Jongmense vra

Waarom moet ek na my gesondheid omsien?

Maak ’n ✔ langs elke doelwit wat jy graag wil bereik.

◯ Gewig verloor

◯ Gesonder vel

◯ Meer energie

◯ Oplettender wees

◯ Kommer verminder

◯ Humeur beteuel

◯ Groter selfvertroue

DAAR is dinge in die lewe wat jy as ’n jongmens nie kan kies nie—jou ouers, jou broers of susters en waar julle woon, om net ’n paar te noem. Maar jou gesondheid is ’n heel ander saak. Oorerflikheidsfaktore sowel as die lewenstyl wat jy kies, kan bepaal of jy fiks en gesond is of nie.a

‘Maar ek is te jonk om bekommerd te wees oor my gesondheid!’ sê jy dalk. Dink jy regtig so? Kyk na die lys doelwitte hierbo. Hoeveel het jy gemerk? Glo dit as jy wil, goeie gesondheid is ’n belangrike sleutel om elkeen van hierdie doelwitte te bereik.

Maar jy voel miskien net soos die 17-jarige Amber,b wat sê: “Ek sal nooit die hele tyd volgraan-, laevet- en suikervrye kos kan eet nie!” As jy so voel, moenie bekommerd wees nie—jy hoef nie ’n fiksheidsfanatikus te wees, lekkergoed op te gee of elke week kilometers ver te draf nie. Eintlik sal jy dalk net ’n paar eenvoudige veranderinge hoef te maak om gesonder te begin lyk, goed te voel en jou beste te lewer. Kom ons kyk hoe jou portuurs dit gedoen het.

Eet reg—lyk gesonder!

Die Bybel spoor ons aan om matig in ons gewoontes te wees. “Moet . . . jou nie trommeldik eet nie”, sê Spreuke 23:20 (Contemporary English Version). Dit is nie altyd maklik om hierdie raad te volg nie.

● “Soos baie tieners is ek altyd honger. My ouers het al gesê dat my maag soos ’n bodemlose put is!”—Andrew, 15.

● “Omdat ek nie regtig kan sien hoe nadelig party kosse nou vir my is nie, dink ek dat dit nie so erg is nie.”—Danielle, 19.

Het jy meer selfbeheersing nodig wanneer dit kom by wat jy eet? Kyk wat party van jou portuurs sê vir hulle werk.

Luister na jou maag. “Ek het altyd kilojoules getel”, sê die 19-jarige Julia, “maar nou hou ek eenvoudig op om te eet wanneer ek vol is.”

Vermy ongesonde kos. “Ek het opgehou om gaskoeldrank te drink”, sê Peter, 21, “en in net een maand het ek vyf kilogram verloor!”

Verander slegte eetgewoontes. “Ek probeer om nie ’n tweede porsie te eet nie”, sê die 19-jarige Erin.

Sleutel tot sukses: Moenie maaltye oorslaan nie! As jy dit doen, sal jy te honger word en sal jy geneig wees om jou te ooreet.

Oefen meer—voel goed!

Die Bybel sê: “Liggaamlike oefening het . . . voordeel” (1 Timoteus 4:8). Maar dit lyk of talle jongmense nie te gretig is om oefening te doen nie.

● “Jy sal nie glo hoeveel kinders swak gevaar het met liggaamlike oefeninge toe ek op hoërskool was nie. Dit was die maklikste klas, buiten pouse!”—Richard, 21.

● “Party dink: ‘Waarom buite in die warm son rondhardloop totdat jy moeg en natgesweet is, terwyl jy ’n videospeletjie kan speel waarin jy ’n karakter kan wees wat dit doen?’”—Ruth, 22.

Laat selfs net die woord “oefening” jou moeg voel? Dan kan jy gerus kyk na drie besliste voordele van ’n goeie oefenroetine.

Voordeel #1. Oefening versterk jou immuunstelsel. “My pa het altyd gesê: ‘As jy nie tyd maak om oefening te doen nie, moet jy tyd maak om siek te wees’”, sê die 19-jarige Rachel.

Voordeel #2. Oefening stel chemikalieë in die brein vry wat jou kalmeer. “Draf help my om te ontspan wanneer daar baie dinge is wat my pla”, sê Emily, 16. “Ek voel fisies verkwik en emosioneel baie beter.”

Voordeel #3. Oefening kan jou meer pret in die lewe gee. “Ek is lief vir die buitelewe”, sê Ruth, 22, “en daarom sluit my oefening dinge in soos voetslaan, swem, sneeuplankry en fietsry.”

Sleutel tot sukses: Bestee ten minste 20 minute drie keer per week aan ’n strawwe oefening wat jy geniet.

Slaap beter—lewer jou beste!

Die Bybel sê: “’n Hand vol rus is beter as ’n dubbele hand vol harde werk en ’n gejaag na die wind” (Prediker 4:6). As jy nie genoeg slaap kry nie, sal jou energievlakke vinnig daal!

● “As ek nie genoeg slaap kry nie, is ek voos. Ek kan op niks konsentreer nie!”—Rachel, 19.

● “Teen omtrent tweeuur die middag word ek so moeg dat ek maklik in die middel van ’n gesprek aan die slaap kan raak!”—Kristine, 19.

Het jy meer slaap nodig? Kyk wat party van jou portuurs gedoen het.

Vermy laat nagte. “Ek probeer hard om vroeg genoeg in die bed te kom”, sê die 18-jarige Catherine.

Moenie tot laat in die aand klets nie. “Partykeer het vriende my baie laat in die aand gebel of ge-SMS”, sê Richard, 21, “maar ek het onlangs geleer om die gesprek te beëindig en net te gaan slaap.”

Probeer in roetine bly. “Deesdae”, sê die 20-jarige Jennifer, “probeer ek om saans dieselfde tyd te gaan slaap en soggens dieselfde tyd op te staan.”

Sleutel tot sukses: Probeer om elke aand agt tot tien uur lank te slaap.

Aan watter van die drie gebiede wat in hierdie artikel bespreek is, moet jy meer aandag skenk?

◯ dieet ◯ oefening ◯ slaap

Skryf hieronder ’n doelwit neer wat jy kan stel om hierin te verbeter.

․․․․․

Jy kan baie daarby baat vind as jy net ’n paar eenvoudige stappe doen om na jouself om te sien. Onthou, as jy gesond is, sal jy ook gesond lyk, goed voel en jou beste lewer. En anders as sekere dinge in die lewe, is jou fisiese toestand iets waaroor jy wel ’n mate van beheer het. “Op die ou end”, sê die 19-jarige Erin, “hang jou gesondheid net van een persoon af—jy.”

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnote]

IETS OM OOR TE DINK

● Watter uitwerking kan dit op jou selfvertroue hê as jy na jou gesondheid omsien?

● Hoe kan jy redelikheid aan die dag lê wanneer dit by jou gesondheid kom?—Filippense 4:5.

[Venster/Prente op bladsy 13]

WAT JOU PORTUURS SÊ

“Die menseliggaam is soos ’n motor—die eienaar moet dit in stand hou. Dis een rede waarom ek daarvan hou om oefening te doen.”

“As jy ’n maat het wat saam met jou oefening doen, spoor dit jou aan omdat jy die ander persoon nie wil teleurstel nie.”

“Ek hou van hoe ek voel wanneer ek oefening doen. En wanneer ek beter begin lyk as gevolg daarvan, gee dit my baie meer selfvertroue!”

[Prente]

Ethan

Briana

Emily

[Venster op bladsy 14]

“Ek Het My Lewenstyl Verander”

“Toe ek ses jaar oud was, was ek effens mollig. Op daardie stadium het ek nou en dan iets lekkers geëet, maar later het ek heeltyd gepeusel! En ek het nooit enige oefening gedoen nie—ek het nooit daarvan gehou nie. Voor ek my kom kry, was ek ’n oorgewigtiener, iets wat ek nooit wou wees nie. Ek was so ongelukkig met hoe ek gelyk en gevoel het! Van tyd tot tyd het ek probeer gewig verloor met die een of ander spesiale dieet, maar ek het dit altyd weer aangesit. Toe ek 15 was, het ek dus besluit tot hiertoe en nie verder nie. Ek wou gewig verloor op die regte manier—’n manier waarmee ek die res van my lewe kon volhou. Ek het ’n boek gekoop oor die basiese beginsels van dieet en oefening, en ek het wat ek gelees het, in my lewe toegepas. Ek was vasbeslote om nie tou op te gooi nie, selfs al sou ek ‘die pad byster raak’ of mismoedig word. Raai wat? Dit het gewerk! In een jaar het ek 25 kilogram verloor. Dit is nou al twee jaar dat ek my gewig konstant hou. Ek het nooit gedink dit sou gebeur nie! Ek dink dat ek suksesvol was omdat ek nie net ’n dieet gevolg het nie—ek het my lewenstyl verander. Nadat ek die feit aanvaar het dat dit elke aspek van my lewe sou raak, was ek gereed en bereid om die nodige veranderinge aan te bring.”—Catherine, 18.

[Prent op bladsy 14]

Jou gesondheid is soos ’n motor—as jy nie behoorlik daarna omsien nie, sal dit agteruitgaan