Ons beskou die wêreld
Oefening en gesondheid
Wetenskaplikes vind steeds nuwe voordele in matige oefening. Die tydskrif American Health het onlangs oor ’n studie van 30 jaar onder 17 000 mans berig gelewer. Diegene wat deur oefening meer as 1000 kalorieë per week verbrand het, was blykbaar die helfte so vatbaar vir dikdermkanker as diegene wat dit nie gedoen het nie. ’n Studie van 19 jaar onder meer as ’n miljoen Sweedse mans het bevind dat diegene wat meer as die helfte van hulle werksure sit se kanse om dikdermkanker op te doen 30 persent hoër is as diegene wat minder as 20 persent van hulle werksdag sit. ’n Studie wat deur die Harvard-universiteit onder 5400 vroue gedoen is, het bevind dat dié wat matige oefeninge gedoen het terwyl hulle op kollege was die helfte minder borskankergevalle as hulle minder aktiewe klasmaats gehad het, wat op hulle beurt 2,5 keer soveel kankers van die voortplantingstelsel gehad het. Daar is selfs ’n bietjie getuienis dat matige oefening die immuunstelsel versterk en help om virusse vinniger te beveg. Maar uitermatige oefening—soos om ’n maraton te hardloop—het blykbaar die teenoorgestelde uitwerking deurdat dit die immuniteit tydelik belemmer.
’n Toenemende plaag
Iets leliks wat ook ’n gevolg van die vigs-epidemie is, is ’n toename in kinderprostitusie. Volgens ’n berig in die Associated Press uit Genève, Switserland, is dít die gevolgtrekking van ’n nuwe VN-verslag oor menseregte. Die skrywer van die berig, professor in die regte Vitit Muntarbhorn van Thailand, sê dat die aantal nege- of tienjarige kinders wat in prostitusie ingedwing word “daagliks toeneem”. Blykbaar soek al hoe meer klante kinderprostitute, veral maagde, omdat hulle dink dit hulle teen vigs sal beskerm. Maar die professor sê dit is ironies dat baie kinderprostitute in verskeie Asiatiese lande wel die vigs-virus het. Ouers dwing seuns sowel as meisies, maar meer dikwels meisies, in hierdie verlagende bedryf in.
“Priesters wat pedofiele is”
“’n Vlaag van skandale wat deur die seksuele misbruik van kinders veroorsaak is, het die Rooms-Katolieke Kerk betrek by ’n grootskaalse ondersoek na priesters wat pedofiele is—’n verskynsel wat volgens kritici al lank deur die kerkhiërargie toegesmeer word”, berig The Herald-News van Joliet, Illinois, VSA. “Sewe priesters in die omgewing van Chicago is gedurende die afgelope nege maande uit hulle gemeente weggestuur, en een is aangekla weens klagtes oor die seksuele misbruik van kinders.” ’n Kommissie wat uit drie lede bestaan, is deur kardinaal Joseph Bernardin benoem om te besluit wat omtrent die probleem gedoen moet word wat, volgens ’n kerkwoordvoerder, “baie ernstiger is as wat enigiemand gedink het” en waarby honderde priesters landwyd vermoedelik betrokke is. Pogings word nou aangewend om die priesters wat afgedwaal het en wat voorheen net na ander gemeentes verplaas is van hulle amp te onthef. Maar sommige mense het nog hulle bedenkinge. “Hulle verstaan nie hoe diep die sielkundige aard van die wond is wanneer mense leed aangedoen word deur ’n verteenwoordiger van die kerk, wat ons glo ons waardes, sedes en beginsels geformuleer het nie”, het die moeder van ’n gemolesteerde kind gesê.
China val die dwelmhandel aan
China Today berig dat die Chinese regering in die laaste jare kwaai op die dwelmhandel toegeslaan het. Hoewel die land sy opiumprobleem in die vyftigerjare feitlik opgelos het, het die feit dat dit so naby ’n paar van die grootste dwelmvervaardigende gebiede ter wêreld lê die dwelmhandel laat herlewe. Gedurende die afgelope drie jaar is meer as ’n halfmiljoen mense in China weens dwelms in hegtenis geneem. Net in 1990 het Chinese wetstoepassingsinstansies sowat 40 groot dwelmhandelsake opgelos waarby daar elke keer meer as nege kilogram heroïen betrokke was. Dit was twee keer soveel as die vorige jaar. Op 26 Oktober 1991 is 35 dwelmhandelaars voor ’n groot gehoor ter dood veroordeel en 5000 kilogram gekonfiskeerde dwelms verbrand.
’n Reis na ’n ander planeet
Geen mens het tot dusver na ’n ander planeet toe gereis nie; maar dit moes vir Sergei Krikalef gevoel het of hy presies dit gedoen het. Tydens die lansering was hy ’n ruimtevaarder van die Sowjetunie, uit Leningrad. Teen die tyd dat hy teruggekeer het, was daar nie ’n Sowjetunie nie en het Leningrad St. Petersburg geword. Krikalef is net ses maande lank na die Mir-ruimtestasie toe gestuur, maar weens finansiële en politieke druk te midde van al die omwentelinge onder in sy vaderland moes hy op die ou end 313 dae lank daarbo bly.
Moordenaarkaarte
Kinders in die Verenigde State versamel lank reeds as ’n stokperdjie bofbalkaarte met prente en statistiek van hulle gunstelingspelers. Maar ’n nuwe soort kaart het onlangs op die toneel verskyn. Hierdie kaarte het nie sportmanne op nie, maar berugte misdadigers—psigopate, verkragters, reeksmoordenaars, kannibale en lykskenders. Elke kaart het agterop die moordenaar se foto die grusame besonderhede van sy misdade. Volgens ’n hoofartikel in New York se Daily News is die moordenaarruilkaarte baie gewild in lekkergoed- en strokiesverhaalwinkels. Klaarblyklik is die verbruikers vernaamlik kinders.
Skynwonderwerke
’n Dokter in Engeland ondersoek al sowat 20 jaar lank bewerings van wonderwerke wat deur charismatiese en evangeliese kerke in daardie land gedoen word. Volgens Londen se Daily Telegraph is sy gevolgtrekking: “Daar is geen mediese bewyse wat die charismatiese gerugte van wonderdadige genesing staaf nie.” Dr. Peter May het voor ’n sinode van die Anglikaanse Kerk beskryf hoe hy oor die jare heen herhaaldelik probeer het om bevestiging van “genesers” te kry vir die verskillende wonderwerke wat hulle glo al verrig het. “Hulle kan gewoonlik nie”, sê hy, “en wanneer hulle wel gevalle kan noem, is hulle nooit waarna hulle aanvanklik lyk nie.” Hy het tydskrifte en video’s veroordeel wat munt slaan uit die beskrywing van wonderwerke wat blykbaar nooit plaasgevind het nie. Volgens die Telegraph het dr. May sy bevindings met dié van baie kollegas vergelyk. “Nie een van hulle”, sê hy, “kon eers ’n enkele geval noem wat met die wonderwerke van Christus vergelyk kan word nie.”
Hongersnood in Afrika
Hongersnood en burgeroorlog dwing tienduisende Somaliërs en Ethiopiërs om uit hulle tuislande na vlugtelingkampe in Kenia te vlug op soek na kos en blyplek. The Star van Suid-Afrika het ’n VN-amptenaar aangehaal wat gesê het: “Die meeste sak inmekaar by hulle aankoms, omdat hulle met min kos of water sowat 600 kilometer ver gestap het. Hulle is in ’n verskriklike toestand, sommige feitlik net vel en been, en baie het koeëlwonde.” In een oorvol kamp sterf gemiddeld 15 mense daagliks. Die meeste van hulle is vroue en kinders. Intussen laat die droogte voedseldiefstal in Zimbabwe in die suide toeneem, berig die Sunday Times van Harare, Zimbabwe. Sommige diewe is so radeloos dat hulle eenvoudig stukke vleis van lewende beeste afkap en die diere laat ly totdat hulle eienaars hulle ’n genadeskoot gee.
Gespanne misdadigers
Professor Francesco Aragona, wat verbonde is aan die Instituut vir Regsgeneeskunde van die Messina-universiteit in Sisilië, doen al 30 jaar lank lykskouings op lede van die Mafia. “Volgens die professor het die Mafia-lid agter die arrogante en selfversekerde uiterlike ernstige gesondheidsprobleme: Sy gejaagde daaglikse lewe het ’n ernstige uitwerking op die hart, die brein, die byniere en selfs die testes of die eierstokke, na gelang van die geslag”, sê die Brasiliaanse tydskrif Superinteressante. “Ek het ernstige hartkwale in jong mans tussen 18 en 20 jaar teëgekom, . . . asof hulle dekades lank as gevolg van spanning aan hoë bloeddruk gely het”, het dr. Aragona volgens die tydskrif gesê. Hy het bygevoeg: “As hulle nie vermoor is nie, sou hulle binne ’n kort tydjie aan hartversaking gesterf het”, en “’n mens kan maar sê dat misdaad, selfs wat die gesondheid betref, nie die moeite werd is nie”.
Demonisme in Rome
Sedert Gabriele Amorth in 1986 as ’n Katolieke duiwelbesweerder aangestel is, het hy net in Rome glo al met 12 000 gevalle van duiwelbesetenheid te doen gehad. “Waarom so baie?” het ’n joernalis van die Italiaanse koerant Il Tempo gevra. “Alle tradisioneel Katolieke lande”, het die priester beweer, “is toe onder al die demoonbedrywighede. Demoonaanvalle kan nie meer gestuit word nie.” Amorth het Rome streng aangespreek: “Die pous se stad het die meeste duiwelbesetenes ter wêreld. Meer as honderd Sataniese kultusse is daar bedrywig . . . Elkeen behoort te weet dat baie kinders in Rome verdwyn en in sataniese ritusse gebruik word.”
Duur troues word aangemoedig
In hierdie ekonomies moeilike tye raak die koste van troues in die Verenigde State ’n al hoe groter las. Volgens een raming kos die deursnee formele troue daar nou al R44000. Trourokke kos gemiddeld R2200, hoewel baie volgens The Wall Street Journal meer as R5500 kos. Verskeie tydskrifte in die land word uitsluitlik met die oog op toekomstige bruide en hulle trouplanne uitgegee, en die tydskrifte is onlangs gekritiseer omdat hulle die bruidsbedryf aanmoedig en die stygende koste bevorder. Oor die algemeen verbied die tydskrifte byvoorbeeld enige advertensies vir huurtrourokke, want hulle wil nie hulle grootste adverteerders, die kleinhandelbruidsbedryf—wat blykbaar blind van woede word as bruide trourokke huur pleks van koop—te na kom nie.