Die Bybelse beskouing

Waarom pornografie gevaarlik is

PORNOGRAFIE word nie meer tot winkels wat obsene dinge verkoop of tot seksvertonings beperk nie. Dit is nou aan die publiek beskikbaar. Die gewone mense word in die een land na die ander deur tydskrifte, koerante, boeke, TV-programme, rolprente en video’s gedwing om daarna te kyk. Kan iets wat so algemeen is werklik so gevaarlik wees?

Maar wat is pornografie? Pornografie word beskryf as “die uitbeelding van erotiese gedrag (soos in prente of boeke) wat daarop gemik is om die seksdrange te prikkel”. Daardie definisie is duidelik. Maar argumente ontstaan wanneer daar bepaal moet word wat die seksdrange prikkel en wat nie. Die persoon wat daarna kyk, bepaal weliswaar in ’n mate wat pornografie is. Met ander woorde, wat vir een mens seksueel stimulerend is, sal vir ’n ander miskien nie wees nie. ’n Onlangse opname wat onder 5 000 mense in Duitsland gedoen is, het nietemin getoon dat erotiese stof op ’n sekere vlak feitlik op almal, mans sowel as vroue, ’n uitwerking het.

Is dit verkeerd om begeertes te prikkel?

Dit is onverstandig om ’n geoorloofde begeerte—van watter aard ook al—te prikkel as daar geen manier is om die begeerte regmatig te bevredig nie. As een van jou geliefkoosde kossoorte byvoorbeeld nie beskikbaar is nie, sal dit jou waarskynlik nie tevrede stel as jy aanhoudend na prentjies daarvan in tydskrifte of boeke kyk nie. As jy dit daarenteen—miskien om gesondheidsredes—nie mag eet nie, sal dit heel waarskynlik tot ’n ernstige oortreding lei as jy gedurig daaraan dink. Net so sal ’n roker wat die gewoonte wil afleer nie sy kanse verbeter as hy gedurig verlangend toekyk hoe ander mense rook nie.

Volgens die Bybel kan geluk net verkry word wanneer seksuele begeertes regmatig binne die perke van ’n liefdevolle huwelik bevredig word (1 Korinthiërs 7:2-5; Hebreërs 13:4). Hoe onverstandig is dit dus vir ’n ongetroude persoon om begeertes te prikkel wat hy nie kan bevredig nie! Dit lei net tot frustrasie of, selfs erger, tot die bevrediging van die begeertes deur masturbasie of hoerery, wat ’n oortreding van goddelike wette en beginsels is.—1 Thessalonicense 4:3-7.

Beteken dit dat pornografie nie gevaarlik is as jy getroud is nie? Nee, daardie skriftuurlike gedragsriglyne is ook op getroude mense van toepassing. Pornografie prikkel eweneens selfsugtige hartstogte en bevorder die bevrediging van persoonlike begeertes, terwyl liefde om die bevrediging van die behoeftes van ’n mens se huweliksmaat draai. Pornografie gee aanleiding tot onbedagsame en egosentriese geslagsgemeenskap, wat selfs binne die huweliksverhouding vernederend en liefdeloos word.—1 Korinthiërs 13:5.

In plaas van die liefde in die huwelik te versterk, vernietig pornografie dit deur dit te verlaag en dit verdorwe te maak. Geslagsgemeenskap, soos dit in pornografie uitgebeeld word, is fantasie van die ergste graad, omdat dit onjuiste en nadelige idees aangaande geslagsgemeenskap in die huwelik oordra. Daarbenewens behels verhoudinge in werklikheid veel meer as net seks; hulle word op teerheid, humor, kommunikasie en liefde gebou. Pornografie kan selfs ’n wig tussen ’n getroude paar indryf.

Pornografie verlaag mense tot dieselfde vlak as diere, wat geheel en al op instink reageer. Dit werk selfbeheersing, ’n vrug van God se gees, teë (Galasiërs 5:22). Dit kan daartoe lei dat ’n mens by seksuele perversiteite betrokke raak. Dit is net ’n paar van die redes waarom Christene pornografie vermy.

Die Bybel se wyse raad is derhalwe: “Verheug jou oor die vrou van jou jeug . . . Waarom sou jy, my seun, by ’n vreemde bedwelmd raak en die boesem van ’n ontugtige omhels [letterlik of indirek deur pornografie]?”—Spreuke 5:15-20.

Maar hoe kan ’n mens pornografie vermy of uit die greep daarvan losbreek?

Hoe om uit die greep daarvan los te breek

Om die aantrekkingskrag van pornografie teë te werk, raai die Bybel ’n mens aan: “Maak dood dan julle lede wat op die aarde is, naamlik hoerery, onreinheid, hartstog” (Kolossense 3:5). Hier gee die woorde “maak dood” duidelik die gedagte weer dat ’n mens enige liggaamsdeel moet doodslaan—nie net onderdruk nie—wat in daardie onsedelikhede gebruik kan word.

Dit moet egter in sedelike sin en nie in fisiese sin verstaan word nie. Christene moet nie hulle liggame skend nie. As ons verkeerde seksuele gedagtes beslis “doodmaak”, sal ons nie voor die aantrekkingskrag van pornografie swig en sodoende ons liggaamsdele, soos die oë, op ’n verkeerde manier gebruik nie. (Vergelyk Mattheüs 5:29, 30.) Die Bybel raai ons gevolglik aan om verkeerde begeertes met “alles wat regverdig is, alles wat rein is” te vervang en “dit [dan te] bedink”.—Filippense 4:8.

Wat anders kan help? Om Bybeltekste soos die volgende in gedagte te hou, of selfs te memoriseer:

“Wend my oë af, dat hulle geen nietigheid sien nie.”—Psalm 119:37.

“Alles wat in die wêreld is—die begeerlikheid van die vlees en die begeerlikheid van die oë . . . is nie uit die Vader nie, maar is uit die wêreld.”—1 Johannes 2:16.

“Elkeen word versoek as hy deur sy eie begeerlikheid weggesleep en verlok word. Daarna, as die begeerlikheid ontvang het, baar dit sonde; en as die sonde tot volle ontwikkeling gekom het, bring dit die dood voort.”—Jakobus 1:14, 15.

Enigiets wat ’n kettingreaksie aan die gang kan sit wat op die dood uitloop, kan met reg gevaarlik genoem word; en pornografie pas by daardie beskrywing! Onthou: “Hy wat in die vlees saai, sal uit die vlees verderf maai; maar hy wat in die Gees saai, sal uit die Gees die ewige lewe maai.” Moenie toelaat dat pornografie jou van die ewige lewe beroof nie!—Galasiërs 6:8.

[Lokteks op bladsy 19]

In plaas van die liefde in die huwelik te versterk, vernietig pornografie dit deur dit te verlaag en dit verdorwe te maak