Watter godsdiens moet jy kies?
‘VERSKILLENDE godsdienste is bloot verskillende paaie wat na dieselfde plek lei. Daar is per slot van rekening net een God, nie waar nie?’ Dit is die beskouing van baie wat meen dat ’n kerkverband wel belangrik is, maar dat dit nie werklik saak maak aan watter godsdiens ’n mens behoort nie.
Op die oog af lyk hierdie redenasie miskien aanvaarbaar, aangesien dit waar is dat daar net een God, die Almagtige, is (Jesaja 44:6; Johannes 17:3; 1 Korintiërs 8:5, 6). Maar ons kan nie die duidelike verskille—selfs teenstrydighede—ignoreer wat daar tussen die talle godsdiensgroepe bestaan wat beweer dat hulle die ware God dien nie. Hulle verskil grootliks wat hulle gebruike, hulle opvattings, hulle leringe en hulle vereistes betref. Die verskille is so groot dat diegene wat aan een godsdiens of groep behoort, dit moeilik vind om te verstaan of te aanvaar wat die ander leer of glo.
Daarteenoor het Jesus gesê: “God is ’n Gees, en dié wat hom aanbid, moet met gees en waarheid aanbid” (Johannes 4:24). Laat die feit dat God met waarheid aanbid moet word, ruimte vir talle teenstrydige idees oor wie God is, wat sy voornemens is en hoe hy aanbid wil word? Is dit logies om te glo dat dit nie vir die almagtige God saak maak hoe ons hom aanbid nie?
Ware Christene destyds en vandag
Christene in die eerste eeu het soms verskillende menings oor sake gehad. Die apostel Paulus het byvoorbeeld met verwysing na diegene in Korinte gesê: “Dit is aan my deur die huisgenote van Chloë oor julle onthul, my broers, dat daar onenighede onder julle bestaan. Wat ek bedoel, is dat elkeen van julle sê: ‘Ek behoort aan Paulus’, ‘Maar ek aan Apollos’, ‘Maar ek aan Sefas’, ‘Maar ek aan Christus’.”—1 Korintiërs 1:11, 12.
Het Paulus hierdie verskille as onbelangrik beskou? Het elkeen maar net sy eie pad na redding gevolg? Beslis nie! Paulus se raad was: “Ek vermaan julle dan nou, broers, deur die naam van ons Here Jesus Christus, dat julle almal eenstemmig moet praat en dat daar nie verdeeldhede onder julle moet wees nie, maar dat julle paslik verenig kan wees in dieselfde denke en in dieselfde gedagtegang.”—1 Korintiërs 1:10.
Eenheid van geloof kan natuurlik nooit deur dwang verkry word nie. Dit word slegs verkry as individue sake noukeurig ondersoek en tot dieselfde gevolgtrekkings kom en dit aanvaar. ’n Persoonlike studie van God se Woord en ’n opregte begeerte om toe te pas wat ’n mens leer, is dus belangrike stappe tot die soort eenheid waarvan Paulus gepraat het. Kan sulke eenheid gevind word? Soos ons gesien het, het God al van vroeë tye af met sy knegte as ’n groep gehandel. Is dit moontlik om daardie groep vandag te identifiseer?
Die voordele van die regte assosiasie
Die psalmis Dawid het eenkeer gevra: “O Jehovah, wie sal ’n gas in u tent wees? Wie sal op u heilige berg woon?” Dit is beslis ’n gedagteprikkelende vraag. Dawid het die antwoord voorsien: “Hy wat onberispelik wandel en regverdigheid beoefen en in sy hart die waarheid spreek” (Psalm 15:1, 2). ’n Juiste begrip van die Bybel sal ’n mens in staat stel om die godsdiens te identifiseer wat aan daardie goddelike vereistes voldoen. Daarna sal jy, deur met daardie groep te assosieer, opbouende omgang geniet met mense wat God in eenheid en “met gees en waarheid” aanbid.
Jehovah se Getuies het bewys dat eenheid van geloof en optrede selfs in vandag se verdeelde wêreld moontlik is. Onder hulle is mense wat voorheen lidmate van talle verskillende godsdienste en etniese groepe was. Party Getuies was vroeër agnostici of ateïste. Ander het eenvoudig nie ernstig aan godsdiens gedink nie. Uit hierdie verskillende godsdienste, kulture en filosofiese rigtings het persone gekom wat nou ’n godsdienseenheid geniet wat nêrens anders vandag in die wêreld gesien kan word nie.
Die grondslag vir hierdie eenheid is God se Woord, die Bybel. Jehovah se Getuies besef natuurlik dat hulle nie vir ander kan voorskryf wat om te doen nie. Maar hulle waardeer die voorreg om ander aan te moedig om kennis van die Bybel in te neem sodat hulle met behulp van daardie vaste grondslag hulle keuse in verband met aanbidding kan maak. Sodoende kan nog vele meer die voordele geniet wat dit meebring om God “met gees en waarheid” te aanbid.
Vandag is die gevaar groot dat ’n mens kan swig voor skadelike invloede en versoekings. Dit is uiters belangrik om die regte soort assosiasie te kies. Die Bybel sê dat ‘hy wat met wyses wandel, wys sal word’ en dat ‘slegte omgang nuttige gewoontes bederf’ (Spreuke 13:20; 1 Korintiërs 15:33). Assosiasie met ware aanbidders van God is ’n beskerming. Daarom herinner die Bybel ons: “Laat ons op mekaar ag gee om tot liefde en goeie werke aan te spoor en nie ons onderlinge vergadering nalaat soos party die gewoonte het nie, maar mekaar aanmoedig, en dit des te meer namate julle die dag sien nader kom” (Hebreërs 10:24, 25). Wat ’n seën is dit tog wanneer ware vriende, geestelike broers en susters, mekaar liefdevol bystaan om hulle verantwoordelikhede voor God na te kom!
Ottmar stem hiermee saam. Hy het in Duitsland in ’n Katolieke gesin grootgeword, maar het opgehou om kerk toe te gaan. Hy verduidelik: “Wanneer ek ook al kerk toe gegaan het, het ek uitgestap met dieselfde leë gevoel as waarmee ek ingestap het.” Nietemin het hy sy geloof in God behou. Toe het hy met Jehovah se Getuies in aanraking gekom en oortuig geraak dat hulle ware knegte van God is. Hy het besef dat hy met hulle moet assosieer. Hy sê nou: “Omdat ek bedrywig is in ’n wêreldwye organisasie, geniet ek gemoedsrus. Ek word stelselmatig gehelp om ’n juister kennis van die Bybel te verkry. Dit is iets wat vir my van groot waarde is.”
’n Uitnodiging aan dié wat soek
Eensgesinde mense wat ten nouste saamwerk as ’n groep, kan ’n taak met groter doeltreffendheid uitvoer as individue wat onafhanklik van mekaar werk. Jesus se afskeidswoorde aan sy volgelinge het byvoorbeeld hierdie opdrag ingesluit: “Gaan dus en maak dissipels van mense van al die nasies, en doop hulle in die naam van die Vader en van die Seun en van die heilige gees, en leer hulle om alles te onderhou wat ek julle beveel het” (Matteus 28:19, 20). Hoe kon so ’n taak met welslae uitgevoer word sonder enige leiding of organisasie? Hoe kon iemand hierdie skriftuurlike opdrag gehoorsaam as hy God op sy eie probeer dien?
Verlede jaar het Jehovah se Getuies regoor die wêreld 91 933 280 boeke, boekies, brosjures asook 697 603 247 tydskrifte versprei wat op die Bybel gebaseer is, en sodoende het hulle honderdmiljoene mense in 235 lande met die boodskap uit God se Woord bereik. Watter uitstekende bewys tog dat die verenigde, goed georganiseerde pogings van ’n groep baie meer tot stand bring as wat die onafhanklike pogings van individue ooit kan!
Benewens die feit dat Jehovah se Getuies Bybellektuur versprei, hou hulle ook gratis Bybelstudies sodat hulle mense kan help om ’n deeglike begrip te verkry van wat God vereis. Verlede jaar is gemiddeld 5 726- 509 van hierdie Bybelstudies weekliks met individue of groepe gehou. Hierdie Bybelonderrig het miljoene mense gehelp om ’n vaste grondslag te vind vir hulle keuse in verband met aanbidding. Jy word genooi om te leer wat God se vereistes is soos dit in die Bybel uiteengesit word. Daarna kan jy jou keuse maak.—Efesiërs 4:13; Filippense 1:9; 1 Timoteus 6:20; 2 Petrus 3:18.
As jy God wil behaag, is dit noodsaaklik dat jy aan ’n godsdiens behoort—maar nie sommer aan enige godsdiensgroep of kerk nie. Jy moet jou keuse in verband met godsdiens op juiste Bybelkennis grond, nie op onbewese leerstellings of hoorsê nie (Spreuke 16:25). Vind uit wat die vereistes van die ware godsdiens is. Vergelyk dit met jou eie opvattings. Maak dan jou keuse.—Deuteronomium 30:19.
[Prente op bladsy 7]
Jehovah se Getuies geniet eenheid in ’n verdeelde wêreld