Ons beskou die wêreld
Wolwe wat visvang
Jare lank is gemeen dat ’n wolf se dieet uitsluitlik uit landdiere soos herte bestaan. Maar volgens Kanada se Vancouver Sun is daar al gesien hoe wolwe in die reënwoude aan die sentrale kus van Brits-Columbië mossels, gapermossels, eendmossels en selfs salm eet—“tot 20 in ’n uur”. Hulle hou ’n vis fyn dop, en dan “spring hulle met een vinnige en dodelike beweging met al vier pote in die water om hulle prooi te vang”. Hulle is sowat 4 uit 10 keer suksesvol. Navorsers is egter dronkgeslaan oor die wolwe se gewoonte om net die kop van die salm te eet. Die navorser Chris Darimont meen dat die kop moontlik noodsaaklike voedingstowwe bevat of dat daar dalk skadelike parasiete in die lyf van die salm is. “Hierdie wolwe verbaas ons voortdurend. Dit laat my wonder hoeveel ander geheime daar in die reënwoud is”, sê Darimont.
Geleer om jong tiranne te wees
“Kinders regeer in ons huise!” sê die Poolse weekblad Wprost. “Dit is hoofsaaklik vir hulle wat ons duur klere, skoonheidsmiddels en moderne toestelle koop. In laer- en middelinkomstegesinne word tot 80 persent van die gesinsbegroting aan tieners bestee.” Die verslag lewer kommentaar oor navorsing wat deur Małgorzata Rimkiewicz van Warskou se Universiteit vir Ouers gedoen is en noem party simptome van tirannieke gedrag onder kinders. Hulle is byvoorbeeld nie dankbaar teenoor hulle ouers nie, maar “wil al hoe meer hê, is ontevrede met wat hulle kry, is aggressief [en] neem ander glad nie in ag nie”. Rimkiewicz sê: “Ons maak verskriklike foute in die manier waarop ons kinders grootmaak en laat selfs klein kindertjies toe om te doen net wat hulle wil.” Die Poolse Vereniging van Sielkundiges stem saam en sê: “Die perke wat ’n tiener erken, hang af van die perke wat vir hom gestel is toe hy tussen een en vier jaar oud was. . . . As ons alle opstandige en aggressiewe gedrag van tieners duld, maak ons eenvoudig tiranne groot.”
Agentskappe wat huwelike opbreek
Party ongelukkige egpare in Japan betaal agentskappe om hulle huwelik op te breek, sê ’n berig in die IHT Asahi Sjimboen, ’n koerant van Tokio. As ’n man van sy vrou ontslae wil raak maar geen gronde vir egskeiding het nie, kan hy ’n agentskap wat huwelike opbreek, betaal om ’n aantreklike man uit te stuur wat die kliënt se vrou “toevallig” ontmoet en ’n verhouding met haar begin. Kort voor lank stem die vrou in tot ’n egskeiding. Die gehuurde minnaar se werk is dan gedoen, en hy verdwyn van die toneel. As ’n vrou van haar man ontslae wil raak, stuur die agentskap ’n mooi jong vrou uit om hom te verlei. Een 24-jarige vrou sê dat die mans wat sy nader, “feitlik nooit nee sê nie. Ek is so 85 tot 90 persent [van die tyd] suksesvol.” Die hoof van een agentskap dank werknemers af wat 3 uit 5 keer misluk, sê die koerant. “Hulle moet sukses behaal”, het hy gesê. Dis ’n besigheid.”
Straatkinders—Waarom?
“Gesinsgeweld is die hoofrede waarom kinders en adolessente die huis verlaat en op straat woon”, sê Brasilië se koerant O Estado de S. Paulo. ’n Onlangse opname onder 1 000 straatkinders wat by Rio de Janeiro se Stigting vir Kinders en Adolessente gehuisves word, het getoon dat 39 persent mishandel is of ooggetuies van gesinskonflikte was. “Hierdie kinders soek na waardigheid en verkeer onder die wanindruk dat hulle dit op straat sal vind”, het die sosioloog Leni Schmitz gesê. Die studie het getoon dat 34 persent straatkinders geword het om loswerkies te doen of te bedel, 10 persent omdat hulle by dwelms betrokke was en 14 persent het eenvoudig gesê dat hulle wou. Volgens die navorsers verberg die laaste rede dikwels ander redes, soos seksuele molestering by die huis. Sowat 71 persent het saam met ander straatkinders gewoon en “hulle eie familiestruktuur geskep deur ander straatkinders broers, ooms, pa’s of ma’s te noem”, het Schmitz gesê.
Sendelinge verruil Christus vir liefdadigheid
“Te veel sendelinge skeep Jesus af.” Hierdie aanhaling het onlangs in die Italiaanse koerant La Stampa verskyn. Pleks van Christus te verkondig, gee sulke sendelinge na bewering voorkeur aan maatskaplike programme wat bedoel is om armoede en lyding te verlig. Volgens ’n Vatikaanstadwebwerf het kardinaal Crescenzio Sepe, prefek van die Vatikaan se Gemeente vir die Evangelisasie van Volke, oor Katolieke sendelinge gesê: “Die groot versoeking in onlangse dekades . . . was om die daadwerklike verkondiging van Christus en die geestelike aspek van sendingwerk ad gentes [onder die volke] te verwaarloos. Dit het daartoe gelei dat party sendelinge hulle bedrywighede beperk het tot ’n soort liefdadigheidswerk sonder enige geestelikheid, ’n soort maatskaplike werk wat, hoewel dit nuttig is, nie die apostoliese karakter het wat so opmerklik in die Handelinge van die Apostels is nie.”
Nog tabakgevare
“Vroue wat selfs net drie sigarette per dag rook, kan die gevaar verdubbel dat hulle hartsiekte sal kry en vroeg sal sterf”, berig The Daily Telegraph van Londen. ’n Twintig jaar lange studie onder 12 000 Deense mans en vroue het vir die eerste keer getoon dat dit gevaarlik is om selfs net ’n paar sigarette per dag te rook. Ook vir diegene wat nie die rook intrek nie, was daar ’n groter gesondheidsgevaar. Amanda Sandford, woordvoerster vir die Taakgroep oor Rook en Gesondheid, het gesê dat “rokers heeltemal moet ophou rook” in die lig van wat hierdie studie getoon het. In ’n ander studie waaroor The Times van Londen berig het, het dokters by die Mediese Fakulteit van die Universiteit van Atene in Griekeland gevind dat gereelde blootstelling van net 30 minute per dag aan iemand anders se tabakrook (wat volgens skatting dieselfde is as om een sigaret te rook) die gevaar van hartsiekte by mans wat nie rook nie, met 47 persent kan laat toeneem en met 56 persent by vroue.
Strande net vir bedreigde robbe
Volgens die Internasionale Unie vir die Bewaring van die Natuur en Natuurlike Hulpbronne is die Mediterreense monnikrob sedert 1996 onder die wêreld se tien mees bedreigde diere. Daar is nog tussen 400 en 600 van hierdie robbe in die natuur oor. Hulle getalle het afgeneem toe hulle teikens vir jagters geword het en per ongeluk deur vissers doodgemaak is. Later is hulle habitat as gevolg van toerisme en ontwikkeling vernietig, verduidelik die Spaanse koerant El País. Die robbe het dus in grotte gaan woon. Maar gedurende storms verander brekende branders die grotte in lewensgevaarlike plekke vir robbewelpies. Nou werk die regerings van Spanje en Mauritanië saam om ’n beskermde strandgebied naby die grotte en kranse by Cabo Blanco aan die Atlantiese kus van Wes-Sahara vir hulle opsy te sit. Hierdie gebied is die tuiste van 150 monnikrobbe, wat die grootste groep is. Versteuring deur mense sal blykbaar tot ’n minimum beperk word.
Plastieknote
In Oktober 2002 het Mexiko ook een van die lande geword wat geld gebruik wat van plastiek gemaak word. Papiernote word geleidelik deur plastieknote vervang. Volgens die koerant El Universal word plastieknote reeds in Australië, Brasilië, Nieu-Seeland en Roemenië gebruik. Papiergeld het sy oorsprong by die Chinese gehad, maar die Australiërs het die polimeer ontwikkel waarvan hierdie nuwe note gemaak word, berig die koerant. Plastieknote het verskeie voordele. Dit is nie net skoner nie, maar “hou ook vier keer langer as papiernote, is meer bestand teen algemene gebruik, . . . is moeiliker om te vervals en kan herbenut word as dit nie meer in ’n bruikbare toestand is nie”.