3. Let op hoe jy kos voorberei en bêre
’N ONGEËRGDE kok in eertydse Israel het wilde kalbasse gepluk, al het hy “dit nie geken nie”. Hy het hierdie onbekende kos by ’n gereg gevoeg. Die mense wat die kos geëet het, was bang dat dit dalk vergiftig is en het uitgeroep: “Die dood is in die pot.”—2 Konings 4:38-41.
Soos die voorbeeld hierbo toon, kan kos wat op ’n agterlosige manier voorberei is, skadelik of selfs dodelik wees. Om voedselverwante siektes te vermy, moet jy dus leer hoe om kos met sorg voor te berei en te bêre. Kyk na die volgende vier wenke:
● Moenie vleis teen kamertemperatuur laat ontdooi nie.
“Hoewel die [vleis] moontlik nog aan die binnekant gevries is terwyl dit op die toonbank ontdooi”, sê die Amerikaanse Departement van Landbou, “is die buitenste deel van die [vleis] dalk in die ‘Gevaarsone’ tussen 40 [4 °C] en 140 °F [60 °C]—temperature waarteen bakterieë vinnig vermeerder.” Ontdooi voedsel eerder in die yskas, in ’n mikrogolf of in waterdigte verpakking in koue water.
● Maak kos goed gaar.
“As kos deeglik gekook word, maak dit byna alle gevaarlike mikro-organismes dood”, sê die Wêreldgesondheidsorganisasie. Wanneer jy kos kook, veral sop en bredie, moet jy seker maak dat dit ’n temperatuur van ten minste 70 grade Celsius bereik.a Aangesien dit moeilik kan wees om te bepaal hoe warm party disse binne-in is, gebruik baie kokke ’n vleistermometer.
● Bedien kos gou.
Gekookte kos moenie te lank teen kamertemperatuur staan nie. Bedien dit dus gou, selfs onmiddellik, om te keer dat dit bederf. Hou koue kos koud en warm kos warm. Jy kan vleis teen omtrent 90 grade Celsius in ’n oond warm hou.
● Die hantering van oorskietkos.
Anita, ’n moeder in Pole, bedien meeste maaltye onmiddellik nadat sy dit gekook het. Maar as daar oorskietkos is, “vries ek dit kort nadat ek dit voorberei het in klein porsies sodat ek dit maklik kan ontdooi”, sê sy. Oorskietkos wat in die yskas gehou word, moet binne drie of vier dae geëet word.
Wanneer jy uiteet, berei iemand anders die kos voor. Hoe kan jy jou gesin dus beskerm wanneer julle uiteet?
[Voetnoot]
a Party kossoorte, soos pluimveevleis, moet teen ’n hoër temperatuur gekook word.
[Venster op bladsy 6]
LEER JOU KINDERS: “Wanneer my kinders kos kook, herinner ek hulle daaraan om die instruksies op die verpakking te lees en te volg.”—Yuk Ling, Hongkong