2. Hou dit skoon

NET soos ’n snydokter sy pasiënte beskerm deur sy hande te was, sy instrumente te steriliseer en te verseker dat die teater skoon is, kan jy jou gesin beskerm deur seker te maak dat jy, jou kombuis en julle voedsel skoon is.

● Was jou hande.

Kanada se Agentskap vir Openbare Gesondheid sê dat “ongeveer 80 persent van die aansteeklike siektes wat algemeen voorkom, soos verkoue en griep, deur middel van hande versprei word”. Was jou hande dus deeglik met seep en water voordat jy eet, nadat jy die toilet gebruik het en wanneer jy ’n maaltyd voorberei.

● Hou jou kombuis skoon.

Een studie het aan die lig gebring dat die badkamer gewoonlik die skoonste plek in die huis is, terwyl “die spons/vadoeke in die kombuis besmet is met die meeste fekale bakterieë”, oftewel bakterieë wat van ontlasting afkomstig is.

Was vadoeke dus dikwels, en gebruik warm, seperige water of ’n ontsmettingsmiddel om kombuisoppervlakke skoon te maak. Toegegee, dit is nie altyd maklik nie. ’n Vrou met die naam Bola woon in ’n huis waar daar nie kraanwater is nie. “Dit is baie moeilik”, sê sy. “Maar ons maak altyd seker dat daar genoeg seep en water is sodat ons ons kombuis en huis skoon kan hou.”

● Spoel vars produkte af.

Voordat vars produkte verkoop word, was dit moontlik besmet deur vuil water, diere, ontlastingstowwe of ander rou voedselprodukte. Daarom moet jy vrugte of groente deeglik afspoel om skadelike bakterieë te verwyder, selfs as jy dit gaan skil. Dit neem tyd. “Wanneer ek slaai maak”, sê Daiane, ’n moeder in Brasilië, “sit ek genoeg tyd opsy om seker te maak dat ek die groente ordentlik afspoel.”

● Hou rou vleis apart.

Om te keer dat bakterieë versprei, moet jy alle rou vleis, pluimveevleis en seekos verseël of goed toedraai en dit apart hou van ander voedsel. Gebruik ’n afsonderlike kerfplank en mes vir hierdie kosse, of was jou kerfplank en mes deeglik met seep en warm water voordat dit vir rou vleis of seekos gebruik word, en ook daarna.

Hoe kan jy maaltye op veilige wyse voorberei noudat jy, jou gereedskap en jou bestanddele skoon is?

[Venster op bladsy 5]

LEER JOU KINDERS: “Ons leer ons kinders om hulle hande te was voordat hulle eet en om kos wat op die vloer geval het, af te spoel of weg te gooi.”—Hoi, Hongkong