“Dit het ’n leemte in my hart gevul”
“EK WIL julle graag uit die diepte van my hart bedank vir die pragtige geskenk Kom nader aan Jehovah. Dit het ’n leemte in my hart gevul—die behoefte om te voel dat Jehovah my liefhet en dat ek kosbaar in sy oë is. Ek voel nou soveel nader aan Jehovah en sy geliefde Seun. Ek wil almal van hierdie boek vertel en ’n eksemplaar vir al my geliefdes gee.” Dit is hoe een van Jehovah se Getuies gevoel het oor die nuwe boek met 320 bladsye wat by die “Ywerige Koninkryksverkondigers”-streekbyeenkomste gedurende 2002/03 vrygestel is. Kom ons kyk na ’n paar kenmerke van hierdie nuwe boek, asook wat die doel van die boek is.
Kenmerke van die nuwe boek
Wat bevat hierdie nuwe boek? Al die inligting in die twee studieartikels van hierdie tydskrif—en nog baie meer! Die boek het 31 hoofstukke, en elkeen is omtrent so lank soos ’n Wagtoring-studieartikel. Ná die voorwoord en die eerste drie hoofstukke is die boek in vier dele verdeel, een vir elk van Jehovah se hoofeienskappe. Elke deel begin met ’n oorsig van die eienskap. Die volgende paar hoofstukke bespreek hoe Jehovah die eienskap openbaar. Dan bevat elke deel ’n hoofstuk oor Jesus. Waarom? Wel, Jesus het gesê: “Hy wat my gesien het, het ook die Vader gesien” (Johannes 14:9). As ’n volmaakte weerspieëling van Jehovah gee Jesus vir ons treffende voorbeelde van hoe God se eienskappe in dade omgesit word. Elke deel sluit af met ’n hoofstuk wat ons leer hoe ons Jehovah kan navolg deur die betrokke eienskap aan die dag te lê. En in die bespreking van Jehovah se eienskappe verwys hierdie nuwe publikasie na elke boek van die Bybel.
Die boek Kom nader aan Jehovah het ook ’n paar spesiale kenmerke. Van hoofstuk 2 af het elke hoofstuk ’n venster met die titel “Vrae om oor te peins”. Die tekste en vrae daarin is nie bedoel as ’n hersiening van die hoofstuk nie. Dit is eerder bedoel om jou te help om met behulp van die Bybel diep oor die onderwerp te peins. Ons beveel aan dat jy elke Skrifgedeelte noukeurig lees. Dink dan na oor die vraag en probeer dit op jouself toepas. Sulke bepeinsing kan jou hart roer en jou help om steeds nader aan Jehovah te kom.—Psalm 19:14.
Die prente in die boek Kom nader aan Jehovah is noukeurig nagevors en voorberei om te onderrig en te motiveer. Sewentien hoofstukke bevat pragtige volbladprente van Bybeltonele.
Wat is die doel van die boek?
Waarom is die boek Kom nader aan Jehovah gepubliseer? Die hoofdoel van hierdie nuwe publikasie is om ons te help om Jehovah beter te leer ken sodat ons ’n sterker verhouding met ons God kan opbou.
Kan jy aan iemand dink wat dalk baat sal vind by die boek Kom nader aan Jehovah, moontlik ’n Bybelstudent of selfs ’n onbedrywige Christenbroer of -suster? Wat van jou—het jy al hierdie nuwe boek begin lees? Sit gerus tyd opsy om dit so gou moontlik te lees as jy dit nog nie gedoen het nie. Neem tyd om te peins oor wat jy lees. Mag hierdie nuwe publikasie jou help om al hoe nader aan Jehovah God te kom, sodat jy die goeie nuus van sy Koninkryk met groter vreugde en ywer kan verkondig!