Waarom moet ons ander prys?

BAIE mense voel dat ander nie waardeer wat hulle doen nie. Byvoorbeeld, werkers voel dikwels dat hulle werkgewers hulle nie genoeg erkenning gee nie. Baie getroude mense voel dat hulle maat hulle nie waardeer nie. En party kinders dink dat hulle nooit aan hulle ouers se verwagtinge sal kan voldoen nie. As ons almal bereid is om mekaar van tyd tot tyd te prys, sal dit sulke gevoelens sekerlik teëwerk.

In vandag se wêreld is opregte woorde van lof redelik skaars. Dit is glad nie verbasend nie, want die Bybel het voorspel dat daar “in die laaste dae kritieke tye sal wees wat moeilik is om deur te kom. Want mense sal liefhebbers van hulleself wees, . . . ondankbaar, dislojaal.”—2 Timoteus 3:1, 2.

Het iemand jou al opreg geprys? Dan weet jy hoe dit jou hart kan verbly en jou kan aanmoedig. “Hoe goed is ’n woord op die regte tyd tog!” sê die Bybel (Spreuke 15:23). Die Heilige Skrif kan ons help om mekaar liefdevol te behandel.

Soek na die goeie in ander

Omdat God opreg in ons belangstel, sien hy ons goeie eienskappe en dade raak en waardeer hy dit. Die Bybel verseker ons: “[God] se oë deurloop die hele aarde om sy krag te toon ten behoewe van dié wie se hart volkome teenoor hom is” (2 Kronieke 16:9). Wanneer ons ons liefde vir God toon deur sy wette te gehoorsaam, sal hy dit beslis raaksien.

Jehovah God soek nie na foute in ons nie. As hy dit gedoen het, sou nie een van ons kon bly staan nie (Psalm 130:3). Jehovah is eerder soos ’n mynwerker wat geduldig deur hope klippe soek om edelstene te vind. Wanneer die mynwerker ’n edelsteen vind, is hy verheug. Die ongeslypte steen lyk dalk nie kosbaar nie, maar die mynwerker sien die potensiële waarde daarvan. Wanneer God ons hart deursoek, soek hy eweneens na kosbare eienskappe, nie foute nie. Wanneer hy dit vind, is hy verheug. Hy weet dat sulke eienskappe, wanneer dit verfyn word, iets waarlik kosbaars tot gevolg kan hê—’n getroue en toegewyde aanbidder van Jehovah.

Ons kan uit God se voorbeeld leer. Wanneer ons na mense kyk, is ons dalk geneig om net hulle foute raak te sien. Maar as ons mense sien soos Jehovah hulle sien, sal ons na die goeie in hulle soek (Psalm 103:8-11, 17, 18). Wanneer ons hulle kosbare eienskappe vind, kan ons hulle prys. Die gevolg? Ons woorde sal hulle beslis verkwik, en hulle sal dalk selfs harder probeer om te doen wat reg is! En ons sal die vreugde ervaar wat dit meebring om aan ander te gee.—Handelinge 20:35.

Gee erkenning aan goeie dade

Jesus het dikwels die goeie dade van ander raakgesien en daaraan erkenning gegee. Eenkeer, toe ’n bevreesde, sieklike vrou stilletjies aan sy bokleed geraak het om genees te word, het Jesus haar geprys en gesê: “Dogter, jou geloof het jou gesond gemaak.”—Markus 5:34.

By ’n ander geleentheid, terwyl Jesus by die tempel in Jerusalem onderrig het, het hy gesien hoe talle ryk mense geld in die skatkiste gooi. Toe sien hy ’n behoeftige weduwee wat “twee muntstukkies van baie min waarde” ingooi. Ander het meer as sy ingegooi. Tog het Jesus die weduwee se opregte gesindheid openlik geprys deur te sê: “Ek sê vir julle die waarheid: Hierdie weduwee het, hoewel sy arm is, meer as hulle almal ingegooi. Want hulle almal het uit hulle oorvloed gawes ingegooi, maar hierdie vrou het in haar gebrek al die middele vir lewensonderhoud ingegooi wat sy gehad het.”—Lukas 21:1-4.

Hoe kan ons Jesus navolg? Die Bybel sê: “Moenie die goeie terughou van dié aan wie dit toekom wanneer dit in die mag van jou hand is om dit te doen nie.”—Spreuke 3:27.

Lof is kragtig

In vandag se ondankbare wêreld wil ons almal voel dat ander ons waardeer en vir ons lief is. Wanneer ons ander opreg prys, versterk ons hulle en moedig ons hulle aan. Ons opregte lof spoor hulle aan om voort te gaan om hulle bes te doen.—Spreuke 31:28, 29.

Die Bybel spoor alle Christene aan: “Laat ons op mekaar ag gee om tot liefde en goeie werke aan te spoor” (Hebreërs 10:24). Die wêreld sou baie anders gewees het as almal persoonlike belangstelling in ander getoon het, na die goeie in hulle gesoek het en erkenning aan hulle goeie dade gegee het. Ja, lof is kragtig!

HET JY AL GEWONDER?

● Waarom moet ons ander vir hulle goeie dade prys?—Spreuke 15:23.

● Waarna soek Jehovah wanneer hy ons ondersoek?—2 Kronieke 16:9.

● Wanneer moet ons ander prys?—Spreuke 3:27.

[Prent op bladsy 29]

Sien jy ander se goeie dade raak, en gee jy erkenning daaraan?