Koninkryksverkondigers berig
’n Hoofman lug sy mening
DIT is bemoedigend om te weet dat daar hooggeplaaste manne in hierdie wêreld is wat eerlikheid en geregtigheid liefhet en hulle ten gunste van hierdie eienskappe uitspreek. ’n Voorbeeld hiervan is ’n hoofman in ’n Afrika-land waar die werk van Jehovah se Getuies onder beperking staan. Laat die verslag ons vertel:
“Onlangs het verskillende godsdiensgroepe ’n interkerklike byeenkoms in ons dorp gehou, en dit het Katolieke, Presbiteriane, Pinkstergroepe, ensovoorts ingesluit. Die Opperhoof is genooi om die byeenkoms gedurende die sluitingsessies toe te spreek. Tot al die aanwesiges se verbasing het hy hulle onder meer aangesê om die eerlikheid en hoë sedestandaarde van Jehovah se Getuies na te volg en bygevoeg dat as almal soos Jehovah se Getuies was daar vrede in die nasie sou wees.
“Die volgende dag het vername lidmate van die kerke wat by die byeenkoms verteenwoordig is na die Hoofman se paleis gekom en heftig beswaar gemaak teen die deel van sy toespraak wat die Getuies geloof het, en hulle het hom gevra of hy nie daarvan bewus is dat die Getuies se werk in die land in die ban gedoen is nie. Die Hoofman het bevestigend geantwoord, maar hy het vir hulle gesê dat hy geen beswaar teen Jehovah se Getuies het nie. Hy het voorts gesê: ‘In al my jare as Opperhoof is geen getuie van Jehovah nog ooit weens ’n ernstige oortreding voor my hof gedaag nie. Maar as kassawe van ’n plaas gesteel word, blyk dit dikwels dat ’n Katoliek die dief is. As jams gesteel word, is dit ’n Presbiteriaan wat daarvoor verantwoordelik is. Lidmate van julle kerk het my land met aborsies besoedel, en tog is nie een van Jehovah se Getuies weens sulke oortredings voor my hof gedaag nie. Verbied God se wette nie sulke euwels nie, of is die kerke nie meer verplig om God se wet te onderhou nie?’ Die geestelikes het geen antwoord gehad nie.
“Later het die Opperhoof verteenwoordigers van Jehovah se Getuies ingeroep en hulle aangespoor om baie versigtig te wees sodat hulle hul God se naam en sy eie naam as die Opperhoof wat vir Jehovah se Getuies opgekom het nie tot oneer strek nie.”
Die verslag meld dat baie nuwelinge nou hulle standpunt vir die waarheid inneem. Een Getuie sê dat hy onlangs Bybelstudies begin het met drie hoofmanne in die gebied, waarvan een die Opperhoof is, en dat al drie vergaderinge van Jehovah se Getuies bywoon!
Jehovah God let op diegene wat die waarheid en geregtigheid liefhet en ten behoewe van sy knegte daarvoor opkom.—Mattheüs 10:42.