Ware geregtigheid onder God se regering

BYBELPROFESIEË openbaar dat die teenswoordige wêreld binnekort vervang sal word deur ’n nuwe wêreld wat God tot stand sal bring. Wat meer is, hierdie nuwe wêreld sal net een regering hê—God se Koninkryk, met Jesus Christus as Koning (Openbaring 11:15). Hoe sal God se Koninkryk ongeregtigheid verwyder? Op twee maniere.

1. God se Koninkryk sal onregverdige, onbekwame menseregerings uit die weg ruim. Daniël 2:44 sê: “In die dae van dié konings [regerings] sal die God van die hemel ’n koninkryk oprig . . . Dit sal al hierdie [menslike] koninkryke verbrysel en daar ’n einde aan maak, en self sal dit tot onbepaalde tye bly staan.”

2. God se Koninkryk sal die goddeloses vernietig en die regverdiges behoue laat bly. Psalm 37:10 sê: “Nog net ’n klein rukkie en die goddelose sal daar nie meer wees nie.” Vers 28 sê: “Jehovah het geregtigheid lief, en hy sal sy lojales nie verlaat nie. Tot onbepaalde tyd sal hulle beslis bewaar word.”

Hierdie “lojales” sal die vervulling sien van ’n stelling wat Jesus in sy modelgebed gemaak het. Hy het gesê: “Laat u koninkryk kom. Laat u wil geskied, soos in die hemel, so ook op die aarde” (Matteus 6:10). Wat is God se wil vir die aarde?

Wanneer God se Koninkryk oor die aarde heers . . . 

Sal korrupsie en onderdrukking tot ’n einde kom. Hebreërs 1:9 sê aangaande Jesus Christus: “U het regverdigheid liefgehad en u het wetteloosheid gehaat.” As ’n waarlik regverdige Heerser, sal Jesus “die arme verlos wat om hulp roep, ook die geteisterde en elkeen wat geen helper het nie. . . . Van onderdrukking en van geweld sal hy hulle siel verlos, en hulle bloed sal kosbaar wees in sy oë.”—Psalm 72:12-14.

Sal almal ’n oorvloed hê. “Die aarde sal beslis sy opbrengs lewer; God, ons God, sal ons seën” (Psalm 67:6). “Daar sal volop graan op die aarde wees; op die top van die berge sal daar ’n oorvloed wees” (Psalm 72:16). By meer as een geleentheid het Jesus duisende mense wonderdadig gevoed—’n voorskou van wat hy deur middel van God se Koninkryk sal doen.—Matteus 14:15-21; 15:32-38.

Sal geregtigheid nie deur menslike beperkings ondermyn word nie. “Daar is nie ’n skepping wat nie vir [God se] oë sigbaar is nie, maar alles lê naak en oop en bloot voor die oë van hom aan wie ons rekenskap moet gee” (Hebreërs 4:13). Aangaande Christus lees ons: “Hy sal nie oordeel net volgens wat sy oë sien nie, en ook nie teregwys net volgens wat sy ore hoor nie. En met regverdigheid sal hy die geringes oordeel, en met billikheid sal hy teregwysing gee ten behoewe van die sagmoediges van die aarde.”—Jesaja 11:3, 4.

Koninkryksheerskappy is naby!

Verslegtende wêreldtoestande bewys dat die einde van die wêreld naby is. “Wanneer die goddeloses uitspruit soos die plante en almal wat skadelike dinge beoefen, bloei, is dit sodat hulle vir ewig verdelg kan word”, sê Psalm 92:7. Hoe kan jy verseker dat jy jou nie God se misnoeë op die hals haal nie en dat jy onder diegene sal wees wat hy behoue laat bly? Jesus Christus het gesê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus.”—Johannes 17:3.

Sal jy graag hierdie kosbare kennis wil hê? Indien wel, kan jy, soos Heide, Dorothy en Firoeddin, die saak gerus met Jehovah se Getuies bespreek. Hulle sal jou vrae met graagte beantwoord, gratis en sonder verpligting.

[Venster/Prent op bladsy 9]

WANNEER DIT LYK ASOF DIE LEWE ONREGVERDIG IS

Emily, wat in die Verenigde State woon, is met leukemie gediagnoseer toe sy sewe jaar oud was. Terwyl haar vriende nou en dan griep of verkoue gehad het, moes Emily jare lank intensiewe mediese behandeling, insluitende chemoterapie, verduur. “Leukemie is verskriklik!” sê sy.

Hoewel die lewe Emily stief behandel het, het sy nie in wanhoop verval nie. Sy sien eerder uit na die tyd, onder God se Koninkryk, wanneer “geen inwoner sal sê: ‘Ek is siek’ nie” (Jesaja 33:24). “My gunstelingteks”, sê Emily, “is Markus 12:30: ‘Jy moet Jehovah jou God liefhê met jou hele hart en met jou hele siel en met jou hele verstand en met al jou krag.’ Wanneer ek tot Jehovah bid, maak hy my sterk. Ek dank Jehovah vir my gesin, my gemeente en die hoop op die ewige lewe in die Paradys. Hierdie hoop het my baie gehelp.”

[Prente op bladsye 8, 9]

Onder God se Koninkryk sal alle mense ’n oorvloed kos hê, sal ware geregtigheid heers en sal vooroordeel iets van die verlede wees