Hoe jy nader kan kom aan God
“Kom nader aan God, en hy sal nader aan julle kom”, sê Jakobus 4:8. Jehovah God het getoon hoe graag hy wil hê dat mense ’n hegte verhouding met hom moet hê deur sy Seun ten behoewe van ons op te offer.
IN REAKSIE op hierdie liefdevolle gebaar het die apostel Johannes geskryf: “Ons het [God] lief omdat hy ons eerste liefgehad het” (1 Johannes 4:19). Maar as ons persoonlik nader wil kom aan God, moet ons sekere stappe neem. Dit is soortgelyk aan die vier maniere waarop ons nader kom aan ander mense, soos dit in die vorige artikel uiteengesit is. Kom ons ondersoek hierdie stappe nou.
Neem God se wonderlike eienskappe waar
God het talle wonderlike eienskappe, waarvan die voortreflikste sy liefde, wysheid, geregtigheid en krag is. Sy wysheid en krag word in oorvloedige mate geopenbaar in die uitgestrekte heelal sowel as in die wêreld om ons, van reusagtige sterrestelsels tot piepklein atome. Die psalmis het geskryf: “Die hemele vertel die eer van God, en die uitspansel verkondig die werk van sy hande.”—Psalm 19:2; Romeine 1:20.
Die skepping weerspieël ook God se liefde. Die manier waarop ons gemaak is, toon byvoorbeeld dat God wil hê dat ons die lewe moet geniet. Hy het ons die vermoë gegee om kleure te sien, om te proe en te ruik, om musiek te geniet, om te lag, om skoonheid te waardeer, en hy het ons ook soveel ander gawes en eienskappe gegee wat nie werklik lewensnoodsaaklik is nie. Ja, God is waarlik vrygewig, goedhartig en liefdevol—eienskappe wat ongetwyfeld daartoe bydra dat hy “die gelukkige God” is.—1 Timoteus 1:11; Handelinge 20:35.
Jehovah verheug hom daarin dat die uitoefening van sy soewereiniteit en sy intelligente skepsele se steun daaraan hoofsaaklik op liefde gegrond is (1 Johannes 4:8). Jehovah is weliswaar die Universele Soewerein, maar hy behandel mense, veral sy lojale knegte, soos ’n liefdevolle vader sy kinders behandel (Matteus 5:45). Hy hou niks terug wat tot hulle voordeel is nie (Romeine 8:38, 39). Soos reeds gemeld is, het hy selfs die lewe van sy enigverwekte Seun ten behoewe van ons gegee. Ja, God se liefde is die rede waarom ons bestaan en die vooruitsig op ewige lewe het.—Johannes 3:16.
Jesus het ons diepe insig in God se persoonlikheid gegee omdat hy sy Vader volmaak nagevolg het (Johannes 14:9-11). Hy was volkome onselfsugtig, liefdevol en bedagsaam. By een geleentheid het Jesus ’n man ontmoet wat doof was en ’n spraakgebrek gehad het. Jy kan jou voorstel dat die man dalk in skares ongemaklik sou gevoel het. Interessant genoeg, Jesus het hierdie man eenkant toe geneem en hom daar genees (Markus 7:32-35). Waardeer jy mense wat jou gevoelens in ag neem en jou waardigheid respekteer? Indien wel, sal jy beslis nader kom aan Jehovah en Jesus namate jy meer van hulle leer.
Dink na oor God se eienskappe
Al het iemand dalk wonderlike eienskappe, moet ons aan hom dink as ons tot hom aangetrokke wil voel. Dieselfde geld vir Jehovah. Om oor sy eienskappe te peins, is ’n noodsaaklike tweede stap as ons nader wil kom aan hom. Koning Dawid, wat waarlik lief was vir Jehovah en wat ’n man “na [Jehovah se] hart” was, het gesê: “Ek dink aan die dae uit die voortyd; ek peins oor al u dade; ek dink ná oor die werk van u hande.”—Handelinge 13:22; Psalm 143:5.
Peins jy, soos Dawid, oor wat jy sien en lees wanneer jy die wonders van die skepping sien of God se Woord, die Bybel, lees? Stel jou ’n seun voor wat pas ’n brief ontvang het van sy vader vir wie hy baie lief is. Hoe sou hy daardie brief beskou? Hy sou die brief beslis nie net vlugtig lees en dit in ’n laai gooi nie. Hy sou dit eerder bestudeer en elke besonderheid en nuanse daaruit kry. God se Woord moet eweneens vir ons kosbaar wees, net soos dit vir die psalmis was wat gesing het: “Hoe lief het ek u wet; dit is my bepeinsing die hele dag.”—Psalm 119:97.
Behou goeie kommunikasie
Goeie kommunikasie is die lewensbloed van enige verhouding. Dit behels dat ’n mens praat en luister—en nie net met die verstand nie, maar ook met die hart. Ons praat met die Skepper deur middel van gebed, wat eerbiedige spraak met God is. Jehovah skep behae in die gebede van diegene wat hom liefhet en hom dien en wat Jesus Christus as Sy hoofverteenwoordiger erken.—Psalm 65:3; Johannes 14:6, 14.
In die verlede het God op verskillende maniere met mense gepraat, onder meer in visioene, in drome en deur middel van engele. Maar deesdae praat hy met mense deur middel van sy geskrewe Woord, die Heilige Bybel (2 Timoteus 3:16). Die geskrewe Woord het baie voordele. Dit kan te eniger tyd geraadpleeg word. Soos ’n brief kan dit oor en oor gelees word. En dit kan nie verdraai word nie, soos dikwels die geval is met mondelinge oorvertelling. Dink dus aan die Bybel as ’n groot versameling briewe van jou geliefde hemelse Vader, en laat hom toe om daagliks deur middel van hierdie briewe met jou te praat.—Matteus 4:4.
Die Bybel sit byvoorbeeld Jehovah se beskouing van reg en verkeerd uiteen. Dit verduidelik sy voorneme met die mens en met die aarde. En dit openbaar sy handelinge met ’n groot verskeidenheid mense en nasies, van lojale aanbidders tot bittere vyande. Deur sy interaksie met mense op dié manier te laat opteken, het Jehovah ’n besonder volledige beeld geskilder van sy persoonlikheid. Hy openbaar sy liefde, vreugde, smart, teleurstelling, toorn, barmhartigheid, besorgdheid—ja, die omvang van sy gedagtes en gevoelens en die onderliggende redes hiervoor—alles op ’n manier waarop mense dit maklik kan verstaan.—Psalm 78:3-7.
Hoe kan jy baat vind by wat jy gelees het nadat jy ’n gedeelte van God se Woord gelees het? En meer in die besonder, hoe kan jy nader kom aan God? Dink eerstens aan wat jy gelees het en wat jy omtrent God as ’n persoon geleer het, en laat die punte in jou hart insink. Dan kan jy in gebed vir Jehovah sê wat jy dink en wat jou diepste gevoelens is oor die materiaal wat jy gelees het en hoe jy voordeel daaruit sal probeer trek. Dít is kommunikasie. As jy natuurlik iets anders op die hart het, kan jy dit beslis in jou gebed insluit.
Doen dinge saam met God
Die Bybel sê dat sekere getroue manne uit die ou tyd met, of voor, die ware God gewandel het (Genesis 6:9; 1 Konings 8:25). Wat beteken dit? Hoofsaaklik dat hulle elke dag gelewe het asof God net daar saam met hulle was. Hulle was weliswaar sondige mense. Maar hulle het God se wette en beginsels liefgehad, en hulle het in ooreenstemming met God se voorneme gelewe. Jehovah word deur sulke mense aangetrek, en hy gee vir hulle om, soos Psalm 32:8 toon: “Ek wil jou onderrig en jou leer aangaande die weg wat jy moet gaan; Ek wil raad gee; my oog sal op jou wees.”
Jy kan ook Jehovah as ’n intieme vriend hê—’n vriend wat met jou wandel, vir jou omgee en jou vaderlike raad gee. Die profeet Jesaja het Jehovah beskryf as die Een “wat jou leer om jouself te bevoordeel, wat jou laat loop op die weg wat jy moet bewandel” (Jesaja 48:17, NW). Namate ons hierdie voordele geniet, voel ons Jehovah se teenwoordigheid aan, dat hy as ’t ware “aan [ons] regterhand is”, net soos Dawid gevoel het.—Psalm 16:8.
God se eienskappe lê in sy naam opgesluit
Baie godsdienste en al hoe meer Bybelvertalings gebruik nie God se persoonlike naam nie en maak dit ook nie bekend nie (Psalm 83:18, NW). En tog verskyn hierdie naam—Jehovah—meer as 7 000 keer in die oorspronklike Hebreeuse teks! (Die meeste Bybelvertalers is nie konsekwent nie, want hulle verwyder die Goddelike naam, maar behou die name van die talle valse gode wat in die oorspronklike teks genoem word, soos Baäl, Bel, Merodag en selfs Satan!)
Party mense meen dat die weglating van God se naam ’n kleinigheid is. Maar dink hieraan: Is dit moeiliker of makliker om ’n hegte, ingeligte verhouding met ’n naamlose persoon op te bou? Titels soos God en Here (wat ook vir valse gode gebruik word) vestig dalk die aandag op Jehovah se krag, gesag of posisie, maar net sy persoonlike naam identifiseer hom op onmiskenbare wyse (Exodus 3:15, NW; 1 Korintiërs 8:5, 6). Al die eienskappe en karaktertrekke van die ware God lê in sy persoonlike naam opgesluit. Die teoloog Walter Lowrie het tereg gesê: “Iemand wat God nie by name ken nie, ken hom nie werklik as ’n persoon nie.”
Kyk na die voorbeeld van Maria, ’n opregte Katoliek wat in Australië woon. Toe Jehovah se Getuies haar aanvanklik ontmoet het, het Maria die Getuies toegelaat om haar God se naam in die Bybel te wys. Hoe het sy gereageer? “Toe ek God se naam die eerste keer in die Bybel sien, het ek gehuil. Ek is so ontroer deur die wete dat ek in werklikheid die persoonlike naam van God kon ken en gebruik.” Maria het aangehou om die Bybel te bestudeer, en vir die eerste keer in haar lewe het sy Jehovah as ’n persoon leer ken en kon sy ’n blywende verhouding met hom opbou.
Ja, ons kan ‘na aan God kom’, hoewel ons hom nie met ons letterlike oë kan sien nie. Ons kan sy besonder mooi persoonlikheid met ons verstand en hart “sien”, en sodoende sal ons liefde vir hom toeneem. Hierdie liefde “is ’n volmaakte band van eenheid”.—Kolossense 3:14.
[Venster/Prent op bladsy 6]
Jehovah beantwoord jou liefde vir hom
’N VERHOUDING kom van twee kante. Namate ons nader aan God kom, reageer hy deur nader aan ons te kom. Dink byvoorbeeld aan sy gevoelens vir die bejaarde Simeon en Anna, wat albei spesiaal vermeld is in die Bybel. Die Evangelieskrywer Lukas sê vir ons dat Simeon “regverdig en godvresend” was en op die Messias gewag het. Jehovah het hierdie goeie eienskappe in Simeon raakgesien en liefde aan hierdie dierbare ou man betoon deur aan hom te openbaar dat “hy die dood nie sou sien voordat hy die Christus . . . gesien het nie”. Jehovah het sy belofte nagekom en Simeon na die baba Jesus gelei, wat deur sy ouers na die tempel in Jerusalem gebring is. Simeon, wat verheug en vol waardering was, het die baba in sy arms geneem en gebid: “Nou laat u, Soewereine Heer, u slaaf in vrede gaan volgens u verklaring; want my oë het u middel tot redding gesien.”—Lukas 2:25-35.
“In daardie selfde uur” het Jehovah ook sy liefde vir die 84-jarige Anna getoon deur haar ook na Jesus toe te lei. Hierdie dierbare weduwee, sê die Bybel vir ons, was altyd by die tempel en het aan Jehovah “heilige diens verrig”. Sy was vol waardering en het, soos Simeon, Jehovah gedank vir sy uitsonderlike goedhartigheid, waarna sy “met almal wat op Jerusalem se verlossing gewag het” oor die kind gepraat het.—Lukas 2:36-38.
Ja, Jehovah het gesien hoe innig Simeon en Anna hom liefgehad en gevrees het en hoe belangrik die verwesenliking van sy voorneme vir hulle was. Laat sulke Bybelverslae jou nie nader aan Jehovah kom nie?
Soos sy Vader het Jesus ook die ware innerlike mens raakgesien. Terwyl hy mense by die tempel geleer het, het hy opgemerk hoe ’n “behoeftige weduwee” net “twee muntstukkies van baie min waarde” bydra. Vir ander waarnemers sou haar gawe onbeduidend gewees het, maar nie vir Jesus nie. Hy het hierdie vrou geprys omdat sy alles gegee het wat sy gehad het (Lukas 21:1-4). Ons kan dus daarvan verseker wees dat Jehovah en Jesus ons waardeer as ons hulle ons beste gee, ongeag of ons gawe groot of klein is.
Terwyl God hom verbly in diegene wat hom liefhet, voel hy gekrenk wanneer mense hom die rug toekeer en ’n sondige weg inslaan. Genesis 6:6 (NW) sê vir ons dat Jehovah “gekrenk gevoel [het] in sy hart” vanweë die goddeloosheid van mense voor die Vloed van Noag se dag. Later het die ongehoorsame Israeliete “God [keer op keer] op die proef gestel, en hulle het die Heilige van Israel bedroef”, sê Psalm 78:41 (NW). Ja, God is nie ’n afsydige “Eerste Oorsaak” sonder gevoelens nie. Hy is werklik ’n persoon, wie se gevoelens nie, soos ons s’n, ongebalanseerd of afgestomp is weens onvolmaaktheid nie.
[Prente op bladsy 7]
Om oor Jehovah se skepping na te dink, is een manier om nader te kom aan hom