Welkom by die Teokratiese Bedieningskool

REGOOR die aarde, in meer as 200 lande, vind miljoene studente elke week baat by die opleiding in die Teokratiese Bedieningskool. Party is nuut. Ander woon die skool al baie jare lank by. Die skool word op derduisende plekke gehou. Jy kan by dieselfde opleidingsprogram baat vind, ongeag waar jy op die aarde woon. Mense van alle ouderdomme, etniese groepe en opvoedkundige agtergronde ontvang hierdie teokratiese opleiding gratis.

Toe die skool in 1943 in gemeentes van Jehovah se Getuies ingestel is, is die doel daarvan soos volg uiteengesit: “Om alle ‘getroue manne’, dié wat God se Woord gehoor het en geloof daarin stel, voor te berei om ‘ander te kan onderrig’ . . . met die uitsluitlike doel om elkeen . . . beter toe te rus om die hoop wat in hom is, in die openbaar bekend te maak” (Course in Theocratic Ministry, bl. 4). Die doel van die skool is tot vandag toe nog dieselfde.

Wat is dan die beste manier waarop elkeen van ons ons godgegewe gawe van spraak kan gebruik? Die Bybel antwoord: “Laat alles wat asemhaal, Jah loof” (Ps. 150:6). Wanneer ons dit doen, maak ons ons hemelse Vader se hart bly. Ons toon aan hom dat ons eie hart met dankbaarheid op sy goedheid en liefde reageer. Dit is te verstane dat Christene aangemoedig word om altyd “aan God ’n lofoffer [te] bring, dit wil sê die vrug van die lippe wat sy naam in die openbaar bekend maak”! (Heb. 13:15). Ons verwelkom jou as ’n student in die Teokratiese Bedieningskool, wat jou sal help om jou vermoë te verbeter om jou godgegewe gawes tot lof van Jehovah te gebruik.

Hoewel die skool baie klem lê op openbare voorlesing en die spreek- en onderrigkuns, is dit nie die enigste voordeel van opleiding in die Teokratiese Bedieningskool nie. As ’n student in die skool sal jy gehelp word om waardevolle vaardighede te ontwikkel, soos om te lees, te luister en te onthou, te studeer, navorsing te doen, materiaal te ontleed en te organiseer, gesprekke te voer, vrae te beantwoord en jou gedagtes op skrif te stel. Die Bybel en Bybelpublikasies sal as grondslag vir studie en vir kommentare en aanbiedings in die skool dien. Terwyl jy jou verstand met die kosbare waarhede van God se Woord vul, sal jy leer om soos God te dink. Hoe nuttig kan dit tog in elke aspek van die lewe wees! Aangaande die waarde van God se Woord het William Lyon Phelps, ’n 20ste-eeuse opvoedkundige aan ’n universiteit, geskryf: “Almal wat ’n deeglike kennis van die Bybel het, kan waarlik geleerd genoem word. . . . Ek dink dat kennis van die Bybel sonder ’n universiteitskursus waardevoller is as ’n universiteitskursus sonder ’n Bybel.”

Hoe om ten volle baat te vind

Om ten volle by die opleiding in die Teokratiese Bedieningskool baat te vind, gaan natuurlik persoonlike inspanning van jou as die student verg. Die apostel Paulus het sy Christenmedewerker Timoteus aangespoor: “Peins oor hierdie dinge; wees verdiep daarin, sodat jou vooruitgang vir almal duidelik kan wees” (1 Tim. 4:15). Op watter praktiese maniere kan jy jou toelê?

Woon die Teokratiese Bedieningskool elke week by, indien moontlik. Maak goed gebruik van hierdie handboek, Vind baat by opleiding in die Teokratiese Bedieningskool. Skryf jou naam in die spasie wat op die titelblad daarvoor voorsien word. Bring altyd die boek saam met jou wanneer jy die skool bywoon. Hierdie handboek is ook ’n werkboek. Wanneer jy belangrike punte hierin lees wat jy dink jou sal help, kan jy dit gerus onderstreep. Gebruik die wye kantruimtes om praktiese punte neer te skryf wat jy tydens besprekings by die skool leer.

’n Gedrukte program wat in die Teokratiese Bedieningskool gevolg sal word, word afsonderlik voorsien. Die rooster sal ook verduidelik hoe die skool gehou moet word. Jy sal dit dalk prakties vind om die rooster in hierdie boek te hou, waar dit byderhand sal wees.

Wanneer jy vir die weeklikse skoolsessies voorberei, moet jy in gedagte hou dat die Bybel die vernaamste handboek is. Lees eers enige Bybelleesgedeelte wat op die rooster vir die week verskyn. As jy ook die materiaal vir die verskillende programdele vooraf kan lees, sal dit baie voordelig wees.

Tydens die skool sal daar soms geleenthede vir gehoordeelname wees. Maak ten volle gebruik hiervan. As jy aan hierdie besprekings deelneem, sal dit jou baie help om te onthou wat jy hoor en om dit in jou persoonlike lewe toe te pas.

Alle studente sal natuurlik geleenthede hê om toesprake of demonstrasies voor die gemeente te hou. Maak goed gebruik van al hierdie geleenthede. Lê jou werklik daarop toe om te verbeter in die spraakhoedanigheid wat aan jou toegewys is. Jy sal raad gegee word met die doel om verdere vooruitgang te maak. Verwelkom hierdie persoonlike hulp. Maak ’n aantekening in jou boek van spesifieke wenke wat jy persoonlik kan toepas om te verbeter. Aangesien dit moeilik vir iemand is om homself te sien soos ander hom sien, kan die liefdevolle wenke en raad, wat op die Bybel gegrond is, grootliks tot jou vooruitgang bydra. Dit geld selfs as jy al baie jare gelede by die skool aangesluit het.—Spr. 1:5.

Wil jy graag vinniger vooruitgang maak? Jy kan, as jy persoonlike inisiatief aan die dag lê. Bestudeer die materiaal wat in elke studentetoespraak gedek gaan word vooraf. As ’n spreker nie opdaag nie, sal jy vir hom kan instaan, en dit sal jou meer ondervinding gee. Wanneer ander toesprake hou, moet jy aandagtig luister na hoe hulle die materiaal ontwikkel. Ons leer by mekaar.

Daarbenewens kan jy, as jou omstandighede dit toelaat, vinniger vooruitgang maak as jy hierdie handboek vooruit bestudeer. Nadat jy die volgende 15 studies deeglik bestudeer het, kan jy die “Program om jou vermoë as ’n spreker en onderrigter te ontwikkel” deurwerk, wat op bladsy 78 begin. Bestudeer eers elke les en doen die oefeninge daarin. Pas wat jy leer, in jou bediening toe. Dit kan baie tot jou vooruitgang as ’n spreker en as ’n onderrigter van God se Woord bydra.

Die opleiding wat jy in die Teokratiese Bedieningskool ontvang, sal help om jou voor te berei vir die belangrikste sake in die lewe. Aangesien ons weens God se wil lewe, verwesenlik ons die doel van ons bestaan as ons hom loof. Jehovah God verdien die hoogste lof (Op. 4:11). Hierdie opleiding kan ons hiermee help omdat dit ons leer om helder te dink, verstandig op te tree en die wonderlike waarhede in God se geïnspireerde Woord duidelik aan ander oor te dra.

’N FONDAMENT WAAROP ONS KAN VOORTBOU

Die vermoë om doeltreffend te kommunikeer, is ’n kuns. Nie almal is bedrewe daarin nie. Baie handboeke is al geskryf om mense te help om hierin te verbeter. Maar die Skepper, die Een wat mense die vermoë gegee het om te praat, weet meer van spraak en onderrigting as enige menslike instrukteur. Sy enigverwekte Seun het as die Meesterwerker saam met hom gewerk om die mensebrein en die spraakorgane sowel as al die ander wonders van die skepping te maak.

Toe die engele en later die mens geskep is, het die Seun as die Woord van God gedien, die vernaamste Persoon deur wie God self instruksies aan hulle oorgedra het (Spr. 8:30; Joh. 1:1-3). Daardie Seun is as die Here Jesus Christus na die aarde toe gestuur. Van hom sê die geïnspireerde verslag: ‘Die skare was verstom oor die manier waarop hy geleer het.’ En diegene wat hom gehoor het, het gesê: “Nog nooit het ’n ander mens so gepraat nie” (Matt. 7:28; Joh. 7:46). Die Evangelies praat meer as 40 keer van Jesus as die Leermeester, en met goeie rede. Ons kan baie oor die spreek- en onderrigkuns by hom leer.

Die Bybel bevat ook ’n verslag van hoe Jehovah God manne en vroue uit baie agtergronde gebruik het om sy wil te volbring. Party van hulle het kort maar kragtige boodskappe oorgedra. Baie het nie voor groot gehore gepraat nie, maar hulle het getrou van die ware God en sy voorneme getuig. Die meeste van hulle was blykbaar nie besonder welsprekend nie, maar God het hulle pogings geseën. Ons kan leer uit wat die Bybel vir ons sê oor die manier waarop hulle hulle bediening uitgevoer het.—Ps. 68:11.

Die Bybel is natuurlik nie ’n handboek oor die openbare spreekkuns nie. Maar vir diegene wat met onderskeidingsvermoë lees, bevat dit waardevolle lesse oor hoe ’n mens ’n bekwame spreker en onderrigter kan word. Die doel van Vind baat by opleiding in die Teokratiese Bedieningskool is om op hierdie fondament voort te bou.