Van ons lesers

Bestuursgevaar Toe ek die beriggie “Moeg agter die wiel” (“Ons beskou die wêreld”, 22 Februarie 1994) gelees het, het dit herinneringe teruggebring van die dae, ongeveer 20 jaar gelede, toe ek ’n lorriebestuurder (vragmotorbestuurder) was. Ek was op pad huis toe ná ’n lang dag agter die wiel toe ek aan die slaap geraak het. ’n Harde stamp het my skielik laat wakker skrik en tot my afgryse was ek aan die verkeerde kant van die pad. Ek het die randsteen getref, maar geen motors of voetgangers was in sig nie. Ek het skotvry daarvan afgekom, maar dit was ’n les wat ek nooit sal vergeet nie. Ek kon iemand se dood veroorsaak het net omdat ek nie gerus het toe ek dit nodig gehad het nie. My advies? Lees daardie beriggie in die Ontwaak! en gee ag daarop!

M. Y., Engeland

Oorgewig Ek wil julle spesiaal bedank vir die artikel “Jongmense vra . . . Waarom is ek so vet?” van 22 April 1994. Ek is 13 jaar oud en het nog altyd gedink dat ek vet is, hoewel ek volgens die gewigtabelle gemiddeld is. As gevolg van my gesindheid het ek alle selfvertroue verloor en aan depressie begin ly. Ek het eenkeer selfs gewens dat ek dood is. Dit klink verregaande, maar dis hoe ek gevoel het. Danksy Jehovah en hierdie artikel kan ek my depressie beter beheer.

C. S., Duitsland

Jong kankerpasiënt Ek het so pas die artikel “Wanneer die lewe ’n stryd is”, soos vertel deur Kathy Roberson, gelees en ek moet sê dat dit my werklik geroer het (22 Augustus 1994). Ek moes net skryf en my diepe waardering vir so ’n pragtige artikel uitspreek. Ek is 14 jaar oud en het al vervolging by die skool verduur omdat ek een van Jehovah se Getuies is. My situasie is nie so beproewend soos Kathy Roberson s’n nie, maar dit was vir my ’n inspirasie om te sien hoe Jehovah haar deur haar hele beproewing onderskraag het.

C. G., Verenigde State

Wat ’n wonderlike artikel! Ek het ook baie siek geword toe ek nege was en het uiteindelik baie maande in die hospitaal deurgebring. Ek het egter weer goeie gesondheid geniet teen die tyd dat ek hoërskool toe is. Hoe moeilik moes dit tog nie vir Kathy Roberson gewees het om herhaaldelik die terugkeer van haar siekte te hanteer nie. Haar gesindheid en krag het my gehelp om positiewer te wees.

D. V., Verenigde State

Borsvoeding Ek gaan binne drie maande aan ons tweede kind geboorte skenk. Toe ek dus my Ontwaak! van 22 Augustus 1994 ontvang en die artikel “Die basiese feite oor borsvoeding” gesien het, was ek verheug. Dit was waarlik verkwikkend om ’n artikel te lees wat die verdiende eer en lof aan die Skepper van lewe gee. As ’n mens dink aan hoe goed ’n moeder toegerus is om haar baba te voed, kan ek nie verstaan hoe enigiemand kan ontken dat daar ’n wyse en liefdevolle Skepper is nie.

L. K., Verenigde State

Ek is seker julle gaan baie briewe van dank vir hierdie artikel ontvang. As ek terugkyk, kan ek sien wat ’n seën en praktiese keuse borsvoeding vir al drie ons kinders was. Ek weet dat hierdie artikel moeders en toekomstige moeders gaan bemoedig.

C. S., Verenigde State

Doeltreffende kunswerk My hart het vinniger geklop toe ek die prentjie van die opstanding in die nommer van 8 Junie 1994 gesien het. My waardering vir die wonderlike opstandingshoop is selfs verder vergroot. Geen woorde sal my vreugde kan beskryf wanneer ek my jonger suster in die toekomstige Paradys kan sien nie.

M. U., Japan

Die liefde vir geld Dankie vir die artikel “Die liefde vir geld—’n wortel van allerlei kwaad” (22 Maart 1994). In ons land is daar baie plundering, inbraak en intimidasie van die publiek—alles vir geld. Hierdie tydskrif was dus tydig en gepas, en dit het my groot vreugde verskaf om hierdie nommer by ander te laat. Trouens, party broodverkopers het oor die eksemplare baklei as ek nie genoeg daarvan gehad het nie!

A. F. S., Wes-Afrika