Fiksheid te ver gevoer

“’N ONGEWONE uitvloeisel van die fiksheidsbeweging”, sê The Toronto Star, is “mense wat kompulsief oormatig oefen”. Die Star berig dat oormatige oefening onder manne sowel as vroue voorkom. Party dokters en terapeute sê dat manne moontlik oormatig oefen om hulle jeugdigheid terug te kry, maar die onderliggende redes waarom vroue oormatig oefen, het gewoonlik met ’n swak liggaamsbeeld en eetversteurings te doen.

Baie begin oefen om beter te voel en te lyk, maar oefen uiteindelik oormatig net omdat hulle gedwonge voel om te oefen. Richard Suinn, ’n sportsielkundige en raadgewer vir verskeie Olimpiese spanne, sê dit is duidelik dat oefening oormatig is wanneer dit “op emosionele dwang gegrond [is] en nie gedoen word bloot om fiks te word nie”. Wanneer dokters en terapeute hierdie probleem hanteer, probeer hulle vasstel watter invloed hierdie oefening op die pasiënte se lewe uitoefen. As hulle ’n veeleisende beroep het en nog na ’n huis en kinders probeer omsien, sal oormatige oefening ’n nadelige uitwerking op hulle welstand hê. Volgens dr. Thomas Schwenk, ’n professor in gesinsgeneeskunde, “is hulle heel moontlik nog fisies gesond, maar ondervind sosiale ontwrigting, werksontwrigting en gesinsverdeeldheid”.

Die Star noem party waarskuwingstekens wat met oefenverslaafdes verbind word: ‘Die keuse van oefeninge wat alleen gedoen word, soos fietsry, swem, hardloop en gewigoptel; onbuigsaamheid met oefenroosters; mening dat oefening verpligtend is en dat dit ondraaglik is om dit oor te slaan, asook agteruitgang van ander aspekte van persoonlike lewe.’

Alhoewel mense wat met verskillende aspekte van fiksheid te doen het die voordele van matige oefening erken, waarsku hulle ook teen die nadelige gevolge van oormatige oefening.—1 Timoteus 4:8.