Slaap—Hoe belangrik is dit?

● Volgens huidige studies slaap die gemiddelde Noord-Amerikaner nou sewe tot sewe en ’n half uur per nag.a Hoe belangrik is slaap? Terwyl jy slaap, gaan jy heelnag lank elke 60 tot 90 minute deur slaapfases wat vinnige oogbewegings genoem word. Gedurende hierdie fases is die brein op sy aktiefste, en navorsers meen dat die brein homself op die een of ander manier herstel. Party deskundiges sê dat wanneer die slaapsiklus onderbreek word en slaap verloor word, die uitwerking daarvan in die liggaam opbou. Breinfunksie word beïnvloed, wat ondoeltreffendheid en ’n klomp ander fisiese kwale tot gevolg het.

Middels soos kafeïen kan die chemiese verbinding wat vir die liggaam sê dat hy moet slaap, tydelik onderdruk. Maar ons brein het ’n meganisme wat ons laat slaap wanneer ons liggaam nie genoeg slaap gekry het nie, en dit lei tot ’n verskynsel wat mikroslaap genoem word. The Toronto Star sê: “As jou brein slaap ontsê is, sal dit ongeag waarmee jy besig is, van tyd tot tyd in die eerste slaapstadium ingaan, wat tien sekondes tot net oor ’n minuut op ’n slag kan duur.” Stel jou voor dat jy ’n motor teen ’n spoed van 48 kilometer per uur bestuur en ’n mikroslaap van tien sekondes ondervind. In dié tyd sou jy meer as die lengte van ’n rugbyveld afgelê het. As jy nie die nodige slaap kry nie, kan dit ook jou immuunstelsel verswak, want wanneer jy slaap, vervaardig die liggaam T-selle wat patogene beveg. Terwyl ons slaap, vervaardig ons liggaam ook die hormoon leptien, wat aptyt help reguleer. Ja, die liggaam het slaap net so nodig soos genoeg oefening en die regte voedingstowwe.

Beroof ekstra werk jou van broodnodige slaap? Of is dit die sorge van die lewe en bekommernisse oor wat jy vir die toekoms opgegaar het? Die wyse koning Salomo het eens op ’n tyd gesê: “Soet is die slaap van die een wat dien, of hy nou min of baie eet; maar die oorvloed wat aan die ryke behoort, laat hom nie toe om te slaap nie.”—Prediker 5:12.

[Voetnoot]