Die byna onvernietigbare mosbeertjie
DEUR ONTWAAK!-MEDEWERKER IN JAPAN
◼ JY KAN in amper enige soort vogtige habitat in die wêreld soek—mos, ys, stroombeddings, warmwaterbronne, mere, oseane en dalk selfs jou eie agterplaas—en jy sal heel moontlik ’n mosbeertjie, een van die taaiste diertjies in die ganse skepping, vind. ’n Mosbeertjie is so klein dat dit skaars sigbaar is en het ’n kort liggaam van vier segmente wat bedek is met ’n beskermende huid, en agt ledemate met kloue aan elke punt. Sy vorm en manier van loop is oor die algemeen soos dié van ’n beer, en daarom word hy ’n mosbeertjie genoem.
Mosbeertjies is traaglopers. Honderde spesies is bekend, en wyfies lê tussen 1 en 30 eiers op ’n slag. Tienduisende van hierdie klein diertjies kan in slegs ’n paar handevol nat sand of grond gevind word. ’n Besonder goeie plek om hulle te vind, is in mos wat op dakke groei.
Mosbeertjies kan uiterste toestande oorleef. “Van hierdie diertjies wat agt dae lank in ’n lugleegte gehou is, vir drie dae in heliumgas by kamertemperatuur geplaas is en toe etlike ure lank aan ’n temperatuur van -272°C (-458°F) blootgestel is, het weer lewend geword toe hulle in kamertemperatuur teruggeplaas is”, sê die Encyclopædia Britannica. Hulle kan ook honderde kere die hoeveelheid X-straal-blootstelling oorleefwat ’n mens sou doodmaak. En hulle sal, ten minste teoreties gesproke, dalk ’n tyd lank selfs in die lugleegte van die buitenste ruim kan oorleef!
Hulle geheim is dat hulle die vermoë het om in ’n doodse toestand te gaan waartydens hulle metabolisme vertraag word tot minder as 0,01 persent van die normale—feitlik onbespeurbaar! Om in hierdie toestand in te gaan, trek hulle hulle bene in hulle lyf in, vervang hulle verlore water met ’n spesiale suiker en krul hulle op in ’n piepklein, wasbedekte balletjie wat ’n tun genoem word. Wanneer normale, vogtige toestande terugkeer, word hulle binne ’n paar minute tot ’n paar uur weer aktief. In een geval is mosbeertjies ná ’n skyndood van 100 jaar suksesvol “lewend gemaak”!
Ja, op hulle eie stil maar wonderlike manier loof hierdie “kruipende diere” Jehovah.—Psalm 148:10, 13.
[Foto-erkenning op bladsy 30]
© Diane Nelson/Visuals Unlimited