Hoe beskou jy sonde?

“DAAR is geen sonde in jou nie, daar is geen ellende in jou nie; jy is die bron van almagtige krag.” Die beroemde Hindoefilosoof Vivekananda het hierdie stelling gemaak toe hy ’n gedeelte uit ’n heilige boek van die Hindoes, die Bhagavad Gita, verduidelik het. Hy het die Vedanta aangehaal en gesê: “Die grootste fout is om te sê dat jy swak is, dat jy ’n sondaar is.”a

Maar is dit waar dat daar geen sonde in die mens is nie? En wat, indien enigiets, erf ’n mens by jou geboorte? Dit is alleenlik “fisiese eienskappe wat deur oorerwing bepaal word”, sê Nikhilananda, ’n Hindoedenker. Ander karaktertrekke word deur ’n mens se “dade in vorige lewens” vasgestel. Volgens Vivekananda “is jy die skepper van jou lot”. Hindoeïsme leer niks oor oorgeërfde sonde nie.

Die begrip van oorgeërfde sonde is ook afwesig onder die Zoroastriste, die Sjintoïste, die Confucianiste en die Boeddhiste. Selfs in die Joods-Christelike godsdienste, wat tradisioneel die leerstelling van oorgeërfde sonde geleer het, verander die gesindheid teenoor sonde. Vandag dink al hoe meer mense nie aan hulleself as sondig nie.

“Hedendaagse denke bevorder nie sedelike verwyt nie; dit bevorder veral nie selfverwyt nie”, sê teoloog Cornelius Plantinga jr. Die kerke van die Christendom dra deel van die skuld dat die erns van sonde gekleineer word. “Moenie kerk toe gaan as jy van sonde wil hoor nie”, sê ’n kapelaan van die Duke-universiteit. En volgens Plantinga praat party kerke gewoonlik slegs van sonde wanneer dit met maatskaplike geskille verband hou.

Daar is vandag weliswaar baie maatskaplike probleme. Geweld, misdaad, oorloë, etniese konflik, dwelmmisbruik, oneerlikheid, onderdrukking en geweld teen kinders vier hoogty. Trouens, die 20ste eeu is al een van die bloedigste eeue genoem wat die mensdom nog geken het. Voeg hierby die pyn en lyding wat die gevolg is van siekte, ouderdom en die dood. Wie wil nie graag bevry word van die ontsaglike probleme wat daar vandag in die wêreld is nie?

Wat is dus jou beskouing oor sonde? Word sonde oorgeërf? Sal ons ooit vryheid van pyn en lyding ondervind? Die volgende artikel sal hierdie vrae bespreek.

[Voetnoot]