Onthou jy?
Het jy dit geniet om die onlangse nommers van Die Wagtoring te lees? Wel, kyk of jy die volgende vrae kan beantwoord:
• In watter opsigte was Rut ’n goeie voorbeeld?
Sy was voorbeeldig in haar liefde vir Jehovah, in haar lojale liefde teenoor Naomi en in die manier waarop sy vlytigheid en nederigheid aan die dag gelê het. Dit is geen wonder dat mense haar as “’n voortreflike vrou” beskou het nie (Rut 3:11).—4/15, bladsye 23-6.
• Hoe weet ons dat Jehovah vir gewone mense omgee?
Hy het vir die Israeliete, wat in Egipte wreed behandel is, gesê om nie die minderbevoorregtes sleg te behandel nie (Eksodus 22:21-24). Jesus, wat sy Vader nagevolg het, het opregte belangstelling in gewone mense getoon, en hy het manne wat “ongeleerde en gewone mense” was, as apostels gekies (Handelinge 4:13; Matteus 9:36). Ons kan God navolg deur oor ander, soos jongmense, besorgd te wees.—4/15, bladsye 28-31.
• Watter rede het ons om te glo dat Jehovah sien wat ons doen?
Bybelverslae toon dat Jehovah sien wat mense doen. Hy het die offerande gesien wat Abel gebring het, en hy sien ook ons ‘lofoffers, die vrug van die lippe’ (Hebreërs 13:15). Jehovah was bewus daarvan dat Henog hom wou behaag deur ’n sedelike, rein lewe te lei. En God het gesien hoe ’n nie-Israelitiese weduwee van Sarfat die bietjie wat sy gehad het, met die profeet Elia gedeel het. Jehovah sien ook ons dade van geloof raak.—5/1, bladsye 28-31.
• Waarom kan daar gesê word dat Jode wat ná Pinkster 33 G.J. Christene geword het, ’n persoonlike toewyding aan God moes maak?
In 1513 v.G.J. het die eertydse Israeliete in ’n toegewyde verhouding met Jehovah gekom (Eksodus 19:3-8). Daarna is Jode in daardie toegewyde nasie, wat onder die Wetsverbond was, gebore. Maar Jehovah het die Wetsverbond in 33 G.J. deur middel van Christus se dood verwyder (Kolossense 2:14). Daarna moes Jode wat God op ’n aanneemlike wyse wou dien, hulle aan hom toewy en in die naam van Jesus Christus gedoop word.—5/15, bladsye 30-1.
• Het reukwerk vandag ’n plek in ware aanbidding?
In eertydse Israel was die gebruik van reukwerk deel van ware aanbidding (Eksodus 30:37, 38; Levitikus 16:12, 13). Maar die Wetsverbond, insluitende die gebruik van reukwerk, het met die dood van Christus tot ’n einde gekom. Christene kan self besluit of hulle om niegodsdienstige redes reukwerk wil gebruik, maar dit is nie vandag deel van ware aanbidding nie. Ander se gevoelens moet ook in ag geneem word sodat ons hulle nie struikel nie.—6/1, bladsye 28-30.
• Watter onlangse nuusberig het talle beweeg om die feit dat Jesus werklik op die aarde was, weer in oënskou te neem?
Daar was heelwat publisiteit oor ’n kissie, ’n ossuarium, wat in Israel gevind is. Dit dateer blykbaar uit die eerste eeu en bevat ’n inskripsie wat sê: “Jakobus, seun van Josef, broer van Jesus.” Sommige beskou dit as “die oudste nie-Bybelse argeologiese bewys” van Jesus se bestaan.—6/15, bladsye 3-4.
• Hoe leer ’n mens om lief te hê?
Mense leer heel eerste om lief te hê deur die voorbeeld en opleiding van hulle ouers. Wanneer ’n man en vrou liefde en respek teenoor mekaar betoon, kan die kinders leer om lief te hê (Efesiërs 5:28; Titus 2:4). Selfs al kom iemand nie uit ’n liefdevolle gesin nie, kan hy leer om lief te hê deur Jehovah se vaderlike leiding te aanvaar, deur die hulp van die heilige gees te verkry en deur baat te vind by die liefdevolle ondersteuning van die Christenbroederskap.—7/1, bladsye 4-7.
• Wie was Eusebius, en watter les kan ons uit sy lewe leer?
Eusebius was ’n vroeë geskiedskrywer wat in 324 G.J. die tien dele van die werk Geskiedenis van die Christelike Kerk voltooi het. Hoewel hy geglo het dat die Vader voor die Seun bestaan het, het Eusebius ’n ander beskouing by die Konsilie van Nicea aanvaar. Hy het blykbaar Jesus se vereiste geïgnoreer dat Sy volgelinge “geen deel van die wêreld” moet wees nie (Johannes 17:16).—7/15, bladsye 29-31.
• Het Jehovah sy beskouing van veelwywery verander?
Nee, Jehovah het nie sy beskouing van veelwywery verander nie (Maleagi 3:6). God se reëling vir die eerste man was dat hy “sy vrou aankleef” en dat hulle een vlees word (Genesis 2:24). Jesus het gesê dat iemand wat skei, behalwe op grond van hoerery, en dan weer trou, egbreuk pleeg (Matteus 19:4-6, 9). Toe die Christengemeente gestig is, het Jehovah nie langer veelwywery geduld nie.—8/1, bladsy 28.