Jongmense vra . . .

Waarom moet ek fisiese werk doen?

“Ek het nooit regtig gedink dat ek veel fisiese werk sou doen nie. Dit was vir my lekkerder om met my rekenaar te speel.”—Nathan.

“Party kinders het neergesien op dié van ons wat fisiese werk gedoen het, asof ons nie slim genoeg was om enigiets anders te doen nie.”—Sarah.

FISIESE WERK—baie beskou dit as vervelige, onaangename en vuil werk. ’n Professor in ekonomie sê aangaande bloukraagwerk: “Daardie soort beroepe geniet nie ’n hoë status in hierdie wêreld wat so statusbewus is nie.” Dit is dus geen wonder nie dat baie jongmense hulle neus optrek vir die blote gedagte dat hulle fisiese werk moet doen.

Die Bybel bevorder egter ’n heel ander beskouing van harde werk. Koning Salomo het gesê: “Vir ’n mens is daar niks beters nie as dat hy eet en inderdaad drink en sy siel die goeie laat sien weens sy harde werk” (Prediker 2:24). In Bybeltye was Israel ’n landbougemeenskap. Ploeg-, oes- en dorswerk het alles groot fisiese inspanning geverg. Tog het Salomo gesê dat harde werk ryk seëninge kan meebring.

Eeue later het die apostel Paulus gesê: “Laat die steler nie meer steel nie, maar laat hom liewer hard werk deur met sy hande goeie werk te doen” (Efesiërs 4:28). Paulus het geweet wat dit beteken om met sy hande te werk. Hoewel hy ’n hooggeleerde man was, het hy hom by tye onderhou deur tente te maak.—Handelinge 18:1-3.

Hoe voel jy daaroor om met jou hande te werk? Of jy dit besef of nie, fisiese werk kan jou op baie maniere tot voordeel strek.

Opleiding vir die lewe

As jy jou inspan om fisiese werk te doen—of jy nou ’n hamer swaai of ’n grasperk sny—kan dit goeie gesondheid bevorder. Maar fisiese werk hou jou nie net fiks en gesond nie. Weet jy hoe om ’n pap wiel om te ruil of om ’n motor se olie te vervang? Kan jy ’n stukkende venster vervang of ’n verstopte drein oopmaak? Kan jy kook? Kan jy ’n badkamer skoonmaak sodat dit silwerskoon en higiënies is? Dit is vaardighede wat jong mans sowel as jong vroue goed te staan sal kom, vaardighede wat jou kan help om eendag suksesvol op jou eie te lewe.

Dit is interessant dat Jesus Christus sekere vaardighede geleer het terwyl hy hier op die aarde was. Hy het geleer om ’n timmerman te wees—ongetwyfeld by sy pleegvader Josef—aangesien hy die timmerman genoem is (Matteus 13:55; Markus 6:3). Jy kan ook verskillende nuttige vaardighede aanleer deur met jou hande te werk.

Dit bou karakter

Harde werk kan ook ’n uitwerking hê op hoe jy oor jouself voel. In ’n verslag deur die Amerikaanse Nasionale Geestesgesondheid- en Opvoedkundige Sentrum sê dr. Fred Provenzano dat dit jou “gevoel van eiewaarde en algemene vertroue” kan laat toeneem en “selfdissipline en organisasie, wat die grondslag van suksesvolle werk is, kan bevorder” as jy leer hoe om fisiese take te doen. ’n Jong man met die naam John sê: “Fisiese werk help jou om geduld aan te leer. Jy leer hoe om probleme deur te werk.”

Sarah, wat vroeër aangehaal is, verduidelik: “Deur fisiese werk te doen, het ek geleer om hardwerkend en ywerig te wees. Ek het geleer om verstandelik sowel as fisies gedissiplineerd te wees.” Is harde werk noodwendig sleurwerk? Nathan sê: “Ek het geleer om handearbeid te geniet. Namate ek meer bedrewe geword het, het ek gesien hoe die gehalte van my werk verbeter. Dit het my eiewaarde laat toeneem.”

Fisiese werk kan jou ook die eenvoudige genot laat ervaar om iets te bereik. ’n Jong man met die naam James stel dit so: “Ek geniet dit om houtwerk te doen. Hoewel dit soms fisies uitputtend kan wees, kan ek altyd kyk na wat ek gemaak het en voel dat ek iets bereik het. Dit is werklik vervullend.” Brian voel dieselfde. “Ek geniet dit om aan motors te werk. Die wete dat ek iets kan regmaak wat stukkend is en dit so goed soos nuut kan maak, gee my selfvertroue en ’n gevoel van bevrediging.”

Heilige diens

Harde werk kan Christenjongmense help in hulle diens aan God. Toe koning Salomo die toewysing gegee is om ’n luisterryke tempel vir Jehovah te bou, het hy besef dat die taak ’n ontsaglike hoeveelheid inspanning en vaardigheid sou verg. Die Bybel sê: “Koning Salomo het gestuur en Hiram uit Tirus laat haal. Hy was die seun van ’n weduwee uit die stam Naftali, en sy vader was ’n Tiriër, ’n bewerker van koper; en hy was vol wysheid en begrip en kennis om enige soort werk in koper te doen. En hy het na koning Salomo toe gekom en al sy werk begin doen.”—1 Konings 7:13, 14.

Wat ’n voorreg was dit tog vir Hiram om sy vaardighede te gebruik om Jehovah se aanbidding te bevorder! Hiram se ondervinding beklemtoon die waarheid van die Bybel se woorde in Spreuke 22:29: “Het jy ’n man gesien wat vaardig is in sy werk? Voor konings sal hy staan; hy sal nie voor gewone mense staan nie.”

Vandag het jongmense wat min of geen bouvaardighede het nie, al die voorreg geniet om te help met die bou van Koninkryksale. Weens hulle betrokkenheid by hierdie projekte het party nuttige ambagte geleer, soos elektriese, loodgieters-, messel- en houtwerk. Miskien kan jy met jou plaaslike ouer manne bespreek of jy ook kan help om Koninkryksale te bou.

James, wat al aan etlike Koninkryksale gewerk het, sê: “Baie in die gemeentes het moontlik nie die tyd of vaardighede om te help nie. Deur jou dienste aan te bied, help jy dus ’n hele gemeente.” Nathan, wat geleer het om met beton te werk, het gevind dat hierdie vaardigheid tot verdere voorregte in sy diens aan God gelei het. Hy sê: “Ek het na Zimbabwe gereis en my vaardighede gebruik om te help met die bou van ’n takkantoor van Jehovah se Getuies. Ek het drie maande lank daar gewerk, en dit was een van die beste ondervindinge in my lewe.” Ander jongmense is deur ’n begeerte om hard te werk, gemotiveer om aansoek te doen om as vrywillige werkers by die plaaslike takkantoor van Jehovah se Getuies te dien.

As jy vaardig word in fisiese werk, kan dit jou ook help om ’n mate van “vergenoegdheid” te hê (1 Timoteus 6:6). Baie jongmense onder Jehovah se Getuies dien as pioniers, of voltydse evangeliedienaars. Omdat hulle ’n ambag geleer het, kan hulle hulle finansieel onderhou sonder om baie tyd en geld aan sekulêre opvoeding te bestee.

Hoe om te leer

Dit is duidelik dat ’n mens daarby kan baat vind as jy leer om fisiese werk te doen, of jy nou jou as ’n ambagsman wil onderhou of net in en om die huis wil help. Moontlik bied jou plaaslike skool kursusse in sekere ambagte aan. Jy kan waarskynlik van jou opleiding by die huis ontvang. Hoe? Deur te leer om huishoudelike takies te verrig. Dr. Provenzano, wat vroeër aangehaal is, skryf: “Dit is veral belangrik dat tieners leer om takies te verrig, want hulle leer dan basiese huishoudelike ‘oorlewingsvaardighede’ wat hulle sal help om suksesvol sonder hulle ouers oor die weg te kom wanneer die tyd daarvoor aanbreek.” Wees dus op die uitkyk vir dinge wat by die huis gedoen moet word. Moet die grasperk gesny word of is daar ’n rak wat reggemaak moet word?

Fisiese werk is glad nie vernederend nie; inteendeel, dit kan jou op baie maniere tot voordeel strek. Moenie van handearbeid wegskram nie! Probeer eerder om ‘die goeie te sien’ vir al jou harde werk, want Prediker 3:13 sê: “Dit is die gawe van God.”

[Lokteks op bladsy 21]

Talle jongmense is gehelp om hulle diens aan God uit te brei deur ’n ambag aan te leer

[Prente op bladsy 22]

Dikwels kan jy basiese vaardighede by jou ouers leer