Ons veranderende wêreld—Wat hou die toekoms werklik in?

GESTEL ons wêreld moet ten goede verander, watter moontlikhede is daar? Een moontlikheid is om te glo dat die wêreldheersers en -leiers mettertyd altruïsties sal word en die mensdom in die rigting van wedersydse verdraagsaamheid, begrip en vrede sal begin lei.

Dit beteken dat ons moet glo dat stamtrots en nasionalisme uitgewis en vervang sal word deur ’n supranasionale gesindheid wat vir die wêreld harmonie kan bring.

Dit beteken ook ons moet glo dat leiers van kapitalistiese ekonomiese stelsels sal besef dat ’n winsmotief alleen eties onvoldoende is in ’n wêreld van grootskaalse werkloosheid, haweloosheid en ontsaglike mediese rekeninge.

Dit beteken boonop ons moet glo dat al die wapenvervaardigers in die wêreld na wêreldvrede sal begin hunker en van hulle swaarde pikke sal smee.

Dit beteken ook dat die wêreld se misdadigers, onder andere die hoofde van die Mafia, die leiers van Oosterse misdaadbendes en die dwelmbase van Suid-Amerika, tot inkeer sal kom en ’n nuwe blaadjie sal omslaan!

Met ander woorde, dit beteken dat ons aan ’n mensgemaakte Utopia—’n onmoontlike droom—moet glo. As dit alles sonder God se hulp moet gebeur, dan is ons in ’n soortgelyke situasie as wat die geskiedskrywer Paul Johnson in sy boek A History of the Modern World beskryf het. Hy het geskryf dat een van die onderliggende euwels wat tot die “rampspoedige mislukkings en tragedies” van ons eeu bydra “die arrogante mening is dat mans en vroue al die raaisels van die heelal sonder hulp deur hulle eie verstandelike vermoëns kan oplos”.—Vergelyk Jesaja 2:2-4.

Maar daar bestaan ’n vaste grondslag vir positiewe verandering. Dit is om te glo dat die aarde se Skepper, ons planeet se Eienaar, die Grootse Insteller van verandering, Jehovah God, in menseaangeleenthede gaan ingryp om sy handewerk te red. Bybelgeskiedenis toon dat God in die verlede al opgetree het om sy voornemens te vervul, en Bybelprofesie toon dat hy binnekort weer gaan optree om sy oorspronklike voorneme met die mens en die aarde uit te voer.—Jesaja 45:18.

’n Unieke bron van betroubare inligting

Die unieke Bron van ware kennis oor wat die toekoms vir die mensdom inhou, word in die woorde van die Bybelprofeet Jesaja beskryf: “Dink aan die dinge wat tevore was, van ouds af, dat Ek God is, en daar is geen ander nie; Ek is God, en daar is niemand soos Ek nie; wat van die begin af verkondig die einde, en van die voortyd af wat nog nie gebeur het nie.”—Jesaja 46:9-11.

Waarom weet Jehovah God vooruit van die gebeure wat die mensdom binnekort gaan raak? Jesaja antwoord weer eens: “Soos die hemel hoër is as die aarde, so is my weë hoër as julle weë en my gedagtes as julle gedagtes.” Die Bybel bevat God se gedagtes oor die mensdom se toekoms.—Jesaja 55:9.

“Swaar tye”

Wat het God se Woord, die Bybel, vir ons geslag voorspel? Die Christenapostel Paulus het gewaarsku: “Maar weet dit, dat daar in die laaste dae swaar tye sal kom” (2 Timotheüs 3:1). Ons leef al sedert 1914 en die Eerste Wêreldoorlog in tye wat al hoe moeiliker word. Die mens se selfsug, hebsug en begeerte na mag het daartoe gelei dat sy wandade, nie net teenoor sy medemens nie, maar ook teen die natuur self, al hoe erger word. Die mens se onverskilligheid teenoor sy omgewing bedreig die toekomstige voortbestaan van sy kinders en kleinkinders.

Hierdie ernstige gevaar is deur die destydse president van Tsjeggo-Slowakye, Vaclav Havel, beklemtoon, wat oor toestande in daardie land geskryf het. Sy woorde geld in werklikheid vir die hele wêreld: “Hierdie is bloot die gevolge van . . . die mens se gesindheid teenoor die wêreld, teenoor die natuur, teenoor ander mense, teenoor die lewe self. Hierdie is die gevolge . . . van die verwaandheid van die hedendaagse mens wat meen dat hy alles verstaan en alles weet, wat homself die meester van die natuur en die wêreld noem. . . . Dit is hoe die mens dink wat weier om enigiets . . . te erken wat hoër as hy is.”

Al Gore, wat vroeër aangehaal is, het geskryf: “Ek is oortuig dat baie mense hulle vertroue in die toekoms verloor het omdat ons in feitlik elke faset van ons beskawing begin optree asof ons toekoms nou so onseker is dat dit verstandiger is om ons uitsluitlik op ons huidige behoeftes en korttermynprobleme toe te spits” (Earth in the Balance). Dit lyk beslis of pessimisme oor die toekoms ’n algemene gesindheid is.

Hierdie situasie het ontstaan deels omdat Paulus se verdere woorde nou vervul word: “Mense sal liefhebbers van hulleself wees, geldgieriges, grootpraters, trotsaards, lasteraars, ongehoorsaam aan hulle ouers, ondankbaar, onheilig, sonder natuurlike liefde, onversoenlik, kwaadsprekers, bandeloos, wreed, sonder liefde vir die goeie, verraaiers, roekeloos, verwaand, meer liefhebbers van genot as liefhebbers van God; mense wat ’n gedaante van godsaligheid het, maar die krag daarvan verloën het. Keer jou ook van hierdie mense af.”—2 Timotheüs 3:2-5.

’n Beter keuse

Maar dit is God se voorneme dat dinge op hierdie aarde gaan verander—ten goede. Hy het belowe dat hy “nuwe hemele en ’n nuwe aarde waarin geregtigheid woon”, gaan teweegbring (2 Petrus 3:13). Om hierdie besoedelde aarde tot Paradystoestande te herstel, moet Jehovah God eers “die verderwers van die aarde . . . verderf” (Openbaring 11:18). Hoe gaan hy dit doen?

In simboliese taal toon die Bybel dat God binnekort die politieke elemente, waaronder die Verenigde Nasies, gaan beweeg om die mag en aansien te vernietig van dit wat moontlik die negatiefste invloed in die geskiedenis van die mens was—die nasionalistiese en verdelende invloed van godsdiens oor die hele wêreld.a In sy boek The Transformation of War sê Martin van Creveld: “Dit lyk of ons kan verwag dat godsdiensgesindhede, -opvattings en -fanatisme ’n groter rol in die motivering van die gewapende stryd sal speel as wat dit die afgelope 300 jaar, ten minste in die Weste, gespeel het.” Godsdiens gaan, moontlik omdat hulle hulle in die politiek inmeng, onder die politieke magte ly. Maar daardie magte sal God se wil onwetend uitvoer.—Openbaring 17:16, 17; 18:21, 24.

Die Bybel toon verder dat God sy aandag daarna op die uitbuitende, dierlike politieke elemente van Satan se korrupte wêreldstelsel gaan vestig en in sy laaste oorlog, of slag van Armageddon, teen hulle gaan stry. Ná die uitwissing van die gewetenlose politieke stelsels en hulle hoofmanipuleerder, Satan, sal die pad oop wees vir die vreedsame nuwe wêreld wat God belowe het.b—Openbaring 13:1, 2; 16:14-16.

Jehovah se Getuies preek al byna 80 jaar lank van huis tot huis oor hierdie komende veranderinge. Gedurende daardie tydperk het hulle ook die talle veranderinge gesien en ondervind wat die mensdom tot stand gebring het. Hulle is al weens hulle Bybelse beginsels in Nazi-gevangenisse en konsentrasiekampe opgesluit. Hulle het al die pyn en lyding van die lewe in talle dele van Afrika, onder andere burgeroorloë en stamtwiste, ondervind. Hulle het al weens hulle neutraliteit en hulle ywerige prediking onder die meeste politieke en godsdiensstelsels vervolging verduur. Maar ten spyte van al hierdie dinge het hulle God se seën op hulle wêreldwye onderrigtingswerk gesien, aangesien hulle van ’n paar duisend in 1914 tot sowat vier en ’n half miljoen in 1993 gegroei het.

Redes vir optimisme

Pleks dat hulle deur pessimisme oormeester word, het die Getuies ’n optimistiese lewensbeskouing omdat hulle weet dat die beste en grootste veranderinge binnekort op hierdie aarde gaan plaasvind. Gebeure sedert 1914 het Jesus se profesieë vervul wat as die teken van sy onsigbare teenwoordigheid in Koninkryksmag dien en toon dat ons in die tyd van die einde lewe vir enige mensgemaakte “nuwe wêreldwanorde”, soos ’n Franse skrywer die vooruitsigte vir die nabye toekoms in Le Monde genoem het. Jesus het gesê: “Weet dat die koninkryk van God naby is wanneer julle hierdie dinge sien gebeur.”—Lukas 21:7-32.

Die mens se “nuwe wêreldorde” is onderhewig aan die gebreke van die menslike natuur—eersug, ’n begeerte na mag, hebsug, korrupsie en ongeregtigheid. God se nuwe wêreld gaan geregtigheid waarborg. Van hom is daar geskryf: “Die Rots—volkome is sy werk; want al sy weë is strafgerigte; ’n God van trou en sonder onreg; regverdig en reg is Hy.”—Deuteronomium 32:4.

Die mens se “nuwe wêreldorde” is ontvanklik vir dít wat McGeorge Bundy, die Amerikaanse deskundige oor buitelandse beleid, beskryf het as “kleingeestige nasionalistiese gevoelens wat deur opswepers aangewakker kan word”. Hy het voortgegaan deur te sê: “Ons weet uit die geskiedenis hoe ekonomiese en sosiale mislukking sulke ekstremiste mag kan gee. Ons weet ook dat, waar dit ook al gebeur, daardie soort nasionalisme gevaarlik is.”

God se nuwe wêreld waarborg harmonie en vrede onder mense uit alle stamme en nasies, want hulle sal in Jehovah se weë van onpartydigheid en liefde onderrig word. Jesaja het voorspel: “En al jou kinders sal deur die HERE geleer wees, en die vrede van jou kinders sal groot wees” (Jesaja 54:13). En die Christenapostel Petrus het gesê: “Ek sien waarlik dat God geen aannemer van die persoon is nie, maar dat in elke nasie die een wat Hom vrees en geregtigheid doen, Hom welgevallig is.”—Handelinge 10:34, 35.

Daar sal ongetwyfeld in die nabye toekoms buitengewone gebeure plaasvind in die wêreld soos ons dit ken. Maar die grootste veranderinge, die permanente en voordelige veranderinge, is dié wat God belowe het om teweeg te bring, en hy ‘kan nie lieg nie’.—Titus 1:2.

[Voetnote]