Waarom moet jy in Jesus Christus glo?

“SELFS baie mense wat nie Christene is nie, glo dat Hy ’n groot en wyse onderrigter was. Hy was beslis een van die invloedrykste mense wat nog geleef het” (The World Book Encyclopedia). Wie is “Hy”? Jesus Christus, die stigter van die Christelike geloof.

Maar ondanks wat die ensiklopedie sê, is Jesus Christus vir honderdmiljoene mense in die Ooste en elders ’n vreemdeling, net ’n naam wat hulle dalk in hulle hoërskoolhandboeke gesien het. Selfs in die kerke van die Christendom is daar teoloë en geestelikes wat sê dat ons Jesus in werklikheid nie ken nie en wat die egtheid van die vier bestaande verslae van sy lewe (die Evangelies) wat in die Bybel gevind word in twyfel trek.

Kon die Evangelieskrywers die lewensverhaal van Jesus versin het? Beslis nie! Nadat die bekende geskiedskrywer Will Durant hierdie Evangelieverslae noukeurig ondersoek het, het hy geskryf: “As ’n paar eenvoudige manne in een geslag so ’n kragtige en aantreklike persoon, so ’n verhewe etiek en so ’n besielende visioen van die broederskap van die mens kon skep, sou dit ’n wonderwerk wees wat veel groter is as enige van dié wat in die Evangelies opgeteken is. Ná twee eeue van Hoër Kritiek bly die hooftrekke van die lewe, karakter en leer van Christus redelik duidelik, en dit vorm die boeiendste aspek van die geskiedenis van die Westerse mens.”

Daar is nogtans mense wat meen dat Jesus Christus hulle aandag nie werd is nie weens die dinge wat sy voorgewende volgelinge al gedoen het. ‘Hulle het ’n atoombom op Nagasaki gegooi’, sê sommige mense in Japan. ‘En Nagasaki het meer Christene gehad as die meeste ander stede in Japan.’ Maar kan jy ’n dokter blameer vir ’n pasiënt se siekte as die pasiënt nie die dokter se raad volg nie? Die meeste mense wat beweer dat hulle Christene is, ignoreer al lank Jesus se voorskrifte om die mensdom se probleme die hoof te bied. Tog het Jesus die geneesmiddel gegee vir ons daaglikse probleme sowel as vir die probleme van mense regoor die wêreld. Dit is waarom ons jou nooi om die volgende artikel te lees en self te sien watter soort mens hy was.