1. Doen inkopies op verstandige wyse
TENSY jy jou eie voedsel kweek, koop jy heel moontlik jou kos by ’n mark of ’n supermark. Hoe kan jy gesonde voedsel kies en koop wanneer jy inkopies doen?
● Beplan jou roete.
“Koop niebederfbare voedselprodukte eerste”, raai die Inligtingsraad insake Voedselveiligheid in Australië aan. “Koop [items] wat in ’n yskas of vrieskas gehou word, laaste.” En as jy warm kos koop, moet jy dit koop net voordat jy terugkeer huis toe.
● Gee voorkeur aan vars voedsel.
Probeer vars voedsel koop wanneer moontlik.a Ruth, ’n moeder van twee in Nigerië, sê: “Ek gaan gewoonlik baie vroeg in die oggend mark toe wanneer die kos varser is.” Elizabeth, van Mexiko, doen ook haar inkopies by ’n opelugmark. “Daar kan ek vars vrugte en groente koop, en ek kan dit self uitkies”, sê sy. “Ek koop altyd vars vleis wat daardie dag geslag is. Indien nodig, vries ek wat ek nie gebruik nie.”
● Ondersoek voedselprodukte.
Vra jou af: ‘Is die skil van vars produkte heel? Ruik die vleis vars?’ As die voedsel klaar verpak is, moet jy die verpakking ondersoek. As die verpakking beskadig is, kan giftige bakterieë die voedsel besmet.
Chung Fai, wat by ’n supermark in Hongkong inkopies doen, sê: “Dit is ook belangrik om na die vervaldatum op verpakte voedsel te kyk.” Waarom? Deskundiges waarsku dat voedsel waarvan die vervaldatum verstreke is, jou kan siek maak, al lyk, ruik en smaak dit goed.
● Verpak voedsel veilig.
As jy ’n herbruikbare inkopiesak of plastiekhouer gebruik wanneer jy inkopies doen, moet jy dit gereeld met warm seepwater uitwas. Gebruik aparte houers of sakke vir vleis en vis sodat dit nie die ander voedsel besmet nie.
Enrico en Loredana, ’n egpaar in Italië, doen hulle inkopies naby die huis. “Dan hoef ons nie die kos baie ver te vervoer en die risiko te loop dat dit sal bederf nie”, verduidelik hulle. As dit langer as 30 minute sal neem om by die huis te kom, moet jy koue of gevriesde voedselprodukte in ’n koelsak sit of op ’n ander manier verseker dat dit koud bly.
In die volgende artikel sal jy sien hoe om voedsel op veilige wyse te hanteer wanneer jy by die huis is.
[Voetnoot]
a Sien die artikel “Sleutel 1—Eet gesond” in die Ontwaak! van Maart 2011.
[Venster op bladsy 4]
LEER JOU KINDERS: “Ek leer my kinders om die vervaldatum op verpakte voedselprodukte, soos peuselhappies, na te gaan voordat hulle dit koop.”—Ruth, Nigerië