Vind ten volle baat by die “Ywerige Koninkryksverkondigers”-streekbyeenkoms
1 ’n Besielende program: Wat ’n stimulerende program het ons tog by ons onlangse streekbyeenkoms geniet! Ons het vir ’n gemeenskaplike doel byeengekom, naamlik om beter toegerus te word om God se Koninkryk ywerig te verkondig. Onthou julle hoe die eerste spreker die frase “om te verkondig” omskryf het? Onthou julle watter navorsing ons aangespoor is om te doen in die toespraak “Wees vreesloos, want Jehovah is met ons”? Watter lewensverhale het julle tot dusver gelees?
2 Die simposium “Die gehalte van ons geloof deur verskillende beproewinge getoets” het drie hoofredes verstrek waarom Jehovah vervolging toelaat. Kan jy verduidelik wat dit is? Wat is die skriftuurlike grondslag vir ons Christelike neutraliteit? Wat is ons aangespoor om te doen ten einde ons voor te berei op situasies wat ons neutraliteit kan beproef? Hoe strek ons getroue volharding tydens beproewinge Jehovah tot eer?
3 Watter tonele in die drama “Bly standvastig in moeilike tye” het jou veral versterk? Hoe kan ons soos Jeremia wees?
4 Watter betekenisvolle veranderinge wat voorlê en God se vreesinboesemende dag sal voorafgaan, is bespreek in die openbare toespraak “Die toneel van hierdie wêreld is aan die verander”? Hoe het jy die inligting in die slottoespraak “Wees oorvloedig in goeie werke as ywerige Koninkryksverkondigers” op jou persoonlike bediening toegepas terwyl jy daarna geluister het?
5 Hoofpunte wat ons kan toepas: Hoe kan ons die diepte van ons dankbaarheid teenoor Jehovah toon, soos verduidelik is in die toespraak “Toon dat julle dankbaar is”? Wie se ywer is ons aangemoedig om na te volg in die programrede “Koninkryksverkondigers met ywer besiel”? Watter selfondersoek is ons gevra om te doen?
6 Aan watter drie vereistes moet ons voldoen om Jehovah se guns te verkry, soos beklemtoon is in die simposium “Miga se profesie versterk ons om in Jehovah se naam te wandel”? Is dit moontlik om daaraan te voldoen? (Miga 6:8). In watter opsigte moet ons sedelik rein bly volgens die toespraak “Bly kuis deur jou hart te bewaak”? Op watter gebiede moet ons, na aanleiding van die toespraak “Waak teen bedrog”, ons nie laat bedrieg nie en ander nie bedrieg nie?
7 Watter praktiese punte uit die simposium “Koninkryksverkondigers wat hulle bediening verheerlik” het jy al in jou bediening begin toepas? In die toespraak “Geestelike gesprekke bou op” is Filippense 4:8 noukeurig ontleed. Hoe help hierdie teks ons om ons gesprekke geestelik te maak, en wanneer moet ons dit doen?
8 Die toespraak “Vertrou ten volle op Jehovah in tye van benoudheid” het bespreek hoe ons tragiese gebeure, finansiële probleme, swak gesondheid, gesinsprobleme en swakhede waarmee ons worstel, die hoof kan bied. Hoe kan ons toon dat ons op Jehovah vertrou wanneer ons voor hierdie situasies te staan kom?
9 Nuwe geestelike skatte: Ons was verheug om te hoor van die nuwe boek Aanbid die enigste ware God. Hoe het die aankondiging waarin die doel van die boek verduidelik is, jou geraak? Waarom sal dit in ons dissipelmaakwerk nuttig wees om dit as die tweede studieboek te gebruik?
10 Daarna het ons die pragtige boek Kom nader aan Jehovah ontvang. Wat is van die boek se spesiale kenmerke? Van watter prente hou jy veral? Het jy nader aan Jehovah gekom toe jy dit gelees het? Wie anders sal dalk daarby kan baat vind?
11 Die “Ywerige Koninkryksverkondigers”-streekbyeenkoms het ons die geestelike aanmoediging gegee wat ons nodig het om hierdie moeilike tye die hoof te bied. Om ten volle by hierdie uitstekende geestelike voorsiening baat te vind, moet ons ons bes doen om te onthou wat gesê is, te waardeer wat ons ontvang het en toe te pas wat ons geleer het (2 Pet. 3:14). As ons dit doen, sal dit ons versterk om ons onkreukbaarheid te handhaaf en ywerige Koninkryksverkondigers te wees in navolging van ons Here Jesus Christus—alles tot heerlikheid van Jehovah.—Fil. 1:9-11.