Ons beskou die wêreld — Wagtoring

Ons beskou die wêreld

◼ Die volledige Nuwe Wêreld-vertaling van die Heilige Skrif is in 43 tale en 3 soorte brailleskrif beskikbaar; die Nuwe Wêreld-vertaling van die Christelike Griekse Geskrifte is in ’n bykomende 18 tale en 1 soort brailleskrif beskikbaar. Vanaf Julie 2007 was die gesamentlike oplaag 143 458 577.

◼ Die oudste bekende Bybelteks wat bestaan, is die sogenoemde Priesterlike Seën van Numeri 6:24-26. Dit is op twee silwergelukbringers gegrif wat soos boekrolle lyk, en dateer uit die laat sewende of vroeë sesde eeu v.G.J.—BIBLICAL ARCHAEOLOGY REVIEW, VSA.

◼ Vanaf 31 Desember 2006 is daar 2 426 tale en dialekte waarin die publikasie van ten minste een Bybelboek geregistreer is—dit is 23 meer as die vorige jaar. —UNITED BIBLE SOCIETIES, BRITTANJE.

◼ Sowat 28 persent van Amerikaners beskou die Bybel as “die werklike woord van God . . . wat letterlik opgeneem moet word”, 49 persent beskou dit as “die geïnspireerde woord van God, maar dat nie alles daarin letterlik opgeneem moet word nie” en 19 persent beskou dit as ’n “boek van fabels”.—GALLUP NEWS SERVICE, VSA.

Oudste Chinese Bybel?

“Die vroegste vermelding van ’n Chinese vertaling van die Hebreeuse Bybel word gevind op ’n klipsuil [links] wat terugdateer tot 781 G.J.”, sê die geleerde Yiyi Chen van die Universiteit van Peking. Die suil, wat deur Nestoriaanse Christene opgerig is, is in 1625 in die stad Xi’an ontdek. “Die Chinese naam van die suil word amptelik vertaal as ‘die gedenkteken van die verspreiding van die liggewende godsdiens van Daqin in China’ ( . . . Daqin is die Chinese term vir die Romeinse Ryk)”, verduidelik Chen. “Tussen die karakters op die suil vind ons Chinese uitdrukkings soos ‘ware kanon’ en ‘die vertaling van die Bybel’.”

[Foto-erkenning op bladsy 30]

Skat uit ’n moeras

In 2006 het werkers wat in ’n Ierse turfmoeras gegrawe het, ’n psalmboek, of psalter, ontdek wat glo terugdateer tot die agtste eeu G.J. Die Latynse manuskrip, een van min wat uit daardie tydperk behoue gebly het, word as ’n skat beskryf. Die sowat 100 perkamentbladsye, in hulle oorspronklike binding, is van uitstekende gehalte. “Die oorblyfsels van ’n mat waarin dit toegedraai is, sowel as ’n drasak van leer dui daarop dat die psalmboek doelbewus weggesteek is, moontlik om dit veilig te bewaar teen ’n Vikingstrooptog wat 1 200 jaar gelede plaasgevind het”, sê The Times van Londen. Hoewel die bladsye saamgepers is en gedeeltelik verrot het, is kenners vol vertroue dat hulle dit van mekaar kan losmaak en dit sal kan bewaar.

Vragte vol geskiedenis

Volgens berigte het argeoloë wat deur vragte vol grond sif wat afkomstig is van Jerusalem se tempelterrein, duisende artefakte gevind wat uit voor-Israelitiese tye tot moderne tye dateer. Een van die artefakte was ’n pylpunt van die soort wat deur Nebukadnesar se leërmag gebruik is, wat die eerste Joodse tempel op daardie terrein vernietig het. Die merkwaardigste ontdekking is ’n kleiseëlafdruk, wat uit die sewende of sesde eeu v.G.J. dateer en waarop die Hebreeuse naam Gedaljahoe Ben Immer Ha-Cohen na bewering staan. Volgens die argeoloog Gabriel Barkai was die eienaar daarvan “moontlik ’n broer van Pasgur Ben Immer, wat in die Bybel [Jeremia 20:1] as ’n priester en tempelbeampte beskryf word”.