Gemoedsrus—Hoe kan jy dit vind?
Daar is baie verskille tussen ons tyd en dié van Thoreau, wat in die vorige artikel gemeld is. Een groot verskil is dat daar vandag geen tekort is aan raad oor hoe om gemoedsrus te verkry nie. Sielkundiges en skrywers van selfhelpboeke—selfs koerantrubriekskrywers—gee hulle idees. Hulle raad help mense dalk op die kort termyn; maar iets van ’n meer diepgaande aard is nodig vir langtermynoplossings. Dít is wat die individue wat in die vorige artikel gemeld is, uitgevind het.
ANTÔNIO, Marcos, Gerson, Vania en Marcelo het uit verskillende agtergronde gekom en het verskillende probleme gehad. Maar hulle het ten minste drie dinge in gemeen gehad. Eerstens was daar ’n tyd toe hulle ‘geen hoop gehad het nie en sonder God in die wêreld was’ (Efesiërs 2:12). Tweedens het hulle na gemoedsrus gesmag. En derdens het hulle almal, nadat hulle ’n Bybelstudie saam met Jehovah se Getuies aanvaar het, die gemoedsrus gevind wat hulle graag wou hê. Namate hulle in hulle studie gevorder het, het hulle besef dat God in hulle belangstel. Trouens, soos Paulus vir die Ateners van sy dag gesê het, is God “nie ver van elkeen van ons af . . . nie” (Handelinge 17:27). Dit is baie belangrik dat ’n mens opreg hiervan oortuig moet wees as jy gemoedsrus wil verkry.
Waarom is daar so min vrede?
Die Bybel gee twee basiese redes vir die gebrek aan vrede in die wêreld—of dit nou innerlike vrede of vrede tussen mense is. Die eerste rede word verduidelik in Jeremia 10:23: “Ek weet, o HERE, dat aan die mens sy weg nie toebehoort nie; nie aan ’n man om te loop en sy voetstappe te rig nie.” Die mens het nie die wysheid of die versiendheid om sonder hulp oor homself te regeer nie, en die enigste hulp wat werklik van waarde is, kom van God. Mense wat nie God se leiding wil hê nie, sal nooit blywende vrede vind nie. Die tweede rede waarom daar nie vrede is nie, word in die woorde van die apostel Johannes gevind: “Die hele wêreld lê in die mag van die bose” (1 Johannes 5:19). Sonder Goddelike leiding sal die mens se pogings om vrede te verkry altyd misluk weens die bedrywighede van die onsigbare dog werklike—en baie magtige—“bose”, Satan.
Weens hierdie twee redes—die feit dat die meeste mense nie op God se leiding staatmaak nie en dat Satan baie bedrywig is in die wêreld—is die hele mensdom in ’n ellendige toestand. Die apostel Paulus het dit goed beskryf: ‘Die hele skepping kreun voortdurend saam en ly voortdurend saam pyn tot nou toe’ (Romeine 8:22). Wie kan nie met hierdie beoordeling saamstem nie? In ryk sowel as arm nasies word mense van hulle gemoedsrus beroof deur gesinsprobleme, misdaad, ongeregtigheid, persoonlikheidsverskille, ekonomiese onsekerheid, stam- en etniese haat, onderdrukking, siekte en baie ander dinge.
Hoe ’n mens gemoedsrus kan vind
Toe Antônio, Marcos, Gerson, Vania en Marcelo God se Woord, die Bybel, bestudeer het, het hulle dinge geleer wat hulle lewe verander het. Om maar een ding te noem, hulle het geleer dat die wêreldsituasie eendag anders gaan wees. Dit is nie net ’n vae hoop dat alles op die ou end sal regkom nie. Dit is ’n vaste vertroue wat op goeie grond berus dat God ’n voorneme met die mens het en dat ons selfs nou by daardie voorneme baat kan vind as ons sy wil doen. Hulle het wat hulle uit die Bybel geleer het in hulle lewe toegepas, en hulle lewe het verbeter. Hulle het groter geluk en vrede gevind as wat hulle gedink het moontlik is.
Antônio raak nie meer by protesoptogte en arbeidstwiste betrokke nie. Hy weet dat veranderinge wat op dié manier teweeggebring word maar beperk en tydelik is. Hierdie voormalige arbeidsleier het van God se Koninkryk geleer. Dit is die Koninkryk waarvoor miljoene bid wanneer hulle in die Onse Vader vir God vra: “Laat u koninkryk kom” (Matteus 6:10a). Antônio het geleer dat God se Koninkryk ’n werklike hemelse regering is wat ware vrede vir die mensdom gaan bring.
Marcos het geleer om die Bybel se wyse raad oor die huwelik toe te pas. Gevolglik is hierdie voormalige politikus nou gelukkig herenig met sy vrou. Hy sien ook uit na die tyd, wat binnekort gaan kom, wanneer God se Koninkryk hierdie hebsugtige, selfsugtige wêreldstelsel met ’n beter een gaan vervang. Hy verstaan nou hierdie sin in die Onse Vader baie beter: “Laat u wil geskied, soos in die hemel, so ook op die aarde” (Matteus 6:10b). Wanneer God se wil op die aarde geskied, sal mense ’n lewensgehalte geniet wat nog nooit tevore ondervind is nie.
Wat van Gerson? Hy is nie meer ’n swerwer en ’n dief nie. Die lewe van hierdie voormalige straatkind is nou sinvol omdat hy sy energie gebruik om ander te help om gemoedsrus te vind. Soos hierdie ondervindinge toon, kan ’n studie van die Bybel en die toepassing van wat dit sê ’n mens se lewe beslis verbeter.
Gemoedsrus in ’n wêreld vol probleme
Die sentrale geskiedkundige figuur in die uitvoering van God se wil is Jesus Christus, en wanneer mense die Bybel saam met Jehovah se Getuies bestudeer, leer hulle baie aangaande hom. Die nag toe hy gebore is, het engele God geloof: “Heerlikheid aan God in die hoogtes daar bo, en op aarde vrede onder mense van welwillendheid” (Lukas 2:14). Toe Jesus grootgeword het, het hy daarin belanggestel om mense se lewens te verbeter. Hy het hulle gevoelens verstaan en buitengewone medelye teenoor die geteisterdes en die siekes getoon. En in ooreenstemming met die woorde van die engele het hy die saggeaardes gehelp om ’n mate van innerlike vrede te geniet. Aan die einde van sy bediening het hy vir sy dissipels gesê: “Ek laat vir julle vrede na, ek gee julle my vrede. Ek gee dit nie vir julle soos die wêreld dit gee nie. Moenie dat julle hart verontrus word of van vrees ineenkrimp nie.”—Johannes 14:27.
Jesus was meer as net ’n filantroop. Hy het homself met ’n herder vergelyk, en hy het sy saggeaarde volgelinge met skape vergelyk toe hy gesê het: “Ek het gekom sodat hulle lewe kan hê, en dit in oorvloed kan hê. Ek is die voortreflike herder; die voortreflike herder doen ten behoewe van die skape afstand van sy siel” (Johannes 10:10, 11). Ja, in teenstelling met soveel leiers van vandag wat allereers vir hulleself sorg, het Jesus sy lewe vir sy skape gegee.
Hoe kan ons baat vind by wat Jesus gedoen het? Baie ken dié woorde: “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê” (Johannes 3:16). Om geloof in Jesus te beoefen, verg eerstens kennis van hom en sy Vader, Jehovah. Kennis van God en Jesus Christus kan tot ’n intieme verhouding met Jehovah God lei wat ons sal help om gemoedsrus te verkry.
Jesus het gesê: “My skape luister na my stem, en ek ken hulle, en hulle volg my. En ek gee hulle die ewige lewe, en hulle sal beslis nooit vernietig word nie, en niemand sal hulle uit my hand ruk nie” (Johannes 10:27, 28). Watter hartlike, bemoedigende woorde tog! Jesus het dit weliswaar byna tweeduisend jaar gelede gesê, maar dit het vandag net soveel krag as wat dit destyds gehad het. Moet nooit vergeet dat Jesus Christus lewe en bedrywig is en nou as die gekroonde Koning van God se hemelse Koninkryk heers nie. En hy is nog net so besorg oor die saggeaardes wat na gemoedsrus smag as wat hy jare gelede was toe hy op die aarde gelewe het. Daarbenewens is hy nog steeds die Herder van sy skape. As ons hom volg, sal hy ons help om gemoedsrus te verkry, wat die versekerde verwagting van algehele vrede in die toekoms insluit—en dit beteken dat daar geen geweld, oorlog en misdaad sal wees nie.
Dit kan ons werklik tot voordeel strek as ons weet en glo dat Jehovah ons deur middel van Jesus sal help. Onthou jy Vania, wat as ’n jong meisie met groot verantwoordelikhede agtergelaat is en gedink het dat God van haar vergeet het? Nou weet Vania dat God haar nie verlaat het nie. Sy sê: “Ek het geleer dat God ’n werklike persoon met innemende eienskappe is. Sy liefde het hom beweeg om sy Seun aarde toe te stuur om aan ons lewe te gee. Dit is baie belangrik om dit te weet.”
Marcelo bevestig dat hy ’n persoonlike verhouding met God het. Hierdie voormalige partytjieganger sê: “Jongmense weet dikwels nie wat om te doen nie, en op die ou end skaad hulle hulleself. Party begin dwelms misbruik, soos ek gedoen het. Ek hoop dat baie meer mense geseën sal word, soos ek geseën is, deur die waarheid aangaande God en sy Seun te leer.”
Deur middel van ’n noukeurige studie van die Bybel het Vania en Marcelo ’n sterk geloof in God opgebou, asook ’n vertroue in sy gewilligheid om hulle te help om hulle probleme die hoof te bied. As ons doen wat hulle gedoen het—die Bybel bestudeer en toepas wat dit sê—sal ons ’n groot mate van gemoedsrus verkry, net soos dit met hulle die geval was. Dan sal die bemoedigende woorde van die apostel Paulus werklik in ons geval van toepassing wees: “Moet oor niks besorg wees nie, maar laat julle versoeke in alles deur gebed en smeking tesame met danksegging by God bekend word; en die vrede van God wat alle denke te bowe gaan, sal julle harte en julle verstandelike vermoëns deur middel van Christus Jesus bewaak.”—Filippense 4:6, 7.
Hoe om vandag ware vrede te vind
Jesus Christus lei mense wat na die waarheid honger op die weg na die ewige lewe op ’n aardse paradys. Terwyl hy hulle na die rein aanbidding van God lei, ondervind hulle vrede wat soortgelyk is aan die vrede wat in die Bybel beskryf word: “My volk sal woon in ’n plek van vrede en in veilige wonings en in plekke van ongestoorde rus” (Jesaja 32:18). En dit is net ’n voorsmakie van die vrede wat hulle in die toekoms sal geniet. Ons lees: “Die ootmoediges . . . sal die aarde besit en hulle verlustig oor groot vrede. Die regverdiges sal die aarde besit en vir ewig daarop woon.”—Psalm 37:11, 29.
Kan ons dus vandag gemoedsrus geniet? Ja. Wat meer is, ons kan seker wees dat God gehoorsame mense in die nabye toekoms met vrede gaan seën soos nog nooit tevore nie. Jy kan hom derhalwe gerus in gebed vra om jou sy vrede te gee. As jy probleme het wat jou van vrede beroof, kan jy bid soos koning Dawid gebid het: “Die benoudhede van my hart is wyd uitgestrek; lei my uit my angste. Aanskou my ellende en my moeite, en vergeef al my sondes” (Psalm 25:17, 18). Wees daarvan verseker dat God sulke gebede verhoor. Hy strek sy hand uit en gee vrede aan almal wat met ’n opregte hart daarna soek. Ons word liefdevol verseker: “Die HERE is naby almal wat Hom aanroep, almal wat Hom aanroep in waarheid. Hy vervul die wens van die wat Hom vrees, en Hy hoor hul hulpgeroep en verlos hulle.”—Psalm 145:18, 19.
[Lokteks op bladsy 5]
Die mens het nie die wysheid of die versiendheid om sonder hulp oor homself te regeer nie, en die enigste hulp wat werklik van waarde is, kom van God
[Lokteks op bladsy 6]
Kennis van God en Jesus Christus kan lei tot ’n intieme verhouding met Jehovah God wat ons sal help om gemoedsrus te verkry
[Prent op bladsy 7]
Die toepassing van Bybelraad dra by tot ’n vreedsame gesinslewe