Waarheen is hierdie wêreld op pad?
WAT sal die volgende 10, 20 of 30 jaar bring? Dit kan skrikwekkend wees om in hierdie tyd van terrorisme aan die toekoms te dink. Die tegnologie beleef ’n bloeitydperk. Globalisasie het baie nasies onderling afhanklik gemaak. Sal wêreldleiers saamstaan en die weg baan tot ’n beter môre? Party mense sê ja, in die hoop dat leiers teen 2015 die toename in armoede en honger sal kan stuit, ’n ommekeer in die verspreiding van vigs sal kan teweegbring en die persentasie van mense sonder toegang tot veilige drinkwater en sanitasie sal kan halveer.—Sien die venster “Optimisme versus die werklikheid”.
Maar die mens se toekomsverwagtinge is dikwels blote illusies. Byvoorbeeld, dekades gelede het ’n deskundige gesê dat boere teen 1984 die oseaanvloer met onderwatertrekkers sou ploeg; ’n ander een het gesê dat motors teen 1995 met rekenaarapparatuur toegerus sou wees wat ongelukke sou voorkom, en nog een het voorspel dat daar teen 2000 sowat 50 000 mense sou wees wat in die ruimte woon en werk. Diegene wat sulke voorspellings gemaak het, wens waarskynlik nou dat hulle eerder stilgebly het. ’n Joernalis het geskryf: “Daar is min dinge wat die wêreld se slimste mense soveel na volslae idiote kan laat lyk as die verloop van tyd.”
’n “Kaart” om ons te rig
Mense spekuleer voortdurend oor die toekoms, maar soms is hulle verwagtinge meer idealisties as realisties. Waarheen kan ons ons wend vir betroubare inligting oor die toekoms?
Dink aan hierdie illustrasie. Verbeel jou dat jy in ’n bus deur ’n vreemde land ry. Omdat die gebied onbekend is, begin jy onrustig voel. ‘Presies waar is ek?’ wonder jy. ‘Ry hierdie bus werklik in die regte rigting? Hoe ver is ek van my bestemming af?’ Deur ’n akkurate padkaart te raadpleeg en die tekens buite dop te hou, kan jy die antwoorde op jou vrae vind.
Die situasie is vandag soortgelyk vir baie wat angstig voel wanneer hulle aan die toekoms dink. ‘Waarheen is ons op pad?’ wonder hulle. ‘Is ons werklik op die weg na wêreldvrede? Indien wel, wanneer sal ons daardie bestemming bereik?’ Die Bybel is soos ’n padkaart wat ons kan help om daardie vrae te beantwoord. Deur dit sorgvuldig te bestudeer—en deur gebeure op die wêreldtoneel noukeurig dop te hou—kan ons baie leer omtrent waar ons tans is en waarheen ons op pad is. Maar eers moet ons kyk na hoe ons probleme begin het.
’n Tragiese beginpunt
Die Bybel sê vir ons dat die eerste man en vrou volmaak was toe God hulle geskep het en dat Hy hulle in ’n paradysagtige omgewing geplaas het. Adam en Eva is gemaak om vir ewig te lewe—nie net 70 of 80 jaar lank nie. God het vir hulle gesê: “Wees vrugbaar en word baie en vul die aarde en onderwerp dit.” God se voorneme was dat Adam en Eva en hulle nakomelinge die Paradys tot alle dele van die aarde uitbrei.—Genesis 1:28; 2:8, 15, 22.
Adam en Eva het egter teen God in opstand gekom. Daarom het hulle hulle Paradystuiste verloor. Wat meer is, hulle het stadig maar seker fisies en verstandelik begin agteruitgaan. Adam en Eva het elke dag ’n bietjie nader aan die graf gekom. Waarom? Omdat hulle gesondig het toe hulle teen hulle Skepper gedraai het, en “die loon wat die sonde betaal, is die dood”.—Romeine 6:23.
Adam en Eva het uiteindelik gesterf, maar nie voordat hulle ’n aantal seuns en dogters gehad het nie. Sou hierdie kinders in staat wees om God se oorspronklike voorneme uit te voer? Nee, want hulle het hulle ouers se onvolmaaktheid geërf. Trouens, al Adam se nakomelinge het, van die een geslag na die ander, sonde en die dood geërf. Ons het ook. ‘Deur een mens’, sê die Bybel, ‘het die sonde in die wêreld ingekom en die dood deur die sonde, en die dood het só tot alle mense deurgedring omdat hulle almal gesondig het.’—Romeine 3:23; 5:12.
Waar ons tans is
Die opstand van Adam en Eva was die begin van ’n lang en bitter reis wat nog tot in ons dag voortduur. Soos een Bybelskrywer dit gestel het, is die mensdom “aan nietigheid onderwerp” (Romeine 8:20). Wat ’n gepaste beskrywing van die mensdom se stryd! Hoewel daar al briljante wetenskaplikes, begaafde geneeskundiges en baanbrekers op die gebied van die tegnologie onder Adam se nakomelinge was, kon nie een van hulle tot nou toe die wêreldvrede en volmaakte gesondheid teweegbring wat God vir die mensdom in gedagte het nie.
Die opstand van Adam en Eva raak elkeen van ons persoonlik. Wie het byvoorbeeld nog nie die pynlike gevolge van ’n onreg, die vrees wat veroorsaak word deur misdaad, die pyn van ’n chroniese siekte of die intense droefheid by die dood van ’n geliefde ervaar nie? Dit lyk asof enige kalmte in ons lewe vinnig deur tragedies versteur word. Al geniet ons soms aangename oomblikke, is ons lewe presies soos die eertydse aartsvader Job dit beskryf het toe hy gesê het: “Die mens . . . lewe ’n kort rukkie en is sat van ontsteltenis.”—Job 14:1.
As ons dink aan waar ons vandaan kom en aan die jammerlike toestand waarin ons ons nou bevind, lyk die toekoms dalk somber. Die Bybel verseker ons egter dat God nie sal toelaat dat hierdie toestande vir ewig voortduur nie. Sy oorspronklike voorneme vir die mens sal verwesenlik word (Jesaja 55:10, 11). Waarom kan ons seker wees dat dit in die nabye toekoms sal gebeur?
Volgens die Bybel gaan ons tans deur ’n kritieke tydperk wat “die laaste dae” genoem word (2 Timoteus 3:1). Hierdie frase dui nie op die einde van die planeet Aarde en van alle lewe daarop nie. Dit beteken eerder “die voleinding van die stelsel van dinge” en derhalwe die einde van die toestande wat ons bedroef maak (Matteus 24:3). Die Bybel beskryf die toestande en die karaktertrekke van mense wat gedurende die laaste dae algemeen sou wees. Let op na party hiervan in die venster op bladsy 8 en kyk dan na wat jy in die wêreld om jou sien. Ons kaart, die Bybel, help ons om duidelik te sien dat ons baie na aan die einde van hierdie stelsel van dinge is. Maar wat sal daarna gebeur?
Die pad wat voorlê
Onmiddellik nadat Adam en Eva in opstand gekom het, het God sy voorneme begin openbaar om ’n Koninkryk op te rig “wat nooit vernietig sal word nie” (Daniël 2:44). Daardie Koninkryk, waarvoor baie mense geleer is om te bid in wat algemeen as die Onse Vader bekend staan, sal ongekende seëninge vir die mensdom meebring.—Matteus 6:9, 10.
God se Koninkryk is nie ’n wasige konsep wat in mense se harte bestaan nie. Dit is ’n werklike hemelse regering wat ingrypende veranderinge op die aarde sal teweegbring. Dink net aan wat God belowe om deur middel van sy Koninkryk vir mense te doen. Die Bybel sê dat God eers “die verderwers van die aarde [sal] verderf” (Openbaring 11:18). Wat sal hy doen vir diegene wat gehoorsaam is aan hom? Sy geskrewe Woord sê hy “sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie” (Openbaring 21:4). Watter mens sal ooit hierdie dinge kan teweegbring? Net God kan vir ons die toestande gee wat hy oorspronklik in gedagte gehad het vir die mensdom.
Hoe kan jy baat vind by die seëninge wat God se Koninkryk sal bring? Johannes 17:3 sê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus.” Jehovah se Getuies is betrokke by ’n wêreldwye onderrigtingsprogram wat mense help om juis dit te doen. Hulle bediening word in sowat 230 lande uitgevoer en hulle lektuur word in meer as 400 tale uitgegee. As jy graag meer wil leer, kan jy in verbinding tree met Jehovah se Getuies in jou omgewing of na die gepaste adres op bladsy 5 skryf.
[Lokteks op bladsy 6]
“Luister na my, julle wat sê: ‘Vandag of môre sal ons na ’n sekere stad reis, waar ons ’n jaar sal deurbring en sake sal begin doen en ’n klomp geld sal maak.’ Julle weet nie eers wat julle lewe môre sal wees nie!”—Jakobus 4:13, 14, Today’s English Version
[Lokteks op bladsy 6]
Die Bybel voer die geskiedenis van die mensdom terug tot by die eerste man en vrou. Dit sê dus vir ons waar ons vandaan kom. Dit dui ook aan waarheen ons op pad is. Maar om te verstaan wat die Bybel vir ons sê, moet ons dit noukeurig bestudeer, soos ons met ’n padkaart sou doen
[Lokteks op bladsy 7]
“Sonde” kan verwys na ’n verkeerde daad of na ’n geneigdheid om kwaad te doen. Ons is in ’n sondige toestand gebore, wat ons dade beïnvloed. “Daar is geen mens regverdig op die aarde wat voortdurend goed doen en nie sondig nie.”—Prediker 7:20
[Lokteks op bladsy 8]
As jy ’n vel papier met ’n donker merk daarop fotokopieer, sal daardie merk op al die kopieë verskyn. Ons, as Adam se nakomelinge—as ’t ware kopieë—het die merk van sonde op ons. Dit is dieselfde merk wat op Adam, die “oorspronklike”, was
[Lokteks op bladsy 8]
Die Bybel sê: “Dit behoort nie aan die mens wat loop om sy voetstappe te rig nie” (Jeremia 10:23). Dit verklaar waarom die mens se pogings om wêreldvrede teweeg te bring, misluk het. Hy is nie geskep om onafhanklik van God “sy voetstappe te rig” nie
[Lokteks op bladsy 9]
Die Bybelpsalmis het vir God gesê: “U woord is ’n lamp vir my voet en ’n lig vir my pad” (Psalm 119:105). Soos ’n lamp, help die Bybel ons om ’n wyse koers in te slaan wanneer ons voor besluite te staan kom. As ’n ‘lig vir ons pad’ verhelder dit die weg vorentoe sodat ons kan sien wat die toekoms vir die mensdom inhou
[Venster op bladsy 7]
Optimisme Versus Die Werklikheid
In September 2000 het lidlande van die Verenigde Nasies eenparig besluit op ’n aantal doelwitte wat teen 2015 bereik moet word. Dit het die volgende ingesluit:
◼ Halveer die persentasie van mense wat met minder as ’n dollar per dag moet klaarkom asook die persentasie van diegene wat honger ly.
◼ Verseker dat alle kinders hulle laerskoolopleiding voltooi.
◼ Elimineer geslagsongelykheid op alle opvoedingsvlakke.
◼ Verminder met twee derdes die sterftesyfer onder kinders jonger as vyf jaar.
◼ Verminder die sterftesyfer onder moeders met 75 persent.
◼ Stop die verspreiding van MIV/vigs en keer die tendens om; doen dieselfde met ander vername siektes soos malaria.
◼ Verminder met 50 persent die aantal mense wat nie toegang het tot veilige drinkwater nie.
Kan hierdie doelwitte bereik word? Nadat ’n paneel van gesondheidsamptenare van oor die hele wêreld die situasie weer in 2004 geëvalueer het, het hulle tot die gevolgtrekking gekom dat optimisme getemper moet word met die besef dat die verwagte vordering tot dusver nie die ware toedrag van sake weerspieël nie. Die voorwoord by die boek State of the World 2005 sê: “Armoede belemmer steeds vooruitgang op baie gebiede. Siektes soos MIV/vigs neem toe en skep tydbomme vir die openbare gesondheid van baie lande. Oor die afgelope vyf jaar het sowat 20 miljoen kinders gesterf weens voorkombare watergedrae siektes, en honderdmiljoene mense moet steeds saamleef met die ellendige en onhigiëniese toestande wat met ’n gebrek aan skoon drinkwater en voldoende sanitasie gepaardgaan.”
[Venster/Prente op bladsy 8, 9]
PARTY KENMERKE VAN “DIE LAASTE DAE”
Ongeëwenaarde oorlogvoering.—Matteus 24:7; Openbaring 6:4.
Hongersnood.—Matteus 24:7; Openbaring 6:5, 6, 8.
Pessiektes.—Lukas 21:11; Openbaring 6:8.
Toenemende wetteloosheid.—Matteus 24:12.
Verderwing van die aarde.—Openbaring 11:18.
Groot aardbewings.—Lukas 21:11.
Kritieke tye wat moeilik is om deur te kom.—2 Timoteus 3:1.
Oordrewe liefde vir geld.—2 Timoteus 3:2.
Ongehoorsaamheid aan ouers.—2 Timoteus 3:2.
Gebrek aan natuurlike geneentheid.—2 Timoteus 3:3.
Liefde vir genot eerder as vir God.—2 Timoteus 3:4.
Gebrek aan selfbeheersing.—2 Timoteus 3:3.
Sonder liefde vir die goeie.—2 Timoteus 3:3.
Mense slaan geen ag op die naderende gevaar nie.—Matteus 24:39.
Spotters verwerp bewyse van die laaste dae.—2 Petrus 3:3, 4.
Wêreldwye verkondiging van God se Koninkryk.—Matteus 24:14.
[Erkennings]
© G.M.B. Akash/Panos Pictures
© Paul Lowe/Panos Pictures
[Prent op bladsy 9]
Jehovah se Getuies is daarvoor bekend dat hulle die goeie nuus van God se Koninkryk verkondig