Van ons lesers

Web van die lewe Ek is 11 jaar oud, en ek is baie lief vir diere. Toe ek die reeks “Wie sal die web van die lewe beskerm?” (22 November 2001) ontvang het, kon ek nie wag om dit te lees nie. Ek voel so jammer vir die grootalbatros, in die foto op bladsy 7. Dit is hartseer dat hulle verdrink omdat hulle per ongeluk met vishoeke gevang word. Ek het ook gehou van die foto van die kleintandsaagvis onderaan die bladsy. Hou asseblief aan om sulke artikels te skryf!

S. V., Verenigde State

Gevangenisse Ek kan nie beskryf hoe ek gevoel het toe ek die artikel “Verhale van geloof uit ’n historiese gevangenis” (22 November 2001) gelees het nie. Ek het ’n seun wat in die tronk is omdat hy ’n bank beroof het. Dit is nou al die tweede keer dat hy in die tronk is. Ek gaan hierdie artikel vir hom stuur. Ek bid dat dit sy hart sal raak en hom sal aanspoor om die liefde te aanvaar wat Jehovah vir ons almal het. Dankie vir die vertroosting wat julle ons gee.

C. M., Verenigde State

Selfmoord Baie dankie vir die reeks “Die lewe is die moeite werd” (22 Oktober 2001). Toe ek in my vroeë tienerjare was, was ek onder baie druk. Jehovah het my werklik ondersteun deur middel van die Bybel en Christenassosiasie. Maar ek het nog steeds onwaardig gevoel. Toe ek die venster “‘Sal God my vergewe omdat ek so voel?’” lees, was dit asof Jehovah direk met my gepraat het. Ek is so bly om te weet dat Jehovah nie mense soos ek vergeet nie!

S. H., Japan

Ek wil vir julle vertel hoe gelukkig ek was nadat ek hierdie reeks gelees het. Ek was so bly dat daar nie vir my gepreek is nie, soos ek verwag het nadat ek die voorbladtitel gesien het! Toe ek die venster “‘Sal God my vergewe omdat ek so voel?’” lees, het my oë vol trane geword. Danksy hierdie artikel was ek in staat om met ’n Christensuster oor my probleme te praat. Dankie dat julle hierdie sensitiewe onderwerp bespreek het.

A. F., Frankryk

Ek het hierdie reeks al agt keer gelees. Toe ek in my vroeë tienerjare was, het ek selfmoord oorweeg. Die dood het vir my aantreklik gelyk. Die reeks het my help besef dat dit goed is om te lewe, al is ek dikwels ongelukkig. Ek is nie een van Jehovah se Getuies nie, maar ek lees nou al ’n geruime tyd Die Wagtoring en Ontwaak! Julle is regtig wonderlik!

S. M., Japan

Mishandelde vroue Dankie vir die reeks “Hulp vir mishandelde vroue” (8 November 2001). Die woorde van die titel op bladsy 3—‘Dalk sal hy dié keer verander’—sê presies waarvoor ek al jare lank hoop. Ek kan beaam wat julle op bladsy 4 sê, dat dit alte dikwels die skuldige party in plaas van die slagoffer is vir wie mense jammer voel.

S. M., Duitsland

Hierdie reeks was werklik hartverblydend. Soos dit ongetwyfeld met baie ander die geval was, het ek van die eerste bladsy af onbedaarlik gehuil omdat ek die swaarkry en pyn onthou het wat ek vroeër verduur het. Ek koester die gedagte dat Jehovah elkeen van ons as kosbaar beskou. As ’n voltydse evangeliedienaar het ek gevind dat die mense in my predikingsgebied so gretig was om hierdie artikel te lees dat ek ekstra tydskrifte moes kry. Baie dankie dat julle sulke waardevolle inligting voorsien.

K. J., Australië

[Foto-erkenning op bladsy 30]

Skoenlapper: Butterfly House, Mittagong, Australia