Van ons lesers

Selfmoord Ek het die artikel “Jongmense vra . . . Is selfmoord die oplossing?” (8 April 1994) gelees met my hart wat in my keel gesit het. Ek is 20 en is nou ’n voltydse bedienaar. Maar ek het nog tot onlangs selfmoordneigings gehad. Jehovah het my gehelp en hou aan om my te onderskraag. Toe een van my beste vriendinne my net ’n paar dae gelede vertel het dat sy haar eie lewe probeer neem het, het ek na praktiese raad gesoek wat haar sou help om nie moed op te gee nie. Hierdie artikel was die antwoord op my gebede.

A. C., Italië

Ek het skaars verlede week nog sterk selfmoordgedagtes in my hart gehad. ’n Christen- ouere man en sy vrou het my intieme vertrouelinge geword en my sodoende gehelp. Julle talle artikels oor depressie het my lewe gered.

D. J., Verenigde State

Ek moes eenvoudig my opregte dank vir die artikel teenoor julle betuig. Dit het my geraak soos geen vorige artikel wat ek kan onthou nie. Julle sien, ’n paar jaar gelede het ek gemeen dat selfmoord ’n uitweg is—’n uitkoms uit omstandighede wat oënskynlik onhoudbaar is. Maar met die hulp van ouers en vriende het ek besef dat ek die beste van alle redes het om te lewe—Jehovah wil hê dat ek moet lewe.

M. V., Verenigde State

Hierdie artikel was na my mening breedvoerig en is goed geskryf. Ek dink dat dit ’n uiters waardevolle hulpmiddel is om enigiemand te help wat dalk selfmoordgedagtes koester. Al die voorbeelde in die artikel het my ontroer.

L. S., Verenigde State

Swerwende hippie Ek wil julle bedank vir die artikel oor Richard Fleet, “Van ’n swerwende hippie tot ’n Suid-Amerikaanse sendeling” (22 Maart 1994). Ek en my verloofde is van plan om ná ons troue na Hongarye te verhuis om daar met die predikingswerk te help. Tot nou toe was ek baie bekommerd oor die groot verandering in ons lewenstyl en die uitdaging om ’n nuwe taal te leer. Die artikel het duidelik getoon dat dit nie ons persoonlike sorge is wat tel nie, maar die mense vir wie ons preek.

S. H., Duitsland

Ek meen alle ongetroudes moet hierdie artikel lees en besef dat ’n mens ’n kneg van Jehovah kan wees en sonder ’n huweliksmaat gelukkig kan wees. Dit is wonderlik om te lees hoe ’n ongetroude man Mattheüs 6:33 ten volle in sy lewe toegepas het. Vandat ek Jehovah twee en ’n half jaar gelede as ’n voltydse evangeliedienaar begin dien het, het ek vreugde soortgelyk aan Richard Fleet s’n begin smaak.

D. M., Verenigde State

Dit het my diep ontroer om uit te vind dat daar wel manne is wie se hart na vaderlose seuns uitgaan. Ek is ’n enkelmoeder met vier seuns. ’n Christenbroer het in een van hulle belangstelling begin toon, en nou berei daardie seun hom voor om binnekort gedoop te word. Wanneer iemand na vaderloses uitreik, word dit baie waardeer.

P. T., Verenigde State

Chili Ek het so pas die nommer van 8 Mei 1994 gelees en ek het die artikel “Chili—’n unieke land met ’n unieke streekbyeenkoms” veral geniet. Dit het vir my gevoel of ek self die streekbyeenkoms bygewoon het. Ek kon selfs aanvoel hoe dit moes wees om teësinnig te vertrek toe die program geëindig het.

K. K., Japan

Kompakskywe Dankie vir julle artikel “Die kompakskyf—Wat behels dit alles?” (22 April 1994). Dit het my verwarring oor hierdie skywe opgehelder. Nadat ek na ’n vriend se kompakskyfstelsel geluister het, het ek my verwonder oor hoeveel beter dit as ander klankreproduksiestelsels is.

S. D., Nigerië