“Ywerige Koninkryksverkondigers” kom vreugdevol byeen
DIE wêreld word deur sedelike, ekonomiese en politieke krisisse geskud. Te midde van al hierdie beroeringe het Jehovah se Getuies egter drie dae lank vreedsaam vergader vir hulle “Ywerige Koninkryksverkondigers”-streekbyeenkomste. Vanaf Mei 2002 is hierdie byeenkomste regoor die wêreld gehou.
Die streekbyeenkomste was inderdaad vreugdevolle geleenthede. Kom ons hersien kortliks die opbouende Bybelprogram.
Dag een beklemtoon Jesus se ywer
Die tema van die eerste dag van die streekbyeenkoms was “Volg die ywer van ons Heer, Jesus, na” (Johannes 2:17). Die toespraak “Verheug om as Koninkryksverkondigers byeen te kom” het almal in die gehoor hartlik genooi om te deel in die vreugde wat nog altyd ’n kenmerk van byeenkomste van God se volk was (Deuteronomium 16:15). Ná hierdie toespraak is onderhoude met ywerige verkondigers van die goeie nuus gevoer.
Die toespraak “Verlustig jou in Jehovah” was ’n vers-vir-vers-bespreking van Psalm 37:1-11. Ons is gemaan om nie “driftig [te] wees” oor die oënskynlike sukses van die goddeloses nie. Al gee bose mense ’n wanvoorstelling van ons, sal Jehovah mettertyd duidelik maak wie werklik sy getroue knegte is. Die toespraak “Toon dat julle dankbaar is” het bespreek hoe ons dankbaarheid teenoor God kan toon. Alle Christene moet “’n lofoffer” aan Jehovah bring (Hebreërs 13:15). Die hoeveelheid tyd wat ons aan Jehovah se diens wy, hang natuurlik af van ons waardering en omstandighede.
Die programrede se tema was “Koninkryksverkondigers met ywer besiel”. Dit het daarop gewys dat Jesus Christus vir ons die beste voorbeeld van ywer is. Nadat die hemelse Koninkryk in 1914 opgerig is, het ware Christene ywer nodig gehad om daardie goeie nuus bekend te maak. Die spreker het na die byeenkoms in 1922 by Cedar Point, Ohio, VSA, verwys en ons aan die geskiedkundige oproep herinner: “Adverteer die Koning en sy koninkryk”! Met verloop van tyd het die ywer van God se getroue knegte hulle beweeg om die wonderlike Koninkrykswaarhede aan al die nasies te verkondig.
Die toespraak “Wees vreesloos, want Jehovah is met ons”, wat die middag van die eerste dag gehou is, het getoon dat God se volk ’n spesiale teiken van Satan is. Maar as ons nadink oor die talle Bybelse en hedendaagse voorbeelde van geloof, gee dit ons die moed om toetse en versoekings, ten spyte van teenstand, vreesloos die hoof te bied.—Jesaja 41:10.
Volgende op die program was ’n driedelige simposium oor die tema “Miga se profesie versterk ons om in Jehovah se naam te wandel”. Die eerste spreker het die sedelike verval, godsdiensafvalligheid en materialisme van Miga se dag met ons tyd vergelyk. Hy het gesê: “Ons sal ’n vaste hoop op die toekoms hê as ons ’n gehoorsame hart ontwikkel en verseker dat ons gedrag heilig en ons lewe gevul is met dade van godvrugtige toegewydheid—en as ons nooit vergeet dat Jehovah se dag sal kom nie.”—2 Petrus 3:11, 12.
Die tweede spreker van die simposium het Miga se veroordeling van Juda se leiers bespreek. Hulle het arm, weerlose mense onderdruk. Maar Miga het ook voorspel dat ware aanbidding sal seëvier (Miga 4:1-5). Versterk deur Jehovah se heilige gees, is ons vasbeslote om hierdie verkwikkende boodskap van hoop te verkondig. Maar gestel ons voel beperk weens fisiese gebreke of om ander redes. Die derde spreker het gesê: “Jehovah se vereistes is redelik sowel as bereikbaar.” Hy het toe verskeie aspekte van Miga 6:8 bespreek, waar ons lees: “Wat anders vra Jehovah van jou terug as om geregtigheid te beoefen en goedhartigheid lief te hê en beskeie te wandel met jou God?”
Aangesien Christene beïnvloed kan word deur die sedelike verval in die wêreld, het ons almal baat gevind by die toespraak “Bly kuis deur jou hart te bewaak”. Kuisheid sal ons byvoorbeeld help om ’n gelukkige huwelik te hê. As Christene moet ons nie eers daaraan dink om onsedelik te wees nie.—1 Korintiërs 6:18.
Die toespraak “Waak teen bedrog” het getoon dat dit verstandig is om die wanvoorstellings, halwe waarhede en blatante leuens wat deur afvalliges versprei word, as gif te beskou (Kolossense 2:8). Ons moet onsself ook nie bedrieg deur te dink dat ons aan sondige begeertes kan toegee sonder rampspoedige gevolge nie.
“Aanbid die enigste ware God” was die tema van die slottoespraak op die eerste dag. Namate wêreldtoestande versleg, is dit tog so bemoedigend om te weet dat Jehovah binnekort sy regverdige nuwe wêreld sal bring! Wie sal daarin lewe? Net diegene wat Jehovah aanbid. Om ons, ons kinders en ons Bybelstudente te help om hierdie doelwit te bereik, het die spreker die nuwe studiehulp Aanbid die enigste ware God vrygestel. Hoe verheug was ons tog om dit te ontvang!
Dag twee beklemtoon ywer vir wat goed is
Die tweede dag van die byeenkoms se tema was “Wees ywerig vir wat goed is” (1 Petrus 3:13). Die eerste spreker het die Bybelteks vir die dag bespreek. Hy het beklemtoon dat ’n gereelde, betekenisvolle bespreking van die dagteks ons ywer laat toeneem.
Daarna het die simposium “Koninkryksverkondigers wat hulle bediening verheerlik” gevolg. Die eerste deel het getoon dat dit belangrik is om God se Woord reg te hanteer (2 Timoteus 2:15). As ons die Bybel goed gebruik, kan dit ‘krag uitoefen’ in mense se lewens (Hebreërs 4:12). Ons moet die aandag op die Bybel vestig en oortuigend daaroor redeneer. Die tweede deel van die simposium het ons aangespoor om herhaaldelik terug te gaan na belangstellendes (1 Korintiërs 3:6). Voorbereiding en vrymoedigheid is nodig om so gou as moontlik na alle belangstellendes terug te gaan. Die derde deel het ons aangeraai om elke persoon wat ons ontmoet, as ’n moontlike dissipel te beskou, en dit het getoon hoe ons, deur ’n Bybelstudie tydens die eerste besoek aan te bied, die vreugde kan ervaar om iemand te help om ’n dissipel te word.
“Waarom ons ‘onophoudelik moet bid’” was die tema van die volgende toespraak. Die Bybel spoor Christene aan om in alle aspekte van die lewe op God te vertrou vir leiding. Ons moet tyd maak vir persoonlike gebed. Ons moet ook volhard in gebed, want Jehovah laat ons dalk ’n tyd lank bid voordat sy antwoord duidelik word.—Jakobus 4:8.
Die toespraak “Geestelike gesprekke bou op” het ons aangemoedig om ons gawe van spraak so te gebruik dat dit ons en ander tot voordeel strek (Filippense 4:8). Huweliksmaats en kinders het elke dag geestelike gesprekke nodig. Daarom moet gesinne probeer om ten minste een maaltyd per dag saam te eet, sodat daar ’n geleentheid is vir opbouende gesprekke.
Die oggendprogram is afgesluit met die aanmoedigende toespraak “Hoe toewyding en doop tot redding lei”. Doopkandidate het kennis opgedoen, geloof beoefen, berou getoon, verkeerde weë die rug toegekeer en hulle aan God toegewy. Die spreker het genoem dat hulle ná hulle doop moet voortgaan om geestelik te groei, ywerig te bly en goeie gedrag te handhaaf.—Filippense 2:15, 16.
Daardie middag is twee hoofpunte beklemtoon in die toespraak “Wees beskeie, en hou jou oog eenvoudig”. Om beskeie te wees, beteken dat ons ’n realistiese beskouing van ons beperkings en ons posisie voor God het. Beskeidenheid help ons om ons oog “eenvoudig” te hou—gerig op God se Koninkryk, nie op materiële dinge nie. As ons dit doen, hoef ons ons nie te kwel nie, want Jehovah sal in ons behoeftes voorsien.—Matteus 6:22-24, 33, 34.
Die volgende spreker het getoon waarom ons op God moet vertrou in die toespraak “Vertrou ten volle op Jehovah in tye van benoudheid”. Hoe kan ons dinge soos persoonlike swakhede en finansiële of gesondheidsprobleme die hoof bied? Laat ons tot Jehovah bid vir praktiese wysheid en ander om hulp vra. Ons moenie paniekbevange of wanhopig raak nie, maar eerder ons vertroue in God versterk deur sy Woord te lees.—Romeine 8:35-39.
Die tema van die laaste simposium van die byeenkoms was “Die gehalte van ons geloof deur verskillende beproewinge getoets”. Die eerste deel het ons daaraan herinner dat alle ware Christene voor vervolging te staan kom. Dit dien as ’n getuienis, versterk ons geloof en bied ons ’n geleentheid om ons lojaliteit aan God te bewys. Hoewel ons ons lewe nie onnodig in gevaar stel nie, moet ons nooit van onskriftuurlike metodes gebruik maak om vervolging vry te spring nie.—1 Petrus 3:16.
Die tweede spreker in hierdie simposium het vrae oor neutraliteit bespreek. Die vroeë Christene was nie pasifiste nie, maar hulle het besef dat hulle eerstens aan God getrou moet wees. Net so hou Jehovah se Getuies streng by die beginsel: ‘Julle is geen deel van die wêreld nie’ (Johannes 15:19). Aangesien toetse van ons neutraliteit skielik kan opduik, moet gesinne tyd inruim om die Bybel se riglyne oor hierdie saak te hersien. Soos die derde toespraak in hierdie simposium getoon het, is Satan se doel nie noodwendig om ons dood te maak nie, maar om druk op ons uit te oefen sodat ons ontrou sal word. As ons bespotting, die druk om onsedelik te wees, emosionele pyn en fisiese gebreke getrou verduur, bring ons lof aan Jehovah.
Die hartlike uitnodiging “Kom nader aan Jehovah” was die tema van die laaste toespraak van die dag. As ons Jehovah se hoofeienskappe verstaan, bring dit ons nader aan hom. Hy gebruik sy onbeperkte krag om sy volk te beskerm, veral in geestelike sin. Sy geregtigheid is nie hardvogtig nie, maar beweeg hom om eindelose lewe moontlik te maak vir almal wat regverdigheid beoefen. God se wysheid blyk duidelik uit die feit dat hy onvolmaakte mense gebruik het om die Bybel te skryf. Sy innemendste eienskap is sy liefde, wat hom beweeg het om voorsiening te maak vir die mensdom se redding deur Jesus Christus (Johannes 3:16). Die spreker het afgesluit met die vrystelling van die pragtige nuwe boek Kom nader aan Jehovah.
Dag drie vestig die aandag op ywer vir goeie werke
Die tema van die derde dag van die byeenkoms was “’n Volk ywerig vir goeie werke” (Titus 2:14). Die oggend het goed begin met ’n gesinsbespreking van die dagteks. Daarna het die toespraak “Vertrou jy op Jehovah?” gevolg. Die nasies se vertroue is misplaas, want hulle vertrou op hulle eie wysheid en krag. Daarenteen vertrou Jehovah se knegte moedig en vreugdevol op hom ondanks teëspoed.—Psalm 46:1-3, 7-11.
Die deel “Jongmense—Bou vir die toekoms saam met Jehovah se organisasie” het hierdie vraag bespreek: Hoe kan ’n jong persoon werklik die lewe ten beste benut? Nie deur geld, besittings en aansien na te jaag nie. Ons Skepper spoor jongmense liefdevol aan om aan hom te dink terwyl hulle nog jonk is. Die spreker het onderhoude gevoer met ’n paar wat gedurende hulle jeug doelwitte in die Christelike bediening nagestreef het, en ons kon sien hoe gelukkig hulle is. En hoe goed was dit tog om die nuwe traktaat Jongmense—Wat gaan julle met julle lewe doen? te ontvang, wat bedoel is om jong Getuies te help om die grondslag te lê vir ’n ewige toekoms saam met Jehovah se organisasie!
Daarna het die boeiende Bybeldrama “Bly standvastig in moeilike tye” gevolg. Dit het Jeremia se lang loopbaan gedek van sy jeug tot Jerusalem se vernietiging, waaroor hy ywerig geprofeteer het. Jeremia het onbevoeg gevoel vir sy toewysing, maar hy het dit ten spyte van teenstand uitgevoer, en Jehovah het hom verlos.—Jeremia 1:8, 18, 19.
Die drama is gevolg deur die toespraak “Wees soos Jeremia—Maak die Woord van God onbevrees bekend”. Hedendaagse Koninkryksverkondigers is dikwels die teiken van valse inligting en kwaadwillige propaganda (Psalm 109:1-3). Maar soos Jeremia kan ons ontmoediging die hoof bied deur behae te skep in Jehovah se Woord. En ons is vol vertroue dat dié wat teen ons veg, nie die oorhand sal kry nie.
Die openbare toespraak “Die toneel van hierdie wêreld is aan die verander” het inderdaad tydige inligting bevat. Ons tyd word gekenmerk deur dramatiese veranderinge. Die Bybel het voorspel dat hierdie toestande, waaronder die uitroep “vrede en veiligheid”, God se vreesinboesemende oordeelsdag sal voorafgaan (1 Tessalonisense 5:3). Dit sal wonderlike veranderinge meebring—die einde van alle oorloë, misdaad, geweld en selfs siekte. Dit is nie nou die tyd om op hierdie stelsel van dinge te vertrou nie, maar ons moet eerder godvrugtige toegewydheid nastreef en kuis gedrag handhaaf.
’n Opsomming van die week se Wagtoring-studie is gevolg deur die laaste toespraak van die byeenkoms “Wees oorvloedig in goeie werke as ywerige Koninkryksverkondigers”. Die spreker het gewys hoe die program ons geestelik versterk het en ons aangemoedig het om op Jehovah te vertrou. Ons is ten slotte aangespoor om rein, liefdevolle en ywerige verkondigers van God se Koninkryk te wees.—1 Petrus 2:12.
Ons het gewis met dieselfde gees as dié van Jehovah se knegte in Nehemia se dag teruggekeer huis toe—vol vreugde oor die geestelike seëninge wat ons by die “Ywerige Koninkryksverkondigers”-streekbyeenkoms ontvang het (Nehemia 8:12). Het hierdie besielende byeenkoms jou nie vervul met vreugde, vasbeslote om as ’n ywerige Koninkryksverkondiger voort te beur nie?
[Venster/Prent op bladsy 23]
’n Nuwe studiehulp!
Aan die einde van die eerste dag van die byeenkoms was almal in die gehoor verheug oor die vrystelling van die nuwe boek Aanbid die enigste ware God. Dit kan gebruik word om met mense te studeer wat hulle studie in die boek Kennis wat tot die ewige lewe lei voltooi het en sal ongetwyfeld die geloof versterk van diegene wat “die regte gesindheid vir die ewige lewe” het.—Handelinge 13:48.
[Erkenning]
Prent op omslag: U.S. Navy photo
[Venster/Prente op bladsy 24]
Hulp om nader aan God te kom
Die laaste spreker van die tweede dag van die streekbyeenkoms het die vrystelling van die nuwe boek Kom nader aan Jehovah aangekondig. Die boek het vier hoofdele, een vir elk van Jehovah se hoofeienskappe—krag, geregtigheid, wysheid en liefde. Elke deel van die boek het ’n hoofstuk met treffende voorbeelde van hoe Jesus Christus God se eienskappe weerspieël het. Die hoofdoel van hierdie nuwe boek is om ons en ons Bybelstudente te help om ’n hegter en sterker verhouding met Jehovah God op te bou.
[Venster/Prente op bladsy 26]
Geestelike leiding vir jongmense
Op die derde dag van die streekbyeenkoms is ’n spesiale traktaat Jongmense—Wat gaan julle met julle lewe doen? vrygestel. Hierdie nuwe traktaat, wat bedoel is om jong Getuies te help om die regte besluite aangaande hulle toekoms te maak, bevat skriftuurlike raad oor hoe hulle ’n ewige loopbaan in Jehovah se diens kan bou.