Jongmense vra . . .

Sê nou iemand vra my om seks te hê?

“Kinders kom bymekaar net om te sien hoe ver hulle kan gaan en met hoeveel mense hulle seks kan hê.”—Penny.a

“Seuns praat openlik daaroor. Hulle spog dat hulle ’n meisie het, maar nog steeds met baie ander meisies seks het.”—Edward.

“Diegene wat my gevra het om met hulle seks te hê, was baie reguit daaroor. Om vir hulle nee te sê, keer hulle nie!”—Ida.

IN PARTY lande word dit hookups genoem. Op ander plekke staan dit onder ’n ander term bekend. In Suid-Afrika praat sommige jongmense byvoorbeeld van “bymekaarkom”. Akiko, ’n jong vrou in Japan, sê: “Daar is ook die term sefre, wat ‘seksvriend’ beteken.” “Die enigste rede waarom hulle vriende is, is om seks te hê.”

Wat dit ook al genoem word, die betekenis is dieselfde—losse seks sonder enige emosionele verbintenis.b Party jongmense spog selfs dat hulle sogenoemde “vriende met byvoordele” het—kennisse met wie hulle seks kan hê sonder die “komplikasie” van ’n langtermynverhouding. “Wanneer mense ‘bymekaarkom’, gaan dit oor onmiddellike bevrediging”, sê een jong vrou. “Jy kry wat jy wil hê, en dan kan jy wegloop.”

As ’n Christen moet jy “vlug vir die hoerery” (1 Korintiërs 6:18).c As jy dit weet, probeer jy waarskynlik om situasies te vermy wat jou in die versoeking sal stel. Maar soms kom die versoeking na jou toe. “By die skool het baie seuns my al gevra om met hulle seks te hê”, sê Cindy. Dieselfde kan by die werk gebeur. “My bestuurder het my gevra om met hom seks te hê”, sê Margaret. “Hy het so aangehou dat ek uiteindelik moes bedank!”

Aan die ander kant moet jy nie verbaas wees as deel van jou dit wil doen nie. “Die hart is verraderliker as enigiets anders en is desperaat”, sê die Bybel (Jeremia 17:9). ’n Meisie met die naam Lourdes het gevind dat dit waar is. “Ek het gehou van die ou wat my gevra het om met hom seks te hê”, erken sy. Jane het iets soortgelyks ondervind. “Sterk emosies het by my opgekom”, sê sy. “Om nee te sê, was een van die moeilikste dinge wat ek nog ooit moes doen.” Edward, wat vroeër aangehaal is, erken ook dat dit nie maklik is om kuis te bly nie. “Baie meisies het al aangebied om met my seks te hê, en om dit te weerstaan, is die moeilikste stryd wat ek as ’n Christen het”, sê hy. “Dis moeilik om nee te sê!”

As jy al soos Lourdes, Jane en Edward gevoel het, maar gedoen het wat reg is in Jehovah God se oë, moet jy daarvoor geprys word. Dit sal jou dalk vertroos om te weet dat die apostel Paulus ook ’n aanhoudende stryd teen verkeerde neigings gevoer het.—Romeine 7:21-24.

Watter Bybelbeginsels moet jy in gedagte hou as jy gevra word om losse seks te hê?

Weet waarom losse seks verkeerd is

Die Bybel veroordeel geslagsomgang buite die huwelik. Om die waarheid te sê, hoerery is so ’n ernstige sonde dat diegene wat dit beoefen, ‘nie God se koninkryk sal beërf nie’ (1 Korintiërs 6:9, 10). Om die versoeking te weerstaan om jou aan losse seks skuldig te maak, moet jy Jehovah se beskouing daarvan hê. Dit moet jou keuse wees om kuis te bly.

“Ek glo vas dat Jehovah se weg die beste weg is om te volg.”—Karen, Kanada.

“’n Mens verloor baie wanneer jy Jehovah se sedewette ignoreer vir net ’n paar oomblikke van genot.”—Vivian, Mexiko.

“Onthou, jy is iemand se seun of dogter, baie mense se vriend en deel van ’n gemeente. Jy sal al hierdie mense teleurstel as jy voor versoeking swig!”—Peter, Brittanje.

Die apostel Paulus het geskryf: “Hou aan om seker te maak van wat vir die Here aanneemlik is” (Efesiërs 5:10). As jy Jehovah se beskouing van hoerery verkry, sal jy in staat wees om ‘die kwaad te haat’, al is dit dalk vir die onvolmaakte vlees aanloklik.—Psalm 97:10.

◼ Voorgestelde leesgedeelte: Genesis 39:7-9. Let op die moedige standpunt wat Josef teen seksuele versoeking ingeneem het en wat hom in staat gestel het om dit te weerstaan.

Wees trots op jou oortuigings

Dit is nie ongewoon vir jongmense om met trots standpunt in te neem vir ’n saak waarin hulle glo en dit te verdedig nie. As ’n Christen is dit jou voorreg om God se naam deur jou voorbeeldige gedrag te verdedig. Moenie skaam wees oor jou nie-onderhandelbare beskouing van voorhuwelikse seks nie.

“Maak dit van die begin af duidelik dat jy sedelike beginsels het.”—Allen, Duitsland.

“Moenie verskoning vra vir wat jy glo nie.”—Esther, Nigerië.

“Jou portuurs sal nie jou standpunt oor losse seks respekteer as jy iets sê soos: ‘My ouers sal my nie toelaat om met iemand uit te gaan nie.’ Jy moet hulle laat verstaan dat jy nie daarin belangstel om met hulle uit te gaan nie.”—Janet, Suid-Afrika.

“Die seuns saam met wie ek hoërskool toe gegaan het, het geweet wie ek is en dat hulle hulle asem sou mors as hulle enigiets voorstel.”—Vicky, Verenigde State.

As jy ’n standpunt vir jou oortuigings inneem, is dit ’n teken dat jy ’n volwasse Christen word.—1 Korintiërs 14:20.

◼ Voorgestelde leesgedeelte: Spreuke 27:11. Sien hoe jou optrede in werklikheid die grootste saak van alle tye kan verdedig—die heiliging van Jehovah se naam!

Wees ferm!

Dit is belangrik om nee te sê. Maar party sal dit dalk misverstaan en dink dat jy net maak asof jy nie belangstel nie.

“As jy nee sê, kan iemand dit as ’n uitdaging beskou, ’n struikelblok wat oorkom moet word; dit spoor hom net aan.”—Lauren, Kanada.

“Alles omtrent jou—insluitende hoe jy aantrek, hoe jy praat, met wie jy praat en jou interaksie met ander—moet wys dat jy glad nie belangstel nie.”—Joy, Nigerië.

“Jy moet ferm en uitdruklik nee sê.”—Daniel, Australië.

“Wees sterk! Toe ’n jong man ’n suggestiewe voorstel aan my gemaak het, het ek gesê: ‘Haal jou hand van my skouer af!’ en ek het weggeloop met ’n ernstige uitdrukking op my gesig.”—Ellen, Brittanje.

“Jy moet reguit wees en sê dat jy nie belangstel nie en nooit sal belangstel nie. Dit is nie nou die tyd om saggeaard voor te kom nie!”—Jean, Skotland.

“Een seun het my aanhoudend lastig geval met uitnodigings en spottende opmerkings. Die tyd het gekom toe ek uiters ferm moes wees. Eers toe het die teistering opgehou.”—Juanita, Mexiko.

“Jy moet dit duidelik maak dat dit nooit gaan gebeur nie. Moet nooit geskenke aanvaar van seuns wat jou probeer oorreed om seks met hulle te hê nie. Hulle kan dit teen jou gebruik, asof jy hulle iets daarvoor skuld.”—Lara, Brittanje.

Jehovah sal jou help as jy toon dat jy standvastig is. Uit eie ondervinding kon die psalmis Dawid van Jehovah sê: “Met iemand wat lojaal is, sal u lojaal handel.”—Psalm 18:25.

◼ Voorgestelde leesgedeelte: 2 Kronieke 16:9. Let op dat Jehovah gretig is om diegene te help wie se hart volkome teenoor hom is.

Probeer dinge vooruitsien

Die Bybel sê: “Skerpsinnig is die een wat die rampspoed gesien en hom verberg het” (Spreuke 22:3). Hoe kan jy hierdie raad volg? Deur dinge vooruit te probeer sien!

“Bly sover moontlik weg van mense wat oor sulke dinge praat.”—Naomi, Japan.

“Vermy geselskap en situasies wat gevaarlik kan wees. Ek weet byvoorbeeld van party wat voor die versoeking geswig het toe hulle onder die invloed van alkohol was.”—Isha, Brasilië.

“Moenie persoonlike inligting, soos jou adres of telefoonnommer, uitgee nie.”—Diana, Brittanje.

“Moenie sommer vir jou klasmaats drukkies gee nie.”—Esther, Nigerië.

“Let op hoe jy aantrek. Jou klere moenie verleidelik wees nie.”—Heidi, Duitsland.

“Dit is ’n groot beskerming om ’n goeie verhouding met jou ouers te hê en met hulle oor hierdie situasie te praat.”—Akiko, Japan.

Dink aan jou spraak, gedrag, geselskap en die plekke wat jy dikwels besoek. Vra jou dan af: ‘Stel ek my in ’n posisie—of stuur ek onwetend boodskappe uit—wat uitnodigings om seks te hê, meer waarskynlik sal maak?’

◼ Voorgestelde leesgedeelte: Genesis 34:1, 2. Sien hoe ’n meisie met die naam Dina tragiese gevolge ervaar het omdat sy op die verkeerde plek was.

Onthou, losse seks is vir Jehovah God ’n baie ernstige saak; jy moet dit ook so beskou. Die Bybel sê: ‘Geen hoereerder of onreine het enige erfenis in die koninkryk van die Christus en van God nie’ (Efesiërs 5:5). Deur ’n standpunt in te neem vir wat reg is, kan jy ’n rein gewete en selfrespek behou. ’n Meisie met die naam Carly stel dit so: “Waarom sou jy toelaat dat iemand jou vir sy eie onmiddellike bevrediging ‘gebruik’? Beskerm jou rein posisie wat jy voor Jehovah het, waarvoor jy hard gewerk het!”

Nog artikels uit die reeks “Jongmense vra . . . ” kan gevind word op die webwerf www.watchtower.org/ype

[Voetnote]

IETS OM OOR TE DINK

◼ Waarom is ongeoorloofde seks verkeerd, al is dit dalk vir die onvolmaakte vlees aanloklik?

◼ Wat sal jy doen as iemand jou vra om losse seks te hê?

[Venster op bladsy 27]

◼ Die Bybel sê dat iemand wat hoerery beoefen, “teen sy eie liggaam [sondig]” (1 Korintiërs 6:18). Hoe is dit die geval? Kyk of jy aan ’n paar redes kan dink, en skryf dit hieronder neer.

․․․․․

Wenk: Om jou te help om die vraag hierbo te beantwoord, kan jy Redenering uit die Skrif, bladsy 316, en Insight on the Scriptures, Deel 1, bladsy 863 raadpleeg. Albei boeke word uitgegee deur Jehovah se Getuies.

[Venster op bladsy 29]

’N WOORDJIE AAN OUERS

“By die skool het ’n klasmaat my gevra om met hom ‘bymekaar te kom’. Dit het my ’n rukkie geneem om te verstaan wat hy wou hê. Ek was net 11.”—Leah.

Kinders word aan die onderwerp van seks blootgestel terwyl hulle nog baie jonk is. Die Bybel het lank gelede voorspel dat “die laaste dae” gekenmerk sou word deur “kritieke tye . . . wat moeilik is om deur te kom”, waarin mense “sonder selfbeheersing” en “liefhebbers van genot eerder as liefhebbers van God” sou wees (2 Timoteus 3:1, 3, 4). Die tendens om losse seks te hê, wat in hierdie artikel vir jongmense bespreek word, is een van die talle aanduidings dat hierdie profesie bewaarheid word.

Die wêreld van vandag is heeltemal anders as die een waarin jy grootgemaak is. Maar in sekere opsigte is die probleme dieselfde. Moet dus nie oorweldig of geïntimideer voel deur die slegte invloede waaraan jou kinders blootgestel word nie. Wees eerder vasbeslote om hulle te help om te doen wat die apostel Paulus Christene ongeveer 2 000 jaar gelede aangespoor het om te doen: “Trek die volle wapenrusting van God aan, sodat julle kan vasstaan teen die sette van die Duiwel” (Efesiërs 6:11). Die feit is dat baie Christenjongmense ’n prysenswaardige stryd voer om te doen wat reg is, ondanks die negatiewe invloede om hulle. Hoe kan jy jou kinders help om dieselfde te doen?

Een manier is om hierdie inligting te gebruik om ’n bespreking met jou seun of dogter te begin. Die ‘voorgestelde leesgedeeltes’ bevat verwysings na gedagteprikkelende tekste. Party vestig die aandag op werklike voorbeelde van mense wat óf ’n standpunt ingeneem het vir wat reg is en seëninge ontvang het, óf God se wette geïgnoreer het en die gevolge gedra het. Ander tekste in die ‘voorgestelde leesgedeeltes’ bevat beginsels wat jou kinders kan help om te besef wat ’n groot voorreg hulle—en jy—het om volgens God se wette te lewe. Beplan gerus nou om hierdie materiaal saam met hulle deur te gaan.

As ons volgens God se standaarde lewe, is dit altyd tot ons voordeel (Jesaja 48:17, 18). As ons dit ignoreer, sal dit sonder twyfel tot hartseer lei. Die uitgewers van die Ontwaak! wens jou Jehovah se seën toe terwyl jy daarna streef om God se wette en beginsels by die harte van jou kinders in te skerp.—Deuteronomium 6:6, 7.

[Prent op bladsy 28]

Jy moet dit duidelik maak dat dit nooit gaan gebeur nie