Is daar een ware godsdiens?

Party mense neem aanstoot aan hierdie vraag. Aangesien daar soveel godsdiensoortuigings in die wêreld is, redeneer hulle dat enigeen wat beweer dat hy die enigste een is wat die waarheid het, ’n eng beskouing het of selfs arrogant is. ’n Mate van goedheid kan tog sekerlik in alle godsdienste, of ten minste in die meeste godsdienste, gevind word, of hoe? Is dit jou beskouing?

DAAR is natuurlik situasies waarin dit verstandig is om ruimte vir ’n verskeidenheid opinies te laat. Dalk glo iemand byvoorbeeld dat ’n sekere dieet hom gesonder sal maak. Maar moet hy daardie dieet op almal afdwing, asof dit die enigste manier is om ’n gesonde lewe te lei? Dit sal beslis verstandig en beskeie van hom wees om ruimte te laat vir die moontlikheid dat iemand anders se keuse van voedsel net so goed of selfs beter kan wees, ten minste vir daardie ander persoon.

Is dit ook die geval met godsdiens? Is daar ’n verskeidenheid aanvaarbare alternatiewe om van te kies, afhangende van hoe iemand grootgemaak is of dinge beskou? Of is daar een versameling godsdienswaarhede wat op die hele mensdom van toepassing is? Kom ons kyk na wat die Bybel sê. Ons sal eerstens kyk of dit hoegenaamd moontlik is om die waarheid te vind. As dit onmoontlik is, is dit tog tevergeefs om na een ware godsdiens te soek.

Kan godsdienswaarheid gevind word?

Kort voordat Jesus Christus doodgemaak is, het hy vir sy ondervraer, die Romeinse goewerneur Pontius Pilatus, gesê: “Elkeen wat aan die kant van die waarheid is, luister na my stem.” Pilatus was heel moontlik sinies toe hy in antwoord daarop gesê het: “Wat is waarheid?” (Johannes 18:37, 38). Daarenteen het Jesus onbeskroomd van die waarheid gepraat. Hy het nie getwyfel of dit bestaan nie. Kyk byvoorbeeld na die volgende vier stellings wat Jesus tot verskeie mense gerig het.

“Hiervoor is ek gebore en hiervoor het ek in die wêreld ingekom, om van die waarheid te getuig.”—Johannes 18:37.

“Ek is die weg en die waarheid en die lewe.”—Johannes 14:6.

“God is ’n Gees, en dié wat hom aanbid, moet met gees en waarheid aanbid.”—Johannes 4:23, 24.

“As julle in my woord bly, is julle werklik my dissipels, en julle sal die waarheid ken, en die waarheid sal julle vrymaak.”—Johannes 8:31, 32.

Aangesien Jesus met soveel vertroue gepraat het oor die waarheid en die feit dat ’n mens kennis daarvan kan opdoen, moet ons dan nie ten minste die moontlikheid ondersoek of godsdienswaarheid bestaan en of dit gevind kan word nie?

Bestaan absolute waarheid werklik?

Jy sal ongetwyfeld saamstem dat daar party dinge is waarvan jy absoluut seker kan wees. Jy is seker van jou eie bestaan en dat die voorwerpe wat om jou is, werklik bestaan. Die bome, die berge, die wolke, die son en die maan—die stoflike wêreld—is nie versinsels nie. Natuurlik is daar dalk ’n paar mense wat op filosofiese wyse redeneer dat selfs hierdie dinge bevraagteken kan word. Maar jy stem waarskynlik nie met so ’n uiterste beskouing saam nie.

Dan is daar die natuurwette. Jy kan ook absoluut seker wees dat dit bestaan. Byvoorbeeld, as jy van ’n krans afspring, sal jy val; as jy weier om te eet, sal jy honger voel; en as jy lank sonder voedsel bly, sal jy sterf. Jy wonder nie of hierdie natuurwette op party mense van toepassing is en nie op ander nie. Dit is op die hele mensdom van toepassing en daar word dus gesê dat dit universeel is.

Die Bybel sinspeel op so ’n universele wet wanneer dit vra: “Kan iemand vuur in sy boesem bymekaarkrap sonder dat sy klere verbrand?” Ja, toe hierdie woorde geskryf is, was dit ’n universele feit dat klere sal brand as dit met vuur in aanraking kom. Maar wanneer die bogenoemde Bybelspreuk hierdie feit noem, maak dit in werklikheid ’n belangriker punt, naamlik dat “iemand wat [geslagsgemeenskap] het met die vrou van sy medemens”, die slegte gevolge daarvan sal dra.—Spreuke 6:27, 29.

Is hierdie stelling ’n absolute waarheid waarvan ons seker kan wees? Party sou nee sê. Hulle beweer dat sedes ’n persoonlike saak is en dat dit van ’n mens se opvoeding, oortuigings en omstandighede afhang. Maar kyk na ’n paar van God se sedewette soos dit in die Bybel opgeteken is. Is dit nie universele waarhede nie?

Die Bybel veroordeel egbreuk (1 Korintiërs 6:9, 10). Party aanvaar nie hierdie Bybelse voorskrif as waarheid nie, en hulle pleeg egbreuk. Maar selfs hulle ervaar oor die algemeen bittere gevolge, wat dikwels ’n gekwelde gewete, egskeiding en diep emosionele letsels vir al die betrokkenes insluit.

Dronkenskap word ook deur God veroordeel (Spreuke 23:20; Efesiërs 5:18). Wat gebeur wanneer mense dit beoefen? In baie gevalle verloor hulle hulle werk, hulle gesondheid en hulle gesin, wat ook emosioneel daaronder ly (Spreuke 23:29-35). Sulke gevolge is ook die lot van dié wat nie glo dat dronkenskap verkeerd is nie. Lyk dit asof die waaragtigheid van hierdie sedewette afhang van die opvattings of beskouings van elke individu?

Die Bybel bevat ook positiewe sedelike bevele—soos om jou vrou lief te hê, om respek vir jou man te hê en om aan ander goed te doen (Matteus 7:12; Efesiërs 5:33). Wanneer mense hierdie bevele gehoorsaam, bring dit voordelige resultate mee. Sou jy sê dat sulke sedelike raad op party van toepassing is, maar nie op ander nie?

Hetsy die sedewette van die Bybel nou onderhou word of nie, dit bring altyd gevolge mee. Hierdie feit bewys dat sulke wette nie net alternatiewe beskouings is nie. Dit is eerder waarhede. Die bewyse toon dat dit goeie gevolge meebring wanneer die Bybel se sedewette onderhou word en slegte gevolge wanneer dit verontagsaam word.

Dink dus hieraan: As die Bybel se sedewette op die hele mensdom van toepassing is, wat van die standaarde in God se Woord in verband met aanbidding? Wat van die Bybel se kommentare oor wat gebeur wanneer ons sterf en die hoop wat ons op ’n ewige toekoms het? Die logiese gevolgtrekking is dat hierdie Bybelleerstellings ook waarhede is, wat vir die hele mensdom voorsien is. Die voordele en gevolge daarvan is nie net beperk tot diegene wat dit glo nie.

Die waarheid kan gevind word. Jesus het gesê dat God se Woord, die Bybel, die waarheid is (Johannes 17:17). En tog lyk dit dalk nog steeds asof die waarheid nie gevind kan word nie. Waarom nie? Omdat soveel verskillende godsdienste beweer dat hulle leer wat die Bybel sê. Watter godsdiens leer die waarheid van God se Woord? Moet ons die antwoord tot net een godsdiens beperk? Kan die waarheid, of ten minste dele daarvan, nie in ’n aantal godsdienste gevind word nie?

[Lokteks op bladsy 4]

Wat is die verband tussen ongehoorsaamheid aan God se wette en om vuur in jou boesem bymekaar te krap?