur omgeskop het en die groot brand van 1871 in Chicago begin het. Die skade aan eiendom en verlies aan lewens was ongelooflik. Volgens een bron het die brand 100 000 dakloos gelaat, meer as 17 400 geboue verwoes en 250 mense se dood veroorsaak.

Vandag, 120 jaar later, het moderne brandbestrydingstegnologie al gehelp om talle groot brande te voorkom. Huisbrande hou egter steeds ’n ernstige gevaar in. Die NFPA (National Fire Protection Association) beweer dat daar in die Verenigde State byna vyfduisend mense in een jaar in huisbrande omgekom het. Die NFPA het ’n paar eenvoudige wenke gegee om huisbrande te voorkom, wat in The Vancouver Sun gepubliseer is. Hulle is basies:

◻ Moenie toelaat dat mense in die huis rook nie. Ongelukke waarby nalatige rokers betrokke is, is steeds die vernaamste oorsaak van dood by huisbrande.

◻ Moenie draagbare verwarmers aan los wanneer niemand daar is of terwyl jy slaap nie.

◻ Moenie elektriese baanwerk oorlaai of uitgerafelde koorde gebruik nie. Gebruik net die regte grootte sekeringe.

◻ Hou kaggels en skoorstene skoon. Gaan hulle jaarliks na.

◻ Sien rookspeurders gereeld na, en vervang hulle batterye elke jaar. Maak seker dat almal in die gesin die geluid van die rookspeurder ken.

◻ Sorg dat almal in die gesin die brandontsnappingsroete ken, en moenie die uitgange versper nie.