Koninkryksverkondigers berig
“’n Monument ter ere van die gees van samewerking”
NABY die suidelikste punt van Spanje staan ’n ontsaglike kalksteenmonoliet, wat as die Rots van Gibraltar bekend staan. Hierdie rots is al honderde jare lank ’n stille getuie van politieke geskille en internasionale onenigheid. In teenstelling hiermee was die Rots van Gibraltar onlangs die agtergrond vir ’n openbaring van samewerking en eenheid wat selde vandag in die wêreld gesien word.
Net drie kilometer van die Rots af lê die dorp La Línea, Spanje. Daar het die bou van ’n Koninkryksaal van Jehovah se Getuies honderde vrywillige werkers byeengebring wat gretig was om hulle tyd en energie by te dra. Terwyl hulle hard gewerk het om ’n geskikte plek vir die aanbidding van die Skepper, Jehovah God, op te rig, was selfs die majestueuse Rots van Gibraltar in die agtergrond onbeduidend in vergelyking met die taak waarmee hulle besig was.
Die Koninkryksverkondigers in daardie deel van die wêreld het die volgende verslag gestuur:
“Negehonderd geesdriftige vrywilligers het van Vrydagmiddag, 24 September 1993, dag en nag ononderbroke gewerk. Teen sewe-uur Sondagaand was ’n nuwe naambord aangebring wat die gebou as ’n Koninkryksaal van Jehovah se Getuies identifiseer en is die aantreklike nuwe gebou vir sy heel eerste openbare vergadering gebruik.
“Baie Getuies van die nabygeleë Gibraltar het die grens oorgesteek om hulle Spaanse broers te help. ‘Politieke verdeeldheid demp nie die gees van ons internasionale broederskap nie’, het een van die vrywilligers, ’n inwoner van Gibraltar, verduidelik. Hy het bygevoeg: ‘Etlike jare gelede het vriende van La Línea ons kom help om ons Koninkryksaal in Gibraltar te bou, en nou is ons bly dat ons húlle weer kan help.’
“Om die onselfsugtige pogings van die twee gemeentes van Jehovah se Getuies en van honderde bedrewe helpers uit die Andalusië-streek aan te vul, het die stad La Línea besluit om die nodige perseel te skenk. Die burgemeester van La Línea het tydens ’n besoek aan die bouterrein verduidelik: ‘Spaanse plaaslike owerhede het volgens tradisie nog altyd grond vir die bou van Katolieke kerke voorsien. Waarom kan ons dan nie dieselfde vir ander godsdienste doen nie? Ek is baie beïndruk met die onselfsugtigheid van die vrywilligers, en ek dink hulle verdien ons ondersteuning. Ons het meer van hierdie soort gees in die verdeelde wêreld van vandag nodig.’
“Hy het na die Koninkryksaal as ‘’n monument ter ere van die gees van samewerking’ verwys. Die indrukwekkendste aspek was inderdaad nie die ontwerp of die grootte van die gebou nie. Wat baie mense in die gemeenskap beïndruk het, was eerder die feit dat al die bouwerk deur vrywilligers gedoen is en dat dit in slegs 48 uur opgerig is!”
Dit is duidelik dat Jehovah se Getuies in La Línea en die omliggende gebiede die woorde van Galasiërs 6:10 gehoorsaam. Daar het die apostel Paulus medegelowiges aangespoor: “Laat ons dan, terwyl ons geleentheid het, aan almal goed doen, maar die meeste aan die huisgenote van die geloof.”