Ons beskou die wêreld
Swaarmoedige geboortegolfgenerasie
“Geboortegolfgenerasie” is die woord wat geskep is om mense te beskryf wat tussen die einde van die Tweede Wêreldoorlog en die begin van die sestigerjare gebore is. Gedurende daardie tydperk het baie lande aan die wenkant van die oorlog ’n merkbare bevolkingsaanwas gehad. ’n Opname in 16 lande toon dat die geboortegolfgenerasie, wat vroeër sorgeloos en optimisties oor die toekoms was, nou “onseker voel oor hulleself en hulle kinders en hulle oudag met iets soos vrees tegemoetgaan”, sê die koerant European. Waarom die swaarmoedigheid? “Hulle het nou te kampe met ’n wêreld wat na hulle mening te ver gegaan het wat individualisme, materialisme en die gebrek aan selfbeheersing en goeie maniere betref”, sê die berig.
Verborge hepatitis C-infeksies
“Dit lyk of hepatitis C ’n groot openbare gesondheidsprobleem in Frankryk is”, sê ’n verslag deur ’n span Franse dokters. Die dokters wys daarop dat die meeste hepatitis C-infeksies eers opgespoor word nadat daar reeds vasgestel is dat ’n pasiënt al 10 tot 30 jaar tevore chroniese lewersiekte opgedoen het. Besmetting met die hepatitis C-virus kan dodelik wees en word meestal deur bloedoortappings en binneaarse dwelmgebruik oorgedra. Die verslag waarsku dat deegliker ontledingsmetodes dringend nodig is, aangesien minder as ’n kwart van diegene wat besmet bevind is voorheen daarvan bewus was. Volgens die tydskrif Hepatology word daar geskat dat 500 000 tot 650 000 Franse inwoners op die oomblik met die virus besmet is.
Borsvoeding verminder siektes
“Volgens ’n studie van meer as 1700 babas tussen 2 en 7 maande is borsbabas minder vatbaar vir oorontstekings en diarree”, sê die tydskrif Parents. “Navorsers by die Sentrums vir Siektebeheer en -voorkoming het bevind dat die moontlikheid dat een van hierdie toestande sal ontwikkel byna twee keer groter is vir ’n baba wat uitsluitlik met melkformule gevoed word as vir ’n baba wat uitsluitlik aan die bors gevoed word.” Hoewel dokters al lank meen dat borsmelk babas teen infeksie beskerm omdat dit die moeder se beskermende teenliggaampies oordra, toon die studie dat dit aansienlike voordele inhou. Laurence Grummer-Strawn, ’n samesteller van die studie, sê: “’n Mens kan met sekerheid sê dat hoe meer borsmelk ’n baba in die eerste ses maande ontvang, hoe beter.”
Gaatjies deur die vel skep probleme
Dit is dalk in party lande die gier om gaatjies deur die vel te steek, maar “gaatjies deur die lippe, wange en tong hou meer as net gevare van ontsteking in”, berig The Journal of the American Medical Association. Volgens tandartse by die Tandheelkundige Fakulteit van die Universiteit van Wes-Virginië, in Morgantown, “is pyn, swelling, ontsteking, ’n toename in die vloei van speeksel asook tandvleisbeserings algemeen onder pasiënte wat gaatjies deur hulle lippe, wange of tong laat steek. . . . Juweliersware vir gaatjies deur die lippe, wange of tong hou bykomende gevare in.” Die juweliersware kan stukkies uit tande breek of dit laat kraak, spraakgebreke veroorsaak, littekenweefsel laat vorm en—as dit ingesluk word—lugweë afsluit.
Geen mededinging nie, asseblief
Die Wêreldraad van Kerke (WRK), met 330 lidkerke, het “geëis dat daar ’n einde gemaak word aan die ‘mededingende’ pogings deur party kerke om nuwe lede van ander kerke af te rokkel”, berig die ENI Bulletin. Die WRK “kritiseer veral die gebruik van ‘humanitêre hulp’ in ontwikkelende lande . . . om die armes, eensames en ontworteldes te beïnvloed om na ’n ander kerk oor te gaan”. Riglyne is gegee om onderskeid te tref tussen ’n ‘aanvaarbare getuienis oor die Evangelie en onaanvaarbare proselitisme’. Laasgenoemde sluit in: “onredelike kritiek” van ’n ander kerk, om te sê dat ’n mens se kerk en opvattings die wares is, om opvoedkundige geleenthede of mensliewende hulp aan te bied om ander te oorreed om by ’n ander kerk aan te sluit, die gebruik van geweld of sielkundige druk om mense oor te haal om hulle godsdiens te verander en die uitbuiting van mense se kommer of “ontnugtering oor hulle eie kerk om hulle te ‘bekeer’”.
Woestynvorming in Italië
Hoewel Italië nie ’n land is wat gewoonlik met woestyne vereenselwig word nie, het dit ’n Nasionale Komitee vir die Stryd Teen die Woestyn in die lewe geroep. Die rede? Grondonvrugbaarheid brei vinnig noordwaarts uit in Italië. “As ’n ernstige omgewingsbeleid nie ingebring word om die gasse te verminder wat vir die kweekhuiseffek verantwoordelik is en om sekere ongesonde landbougebruike te verander nie”, sê die koerant La Stampa, “kan 27 persent van [Italiaanse] gebied binne net ’n paar dekades verskroeide aarde word.” Die waarskuwing is gerig by die konferensie oor woestynvorming wat deur die Verenigde Nasies se Voedsel- en Landbou-Organisasie in Rome gehou is. Daar is verduidelik dat gebiede wat in gevaar verkeer nie meer net die suidelike Italiaanse streke Sisilië, Sardinië, Kalabrië, Apulië en Basilicata is nie, maar dat sekere gebiede in die noorde wat gewoonlik produktief is ook geraak is en nou ’n afname in vrugbaarheid toon.
Behandeling van diarree onder kinders
“Venezolaanse navorsers het ’n entstof ontwikkel wat hewige diarree onder kinders feitlik uitskakel”, sê The Daily Journal van Caracas. “Die entstof . . . is bedoel om kinders te beskerm teen rotavirus-diarree, wat elke jaar verantwoordelik is vir die dood van ongeveer 873 000 kinders onder vyf in ontwikkelende lande.” Selfs in die Verenigde State word meer as 100 000 babas en kleuters nog jaarliks in die hospitaal opgeneem weens die siekte. Volgens die studie, wat in The New England Journal of Medicine gepubliseer is, is 88 persent van diegene wat die entstof gebruik het teen die virus beskerm en het dit hospitaalopnames vir hewige diarree met 70 persent verminder. Daar is egter ’n skadusy. “Die behandeling is moontlik te duur vir ontwikkelende lande waar dit die nodigste is”, sê The Daily Journal—lande “waar daar elke jaar minder as $20 [R100] per persoon aan gesondheidsorg bestee word”. Totdat die entstof goedkoop vervaardig kan word, moet ontwatering weens diarree behandel word deur verlore vloeistowwe te vervang, die metode wat al 20 jaar doeltreffend gebruik word.
Tempelkwitansie gevind
Iets wat “lyk of dit ’n kwitansie vir ’n bydrae van drie silwer sikkels tot die Tempel van Jahweh is”, het “onlangs op die mark vir oudhede aan die lig gekom”, sê Biblical Archaeology Review. “Dit is die oudste nie-Bybelse melding van koning Salomo se tempel wat nog ontdek is. [Die woorde] BYT JHWH, ‘die huis van die Here [Jahweh]’, . . . is in sy geheel in net een nie-Bybelse inskripsie gevind”, en omdat die konteks onduidelik is, is die betekenis daarvan omstrede. Die nuwe gegraveerde potskerf, wat 10,9 by 8,6 sentimeter groot is en vyf reëls en 13 woorde bevat, is duidelik en maklik leesbaar. Aangesien dit uit die negende eeu v.G.J. dateer, is dit ten minste ’n eeu ouer as die ander inskripsie, en deskundiges het verklaar dat dit eg is.
Geskil oor koningin van Skeba
In Etiopië word sy Makeda genoem. In Jemen is haar naam Bilqis. Sy is beter bekend as die koningin van Skeba, wat in die Bybel sowel as die Koran gemeld word. Albei lande beweer dat sy van daar afkomstig was en hoop dat haar graf binnekort daar gevind sal word, en hulle spoor argeoloë aan om te bly grawe vir bewyse. As bewyse van die koningin van Skeba gevind kan word, sal die plek ’n baie groot toeriste-aantreklikheid wees en sal dit bewerings staaf van daardie land se eertydse bande met die beskawing. “Argeoloë het baie inskripsies uit die eertydse Sabese koninkryk op ou klippe in Etiopië en Jemen gevind”, sê The Wall Street Journal. “Dit is vreemd dat nie een ’n Makeda of Bilqis meld nie.” Dit voeg by: “Die Bybel help nie veel nie. Dit gee besonderhede van al die goud en speserye wat Skeba vir Salomo gebring het, maar sê nie waar sy vandaan gekom het nie.”
Gyselaar-boekrolle
Die Samaritane, waarvan daar nou net 600 mense oor is, moet met ’n losprys van 4,87 miljoen rand vorendag kom om hulle heilige boeke terug te kry. Die twee boekrolle, wat glo onderskeidelik 700 en 400 jaar oud is, is meer as drie jaar gelede uit ’n Samaritaanse sinagoge in die Wesoewer-stad Nabloes gesteel. Die diewe het die boekrolle uit die land gesmokkel, en dit het eers onlangs in Amman, Jordanië, te voorskyn gekom, waar dit deur Samaritaanse ouer manne besigtig is. Daar word gemeen dat dit gesteel is deur iemand wat vertroud was met die plek waar dit gehou is. Die meeste van die Samaritane woon op die bergtop bo Nabloes, wat hulle heiligste plek is. Hulle glo dat God Abraham daar beveel het om sy seun Isak te offer.
[Foto-erkenning op bladsy 29]
Met vergunning van: Shlomo Moussaieff