‘Ek kon dit nie neersit nie!’
● Jongmense van regoor die wêreld het hulle waardering uitgespreek vir die boek Vrae wat jongmense vra—Antwoorde wat werk, Deel 2.a Kyk na wat ’n paar van hulle gesê het:
“Ek waardeer die feit dat die boek kommunikasie met ons ouers bevorder. Ek het die wenke probeer, en nou kan ek sê dat die kommunikasie tussen my en my ouers verbeter het.”—Roberto, Mexiko.
“Toe ek die boek begin lees het, kon ek dit nie neersit nie! Ek hou van die ‘Aksieplan!’ aan die einde van elke hoofstuk en die bladsy ‘My dagboek’ aan die einde van elke deel. Hierdie boek het my gehelp om my oortuigings by die skool te verdedig.”—Joelah, Verenigde State.
“Hoe meer ek gelees het, hoe meer het dit my hart geraak. Die gedagtes van al die jongmense asook die ‘Het jy geweet?’- en ‘Wenk’-vensters het my beïndruk. Hierdie boek laat my besef dat die Bestuursliggaam van Jehovah se Getuies in jongmense belangstel!”—Hoei-won, Suid-Korea.
“Van al die boeke wat deur Jehovah se Getuies uitgegee is, is hierdie een die lekkerste om te lees. Julle weet presies wat in die gedagtes van tieners aangaan en watter probleme hulle ondervind in die gesin, op skool en met vriende.”—Shana, Kanada.
“Elke keer as my ouers gestry het, het ek na my kamer toe gegaan en gehuil. Maar nadat ek hoofstuk 24, ‘Wat moet ek doen as my ouers stry?’, gelees het, kon ek met my ma en pa daaroor praat. Hulle was verbaas om uit te vind dat hulle stryery my so ontstel. Hulle het toe ook die hoofstuk gelees. Nou verstaan hulle my gevoelens beter en stry hulle baie min.”—Mariana, Tsjeggiese Republiek.
“Die ‘Rolmodel’-bladsye het my diep getref en my gehelp om aan my swakhede te werk. Dit is byvoorbeeld vir my moeilik om mense in die Christengemeente wat ek nie werklik ken nie, beter te leer ken. Maar bladsy 97 vertel hoe Lidia Paulus en sy metgeselle beter leer ken het deur gasvryheid aan hulle te bewys. Ek probeer nou om haar voorbeeld te volg.”—Mónika, Hongarye.
[Voetnoot]
a Uitgegee deur Jehovah se Getuies.
[Venster/Prent op bladsy 25]
“VOORHUWELIKSE SEKS—WAAROM DIT VERKEERD IS”
Katrina, ’n 16-jarige meisie in die Verenigde State, moes ’n toespraak voor haar klas hou oor ’n onderwerp wat sy self kon kies. Sy het goed gebruik gemaak van die boek Vrae wat jongmense vra—Antwoorde wat werk, Deel 2, en het die onderwerp “Voorhuwelikse seks—Waarom dit verkeerd is” gekies. Haar ouers vertel: “Katrina het in haar toespraak ’n omskrywing van die woord ‘onthouding’ gegee, die gevare van voorhuwelikse seks verduidelik en gemeld watter skadelike gevolge dit het as ’n mens nie by God se sedelike standaarde bly nie. Katrina het ook party jongmense se woorde uit die boek aangehaal wat toon hoe hulle gevoel het nadat hulle God se standaarde verontagsaam het. Toe het sy die klas die geleentheid gegee om vrae te vra, wat sy beantwoord het. Ná haar toespraak het Katrina se onderwyseres vir haar ’n briefie gegee, wat gedeeltelik gesê het: ‘Dankie dat jy die waarheid oorgedra het en lig in ’n duister wêreld ingebring het. Bly sterk in die geloof.’”