‘Hoe bevoordeel julle werk die gemeenskap?’
DIT is die vraag wat Chandrakant Patel, ’n Indiese joernalis, ’n personeellid by die wêreldhoofkwartier van Jehovah se Getuies, in Brooklyn, New York, gevra het. Mnr. Patel het op ’n toer gegaan van die fasiliteite en is so beïndruk deur wat hy gesien en gehoor het dat hy ’n koerantartikel in Goedjarati geskryf het toe hy weer terug was in Indië.
Mnr. Patel het party van die opvattings van Jehovah se Getuies met dié van kerkorganisasies in Indië vergelyk en geskryf dat Jehovah se Getuies in die almagtige God, Jehovah, glo en nie in die Drie-eenheid wat algemeen in die kerke geleer word nie en dat hulle nie beelde in hulle aanbidding gebruik nie. Hy het gemeld dat Jehovah se Getuies hoë beginsels handhaaf omdat hulle streng by die Christelike beginsels bly wat in die Bybel uiteengesit word wat toon dat ’n mens nie egbreuk moet pleeg, aborsie moet ondergaan en jou naaste moet haat of vermoor nie. Hy het die Getuies as vredeliewende, liefdevolle, lankmoedige en diensgerigte mense beskryf, asook onbevrees en ywerig wat die verspreiding van die boodskap van die Bybel aan ander betref.
Watter antwoord het die joernalis van Indië gekry op sy vraag: ‘Hoe bevoordeel julle werk die gemeenskap?’ Hy het geskryf: ‘Die antwoord was dat Bybelopvoeding op alle lewensterreine voordelig is.’ Mnr. Patel wou spesifiek weet wat op die gebied van gesondheidsorg en werkvoorsiening gedoen word. Hy het dele van die verduideliking wat vir hom gegee is, aangehaal en gesê: ‘As ’n mens die skriftuurlike raad volg om weg te bly van skadelike middels soos tabak en dwelms en ’n skoon lewe lei, kan jy verskeie siektes vermy. En hardwerkende, sedelike, eerlike mense het ’n groter kans om werk te kry. Daarbenewens word vreedsame betrekkinge met ander bevorder wanneer ’n mens probleme op ’n vriendelike en liefdevolle manier oplos. Dit is dus tot voordeel van die gemeenskap om mense te leer wat die Bybel sê.’
Hierdie joernalis het gesien hoe Bybelleringe by die wêreldhoofkwartier van Jehovah se Getuies toegepas word. Sy artikel het die sindelikheid en blymoedigheid van die toegewyde vrywilligers by daardie middelpunt van geestelike bedrywigheid beskryf. Jy kan ook by Bybelleringe baat vind. Jehovah se Getuies sal jou met graagte wys hoe jy dit kan doen.
[Foto-erkenning op bladsy 31]
Koerantagtergrond met vergunning van: Naya Padkar, Gujarati Daily published from Anand, India