Kan jy nader kom aan ’n onsigbare God?

‘Hoe kan ek ’n hegte verhouding opbou met iemand wat ek nie kan sien nie?’ vra jy dalk. Dit lyk moontlik na ’n geldige vraag. Maar dink hieroor na:

HOE belangrik is sig om liefdevolle en blywende verhoudings op te bou? Is onsigbare faktore nie net so belangrik, indien nie belangriker nie? Beslis! Om dié rede het party mense ’n hegte verhouding met ander opgebou deur gereelde korrespondensie—hulle briewe was ’n eerlike weerspieëling van dit waarvan hulle hou en nie hou nie, van hulle doelwitte, beginsels, sin vir humor en ander karaktertrekke of waarin hulle belangstel.

Blinde mense toon ook dat sig nie onontbeerlik is om ’n hegte verhouding met ’n ander persoon op te bou nie. Neem byvoorbeeld die geval van Edward en Gwen, ’n egpaar wat blind is.a Edward het Gwen by ’n blindeskool ontmoet, waar sy ook ’n volwasse student was. Hy het Gwen se eienskappe, veral haar eerlikheid in spraak en gedrag, en haar uitstekende gesindheid teenoor werk bewonder. Gwen het weer tot Edward aangetrokke gevoel omdat hy, soos sy dit stel, “al die eienskappe aan die dag gelê het wat my ouers my geleer het belangrik is”. ’n Verhouding het tussen hulle ontstaan, en drie jaar later is hulle getroud.

“Wanneer mense saam is”, sê Edward, “maak blindheid nie werklik ’n verskil of jy ’n verhouding met iemand gaan opbou of nie. Julle kan mekaar dalk nie sien nie, maar gevoelens is nie blind nie.” Nou, 57 jaar later, is hulle nog steeds baie lief vir mekaar. Hulle verduidelik dat die geheim van hulle wonderlike verhouding ten minste vier dinge behels: (1) om die eienskappe van die ander persoon waar te neem, (2) om oor hierdie eienskappe na te dink en daardeur aangetrek te word, (3) om goeie kommunikasie te behou en (4) om dinge saam te doen.

Hierdie vier punte is onontbeerlik vir enige goeie verhouding, hetsy dit tussen vriende, huweliksmaats of, nog belangriker, tussen mense en God is. In die volgende artikel sal ons sien hoe die toepassing van hierdie punte ons kan help om ’n hegte verhouding met God op te bou, al kan ons hom nie sien nie.b

[Voetnote]