‘Hulle geluid het oor die hele aarde uitgegaan’
“Maak dissipels van mense van al die nasies, en doop hulle in die naam van die Vader en van die Seun en van die heilige gees.”—MATTEUS 28:19.
1, 2. (a) Watter opdrag het Jesus sy dissipels gegee? (b) Waarom kon eerste-eeuse Christene soveel bereik?
KORT voordat Jesus na die hemel opgevaar het, het hy sy dissipels ’n opdrag gegee. Hy het vir hulle gesê: “Maak dissipels van mense van al die nasies, en doop hulle in die naam van die Vader en van die Seun en van die heilige gees” (Matteus 28:19). Wat ’n ontsaglike taak!
2 Dink net! Op Pinkster 33 G.J. is die heilige gees op ongeveer 120 dissipels uitgestort en het hulle daardie opdrag begin vervul deur ander te vertel dat Jesus die langverwagte Messias was deur wie redding verkry kon word (Handelinge 2:1-36). Hoe kon so ’n klein groepie dan “mense van al die nasies” bereik? Uit ’n menslike oogpunt gesien, was dit onmoontlik, maar “by God is alles moontlik” (Matteus 19:26). Die vroeë Christene is deur Jehovah se heilige gees ondersteun, en hulle het ’n gevoel van dringendheid gehad (Sagaria 4:6; 2 Timoteus 4:2). Binne slegs ’n paar dekades kon die apostel Paulus dus sê dat die goeie nuus verkondig word “in die hele skepping wat onder die hemel is”.—Kolossense 1:23.
3. Wat het veroorsaak dat die ware Christelike “koring” nie duidelik sigbaar was nie?
3 Gedurende ’n groot deel van die eerste eeu het ware aanbidding bly versprei. Jesus het egter voorspel dat die tyd sou kom wanneer Satan “onkruid” sou saai en die ware Christelike “koring” eeue lank tot die oestyd toe oorskadu sou word. Ná die dood van die apostels is dit bewaarheid.—Matteus 13:24-39.
Vinnige toename vandag
4, 5. Watter werk het gesalfde Christene in 1919 aangepak, en waarom het dit ’n groot uitdaging gebied?
4 In 1919 was dit tyd dat die ware Christelike koring van die onkruid geskei moes word. Gesalfde Christene het geweet dat Jesus se gewigtige opdrag nog steeds van krag was. Hulle het vas geglo dat hulle in “die laaste dae” lewe en was bewus van Jesus se profesie: “Hierdie goeie nuus van die koninkryk sal in die hele bewoonde aarde verkondig word as ’n getuienis vir al die nasies; en dan sal die einde kom” (2 Timoteus 3:1; Matteus 24:14). Ja, hulle het geweet dat daar baie werk voorlê.
5 Soos die dissipels in 33 G.J. het daardie gesalfde Christene egter voor ’n groot uitdaging te staan gekom. Daar was maar net ’n paar duisend van hulle in net ’n paar lande. Hoe sou hulle ooit die goeie nuus “in die hele bewoonde aarde” kon verkondig? Onthou, die aarde se bevolking het toegeneem van moontlik 300 miljoen in die tyd van die keisers tot bykans 2 miljard ná die Eerste Wêreldoorlog. En deur die 20ste eeu heen sou dit vinnig bly toeneem.
6. Watter vooruitgang is teen die 1930’s gemaak met die verspreiding van die goeie nuus?
6 Nietemin het Jehovah se gesalfde knegte, soos hulle eerste-eeuse broers, hierdie taak aangepak met volle vertroue in Jehovah, en sy gees was met hulle. Teen die middel-1930’s het sowat 56 000 evangeliedienaars Bybelwaarheid reeds in 115 lande verkondig. Baie werk was al gedoen, maar daar het nog baie werk voorgelê.
7. (a) Voor watter nuwe uitdaging het gesalfde Christene te staan gekom? (b) Hoe het die insamelingswerk tot dusver gevorder met die ondersteuning van die “ander skape”?
7 Toe het ’n dieper begrip van die identiteit van die “groot menigte” wat in Openbaring 7:9 gemeld word, ’n nuwe uitdaging gebied, asook die belofte ingehou dat daardie hardwerkende Christene hulp sou ontvang. ’n Onbekende getal “ander skape”, gelowiges met ’n aardse hoop, moes “uit alle nasies en stamme en volke en tale” ingesamel word (Johannes 10:16). Hulle sou ‘dag en nag heilige diens aan Jehovah verrig’ (Openbaring 7:15). Dit beteken dat hulle met die predikings- en onderrigtingswerk sou help (Jesaja 61:5). Gevolglik was gesalfde Christene verheug om te sien hoe die geledere van die evangeliedienaars met tienduisende en later met miljoene toeneem. In die jaar 2003 het ’n nuwe hoogtepunt van 6 429 351 verkondigers aan die predikingswerk deelgeneem—die oorgrote meerderheid was van die groot menigte.a Gesalfde Christene is dankbaar vir hierdie hulp, en die ander skape is dankbaar vir die voorreg om hulle gesalfde broers te ondersteun.—Matteus 25:34-40.
8. Hoe het Jehovah se Getuies gereageer op die hewige druk wat gedurende die Tweede Wêreldoorlog op hulle uitgeoefen is?
8 Toe die koringklas weer eens duidelik sigbaar geword het, het Satan ’n hewige oorlog teen hulle gevoer (Openbaring 12:17). Hoe het hy gereageer toe die groot menigte begin verskyn het? Uiters gewelddadig! Kan ons enigsins twyfel dat hy agter die wêreldwye aanval op ware aanbidding was wat gedurende die Tweede Wêreldoorlog plaasgevind het? Aan albei kante van die konflik is Christene aan groot druk onderwerp. Talle dierbare broers en susters het verskriklike beproewinge deurgemaak, en sommige het vir hulle geloof gesterf. Hulle het nietemin die woorde van die psalmis hulle eie gemaak: “In eenheid met God sal ek sy woord loof. In God het ek my vertroue gestel; ek sal nie bang wees nie. Wat kan vlees aan my doen?” (Psalm 56:4; Matteus 10:28). Gesalfde Christene en ander skape is versterk deur Jehovah se gees en het saam standvastig gebly (2 Korintiërs 4:7). Gevolglik het “die woord van God aangehou groei” (Handelinge 6:7). In 1939, toe oorlog uitgebreek het, het 72 475 getroue Christene hulle predikingswerk gerapporteer. Maar in 1945, die jaar toe die oorlog geëindig het, was daar volgens die onvolledige rapport 156 299 bedrywige Getuies wat die goeie nuus verkondig het. Wat ’n nederlaag vir Satan!
9. Watter nuwe skole is gedurende die Tweede Wêreldoorlog aangekondig?
9 Dit is duidelik dat die chaos van die Tweede Wêreldoorlog nie Jehovah se knegte laat twyfel het dat die predikingswerk gedoen moes word nie. Trouens, in 1943, toe die oorlog op sy hewigste was, is twee nuwe skole aangekondig. Een, wat nou die Teokratiese Bedieningskool genoem word, sou in alle gemeentes gehou word om individuele Getuies op te lei om die predikingswerk te doen en dissipels te maak. Die ander, die Wagtoring-Bybelskool Gilead, sou sendelinge oplei om die predikingswerk in ander lande te doen. Ja, toe die oorlogsvure uiteindelik begin afneem het, was ware Christene gereed vir groter bedrywighede.
10. Hoe is die ywer van Jehovah se volk gedurende 2003 gesien?
10 En wat ’n uitstekende werk het hulle tog verrig! Danksy hulle opleiding in die Teokratiese Bedieningskool het almal—jonk en oud, ouers en kinders, selfs die siekes—aan die vervulling van Jesus se groot opdrag deelgeneem en neem hulle nog steeds daaraan deel (Psalm 148:12, 13; Joël 2:28, 29). In die jaar 2003 het gemiddeld 825 185 elke maand hulle gevoel van dringendheid geopenbaar deur, tydelik of voltyds, aan die pionierdiens deel te neem. In daardie selfde jaar het Jehovah se Getuies 1 234 796 477 uur daaraan bestee om met ander oor die goeie nuus van die Koninkryk te praat. Jehovah skep ongetwyfeld behae in die ywer van sy volk!
In die buiteland
11, 12. Watter voorbeelde lewer bewys van die goeie rekord van sendelinge?
11 Oor die jare het Gileadgegradueerdes en, meer onlangs, gegradueerdes van die Bedieningsopleidingskool ’n skitterende rekord opgebou. In Brasilië was daar byvoorbeeld minder as 400 verkondigers toe die eerste sendelinge in 1945 daar aangekom het. Hulle en die sendelinge wat ná hulle gekom het, het saam met hulle ywerige Brasiliaanse broers hard gewerk, en Jehovah het hulle pogings ryklik geseën. Hoe opwindend is dit tog vir enigiemand wat daardie vroeë dae onthou, om te sien dat Brasilië in 2003 ’n nuwe hoogtepunt van 607 362 gerapporteer het!
12 Kom ons kyk nou na Japan. Voor die Tweede Wêreldoorlog was daar ongeveer eenhonderd Koninkryksverkondigers in daardie land. Gedurende die oorlog het wrede vervolging hulle getalle aansienlik laat afneem en teen die einde van die oorlog het slegs ’n paar Getuies dit oorleef—geestelik en fisies (Spreuke 14:32). Daardie paar uitsonderlike handhawers van onkreukbaarheid was sekerlik verheug om in 1949 die eerste 13 Gileadopgeleide sendelinge te verwelkom, en die sendelinge het gou lief geword vir hulle geesdriftige, gasvrye Japannese broers. Meer as 50 jaar later, in die jaar 2003, het Japan ’n hoogtepunt van 217 508 verkondigers gerapporteer! Jehovah het sy knegte in daardie land inderdaad ryklik geseën. Daar is soortgelyke rapporte uit baie ander lande. Diegene wat die predikingswerk in die buiteland gaan doen het, het werklik ’n groot bydrae gelewer tot die verspreiding van die goeie nuus, sodat dit in 2003 wêreldwyd in 235 lande, eilande en gebiede gehoor is. Die groot menigte kom beslis uit “alle nasies”.
“Uit alle . . . stamme en volke en tale”
13, 14. Hoe het Jehovah getoon dat dit nuttig is om die goeie nuus in ‘alle tale’ te verkondig?
13 Die eerste opgetekende wonderwerk nadat die dissipels op Pinkster 33 G.J. met heilige gees gesalf is, was die feit dat hulle in tale kon praat met die skare wat daar bymekaar was. Almal wat hulle gehoor het, kon moontlik ’n internasionale taal praat, dalk Grieks. As “godvresende manne” kon hulle waarskynlik ook die Hebreeuse dienste by die tempel verstaan. Maar toe hulle die goeie nuus in hulle moedertaal hoor, is hulle waarlik beweeg om te luister.—Handelinge 2:5, 7-12.
14 Vandag word daar ook baie tale in die predikingswerk gebruik. Daar is voorspel dat die groot menigte nie net uit nasies sou kom nie, maak ook uit “stamme en volke en tale”. In ooreenstemming hiermee het Jehovah deur Sagaria voorspel: “Tien man uit al die tale van die nasies [sal] die slip van ’n Joodse man vasgryp, ja, hulle sal dit vasgryp en sê: ‘Ons sal saam met julle gaan, want ons het gehoor dat God met julle is’” (Sagaria 8:23). Hoewel Jehovah se Getuies nie meer die gawe van tale het nie, weet hulle hoe nuttig dit is om mense in hulle eie taal te onderrig.
15, 16. Hoe het sendelinge en ander die uitdaging aanvaar om in plaaslike tale te getuig?
15 Daar is weliswaar vandag ’n paar tale wat baie algemeen gebruik word, soos Engels, Frans en Spaans. Diegene wat hulle eie land verlaat het om in ander lande te gaan dien, probeer egter die plaaslike tale leer sodat diegene met “die regte gesindheid vir die ewige lewe” ontvankliker vir die goeie nuus sal wees (Handelinge 13:48). Dit kan moeilik wees. Toe die broers in die Stille Suidsee-eiland Toewaloe publikasies in hulle eie taal nodig gehad het, het een van die sendelinge die uitdaging aanvaar. Aangesien daar geen woordeboek beskikbaar was nie, het hy ’n woordelys met Toewaloeaanse woorde begin opstel. Mettertyd is die boek Jy kan vir ewig in die Paradys op aarde leweb in die Toewaloeaanse taal gepubliseer. Toe sendelinge in Curaçao aankom, was daar geen Bybellektuur en geen woordeboek in die plaaslike taal, Papiamentoe, nie. Daar was ook groot meningsverskille oor hoe die taal geskryf moes word. Nogtans is die eerste Christelike Bybeltraktaat in daardie taal binne twee jaar ná die koms van die eerste sendelinge gepubliseer. Vandag is Papiamentoe een van die 133 tale waarin Die Wagtoring gelyktydig met die Engels uitgegee word.
16 In Namibië kon die eerste sendelinge nie een plaaslike Getuie vind om hulle te help vertaal nie. Daarbenewens het een van die plaaslike tale, Nama, nie woorde gehad vir algemene begrippe, soos “volmaak” nie. ’n Sendeling vertel: “Vir vertaling het ek hoofsaaklik onderwysers gebruik wat besig was om die Bybel te studeer. Aangesien hulle min kennis van die waarheid gehad het, moes ek by hulle sit om seker te maak dat elke sin akkuraat was.” Maar uiteindelik is die traktaat Life in a New World in vier Namibiese tale vertaal. Vandag word Die Wagtoring gereeld in Kwanyama en Ndonga gedruk.
17, 18. Watter uitdagings word in Mexiko en ander lande die hoof gebied?
17 In Mexiko is Spaans die hooftaal. Maar voordat die Spanjaarde daar aangekom het, is baie tale daar gepraat, en ’n hele paar word nog steeds gebruik. Daarom word lektuur van Jehovah se Getuies nou in sewe Mexikaanse tale en ook in Mexikaanse Gebaretaal uitgegee. Die Koninkryksbediening in die Maja-taal was die eerste publikasie met ’n datum wat in ’n Indiaanse taal uitgegee is. Ja, ’n hele paar duisend Majas, Asteke en ander kan gevind word onder die 572 530 Koninkryksverkondigers in Mexiko.
18 In onlangse tye het miljoene mense na ander lande gevlug of om ekonomiese redes gemigreer. Gevolglik het baie lande nou vir die eerste keer baie mense wat ander tale praat. Jehovah se Getuies het die uitdaging aanvaar. In Italië is daar byvoorbeeld gemeentes en groepe in 22 tale buiten Italiaans. Om die broers te help om vir mense te getuig wat ander tale praat, is taallesse onlangs in 16 tale, waaronder Italiaanse Gebaretaal, gereël. In baie ander lande wend Jehovah se Getuies soortgelyke pogings aan om groot immigrantegemeenskappe te bereik. Ja, met Jehovah se hulp kom die groot menigte inderdaad uit baie, baie taalgroepe.
“Oor die hele aarde”
19, 20. Watter woorde van Paulus word vandag op ’n merkwaardige manier vervul? Verduidelik.
19 In die eerste eeu het die apostel Paulus geskryf: “Het hulle miskien nie gehoor nie? Kyk, in werklikheid ‘het hulle geluid oor die hele aarde uitgegaan en hulle woorde tot aan die eindes van die bewoonde aarde’” (Romeine 10:18). As dit in die eerste eeu die geval was, hoeveel te meer vandag! Miljoene—moontlik meer as op enige ander tyd in die geskiedenis—sê: “Ek sal Jehovah te alle tye loof; sy lof sal voortdurend in my mond wees.”—Psalm 34:1.
20 Verder neem die werk nie af nie. Die getal Koninkryksverkondigers bly toeneem. Al hoe meer tyd word in die predikingswerk deurgebring. Miljoene herbesoeke word gedoen en honderdduisende Bybelstudies word gehou. En daar is voortdurend mense wat belangstelling toon. Verlede jaar het ’n nuwe hoogtepunt van 16 097 622 die herdenking van Jesus se dood bygewoon. Dit is duidelik dat daar nog baie werk is om te doen. Mag ons voortgaan om die onwankelbare onkreukbaarheid van ons broers na te volg wat hewige vervolging verduur het. En mag ons die ywer openbaar van al ons broers wat sedert 1919 hulleself in Jehovah se diens ingespan het. Laat almal voortgaan om soos die psalmis te sing: “Laat alles wat asemhaal, Jah loof. Loof Jah!”—Psalm 150:6.
[Voetnote]
a Sien die jaarverslag op bladsye 18 tot 21 van hierdie tydskrif.
b Uitgegee deur Jehovah se Getuies.
Kan jy verduidelik?
• Watter taak het die broers in 1919 aangepak, en waarom was dit ’n uitdaging?
• Wie is ingesamel om die predikingswerk te ondersteun?
• Watter goeie rekord het sendelinge en ander wat in die buiteland gaan dien het, opgebou?
• Watter bewyse kan jy meld om te toon dat Jehovah vandag die werk van sy knegte seën?
[Tabel op bladsy 18-21]
WÊRELDRAPPORT VAN JEHOVAH SE GETUIES VIR DIE 2003-DIENSJAAR
(See bound volume)
[Prente op bladsy 14, 15]
Die chaos van die Tweede Wêreldoorlog het Christene nie laat twyfel dat die goeie nuus verkondig sou word nie
[Erkenning]
Ontploffing: U.S. Navy photo; ander: U.S. Coast Guard photo
[Prente op bladsy 16, 17]
Die groot menigte sou uit alle stamme en tale kom