Jongmense vra . . .

Hoe kan ek pret hê?

“Ek dink ons doen wel talle prettige dinge. In ons gemeente doen ons regtig moeite om bymekaar te kom. Die pret wat ons het, is heilsaam. Die meeste kinders in die wêreld kan dít nie sê nie.”—Jennifer.

ONTSPANNING—almal het dit van tyd tot tyd nodig. The World Book Encyclopedia sê dat ontspanning selfs “’n belangrike bydrae tot ’n mens se geestes- en liggaamlike gesondheid” kan lewer. Trouens, die Bybel sê self dat daar ‘’n tyd is om te lag’, dit wil sê, ’n tyd om pret te hê!—Prediker 3:1, 4.a

Ongelukkig is baie van die dinge wat jongmense vir “pret” doen—soos om wilde partytjies te hou of dwelms en alkohol te misbruik of hulle aan ongeoorloofde geslagsomgang skuldig te maak—nie werklik verfrissend nie, maar eerder vernietigend. Dit kan dus ’n ware uitdaging wees om ontspannende bedrywighede te vind wat genotvol sowel as heilsaam is. Maar volgens Jennifer, wat in die begin aangehaal word, is dit wel moontlik!

Doen dinge saam

Ontwaak! het onlangs ’n onderhoud met ’n aantal jongmense oor hierdie onderwerp gevoer. Die meeste het gesê dat hulle dit geniet om saam met ander jongmense bymekaar te kom. Voel jy dieselfde—maar vind jy dikwels dat jy nêrens heen genooi is nie? Waarom doen jy dan nie die eerste stap nie? ’n Suid-Afrikaanse meisie met die naam Leigh sê byvoorbeeld: “As ek graag ’n sekere fliek wil sien, bel ek een van my vriende, en ons laat ons ander vriende weet.” Gewoonlik woon hulle die vroeë vertoning van die rolprent by. Daarna kom haal hulle ouers hulle en gaan hulle saam uiteet by ’n plaaslike restaurant.

Sportaktiwiteite bied ook geleenthede vir heilsame oefening en heilsame omgang (1 Timoteus 4:8). Jong Roelien sê: “Ek sê eers vir my gesin waarheen ek wil gaan, en dan nooi ons ’n groepie om saam met ons te kom.” Trouens, jong Christene het uitgevind dat daar ’n groot verskeidenheid heilsame sportsoorte is waaraan hulle met ander kan deelneem: skaats, fietsry, draf, tennis, basketbal, sokker en vlugbal, om maar net ’n paar te noem.

Nee, jy hoef nie baie geld te spandeer of spoggerige toerusting aan te skaf om pret te hê nie. “Ek, my ouers en my vriende het heelwat aangename ure op staptogte in die nabygeleë berge en wildernisgebiede deurgebring”, sê ’n tienderjarige Christenmeisie. “Net om buite in die vars lug saam met goeie vriende te wees, is baie genotvol!”

Gesellighede wat opbouend is

Maar vir baie jongmense beteken pret om gesellighede by te woon. “Ons geniet dit om vriende te nooi vir ete en om na musiek te kom luister”, sê jong Aveda. Gesellighede het hulle plek onder Christene. Jesus Christus het self spesiale maaltye, huweliksfeeste en ander gesellighede bygewoon (Lukas 5:27-29; Johannes 2:1-10). Die vroeë Christene het eweneens geleenthede geniet waartydens hulle bymekaargekom het vir maaltye en opbouende omgang.—Vergelyk Judas 12.

As jou ouers jou toelaat om ’n geselligheid te reël, wat kan jy doen om probleme te vermy en te verseker dat almal dit geniet? Die sleutel is goeie beplanning (Spreuke 21:5). Ter toeligting: Dit sal verstandig wees om slegs die aantal vriende te nooi waaroor daar behoorlik toesig gehou kan word. Dit is onwaarskynliker dat kleiner gesellighede in “swelgerye”, of “wilde partytjies”, sal ontaard.—Galasiërs 5:21; Byington.

Christene in die eerste eeu is gewaarsku om omgang te vermy met diegene wat ‘wanordelik wandel’ (2 Tessalonisense 3:11-15). En ’n gewisse manier om ’n geselligheid te bederf, is om jongmense te nooi wat daarvoor bekend is dat hulle luidrugtig en onbeheerbaar is. Hoewel jy moet let op wie jy uitnooi, moet jy jou nie tot dieselfde vriendekring beperk nie. ‘Word verruim’ en leer ander in die gemeente ken, met inbegrip van ouer mense.—2 Korintiërs 6:13.

Gaan jy verversings bedien? Indien wel, hoef dit nie oordadig of duur te wees vir jou gaste om ’n aangename tyd te hê nie (Lukas 10:38-42). “Soms het ons ’n pizza-aand”, sê Sanchia, ’n meisie van Suid-Afrika. Gaste sal dikwels aanbied om ’n paar versnaperings saam te bring.

Wat is van die dinge wat jy by ’n geselligheid kan doen—buiten om net TV te kyk, na musiek te luister of te gesels? “Ons beplan die aand gewoonlik vooruit”, sê Sanchia. “Ons het al speletjies gespeel of iemand laat klavier speel sodat ons liedjies saam kon sing.” ’n Jong Afrikaan met die naam Masene sê: “Soms speel ons kaart, dambord en skaak.”

Jennifer, wat vroeër aangehaal is, het vir Ontwaak! gesê: “Ons het ’n ouer man in ons gemeente wat ons nooi om Bybelspeletjies te kom speel. Jy het goeie Bybelkennis nodig om goed te kan speel.” Die Ontwaak!-verteenwoordiger het vir ander jongmense gevra: “Dink julle nie dat dit onvanpas is om Bybelspeletjies te speel nie?” Hulle het sonder huiwering geantwoord: “Nee!”

“Dis ’n uitdaging”, het een tienermeisie gesê. “Dis pret!” het ’n ander gesê. Wanneer Bybelspeletjies vir die pret gespeel word en die gees van wedywering beteuel word, kan dit aangenaam en opvoedkundig wees!—Sien “Hoe om geselligheidjies aangenaam dog leersaam te maak”, in die Ontwaak! van 8 September 1972.

Gesinspret

In Bybeltye was dit nie iets ongewoons vir gesinne om sekere vorme van ontspanning saam te geniet nie (Lukas 15:25). Maar die jong skrywers van The Kids’ Book About Parents sê dat “ouers en kinders deesdae so besig is dat niemand die tyd het om bedrywighede te beplan nie . . . Ons meen dat dit vir ouers en kinders belangrik is om te sorg dat hulle elke week tyd saam deurbring in bedrywighede wat uitsluitlik pret is.”

“Vrydag is ons gesinsdag”, sê ’n jong Afrikaan met die naam Paki. “Ons speel gewoonlik speletjies saam.” En moenie jou broers en susters vergeet nie. Jong Bronwyn sê: “Ek geniet dit om saam met my jonger sussie te teken en ander kunstige dinge te doen.” Kan jy die inisiatief neem en die een of ander aangename bedrywigheid voorstel waaraan julle saam as ’n gesin kan deelneem?

Wanneer jy heeltemal alleen is

Sê nou jy is alleen? Dit beteken nie dat jy verveeld en eensaam hoef te wees nie. Daar is talle lonende, genotvolle maniere waarop sulke tye benut kan word. Dink byvoorbeeld aan stokperdjies. Sedert Bybeltye het mans en vroue ’n studie van musiek verrykend gevind (Genesis 4:21; 1 Samuel 16:16, 18). “Ek speel klavier”, sê Rachel. “Dis iets wat ’n mens kan doen wanneer jy verveeld is.” As jy nie ’n aanleg vir musiek het nie, sal jy dit moontlik geniet om naaldwerk of tuinwerk te doen, seëls te versamel of ’n vreemde taal te leer. As ’n bykomende voordeel sal jy miskien selfs sekere vaardighede leer wat in latere jare nuttig sal wees.

Die Bybel deel ons mee dat manne van geloof, soos Isak, graag tye wanneer hulle alleen was, gebruik het om te peins (Genesis 24:63). ’n Jong Oostenrykse man met die naam Hans sê: “Nou en dan gaan sit ek op ’n stil plekkie in die tuin om na ’n sonsondergang te kyk. Dit verskaf my baie vreugde en help my om nader aan my God, Jehovah, te voel.”

“Vreugde” in Jehovah se diens

Die Bybel het voorspel dat Christus “vreugde” sou put uit sy diens aan Jehovah God (Jesaja 11:3, NW). En hoewel heilige diens aan God nie werklik ontspanning is nie, kan dit verkwikkend en aangenaam wees.—Matteus 11:28-30.

Hans, wat vroeër aangehaal is, onthou ’n ander genotvolle ondervinding. Hy sê: “Ek en my vriende geniet dit om terug te dink aan die naweke wat ons met die bouwerk aan ’n Byeenkomssaal [vir aanbidding] gehelp het. Ons het geleer hoe om saam te werk, en ons het mekaar beter leer ken. Wanneer ons terugkyk, gee dit ons die bevrediging dat ons iets gedoen het wat die moeite werd en ook genotvol was.”

Die opmerkings van hierdie jong Christene laat een feit duidelik na vore kom: Jy kán aangename tye geniet. Volg Bybelbeginsels. Gebruik jou verbeelding! Lê inisiatief aan die dag! Jy sal vind dat jy pret kan hê op maniere wat jou sal opbou en nie sal afbreek nie.

[Voetnoot]

[Lokteks op bladsy 22]

“Net om buite in die vars lug saam met goeie vriende te wees, is baie genotvol!”

[Prent op bladsy 23]

Jy hoef nie baie geld te spandeer om pret saam met jou vriende te hê nie