Koninkryksverkondigers berig
‘Kom oor en help ons’
IN JULIE 2000 is Duitssprekende Getuies in Duitsland, Oostenryk en Switserland genooi om na Bolivia te gaan. Waarom? Omdat daar in afgesonderde plaasgemeenskappe binne ’n radius van 300 kilometer van Santa Cruz, Bolivia, Duitssprekende Mennoniete was wat groot belangstelling in die Bybel getoon het.
Ongeveer 140 Getuies het op die uitnodiging gereageer. Sommige het vir ’n paar weke daarheen gegaan, ander ’n jaar of meer. Sodoende het hulle ’n soortgelyke gees geopenbaar as dié van eerste-eeuse sendelinge wat gehoor gegee het aan die oproep: “Kom oor na Masedonië en help ons.”—Handelinge 16:9, 10.
Hoe is dit om in daardie gebied te werk? ’n Ouer man in die plaaslike gemeente verduidelik: “Dit kan tot agt uur neem om oor grondpaaie in ’n vierwielaangedrewe voertuig na een van die 43 Mennonitiese kolonies te reis. Dit neem dikwels vier dae om by van die verste dele uit te kom, en party nagte moet die verkondigers in tente slaap. Maar dit is beslis die moeite werd, want bitter min van hierdie mense het al ooit die goeie nuus gehoor.”
Aanvanklik het baie van die Mennoniete nie die besoeke verwelkom nie. Herhaalde pogings het hulle egter gehelp om te besef wat die Getuies se besoeke vir hulle kan beteken. Een boer het byvoorbeeld gesê dat hy al ’n jaar lank die Ontwaak! lees. Toe het hy bygevoeg: “Ek weet dat baie van die mense hier nie saamstem met wat julle sê nie, maar ek glo dat dit die waarheid is.” In ’n ander kolonie het ’n man gesê: “Van my bure sê dat julle valse profete is, ander sê dat julle die waarheid het. Ek wil self uitvind.”
Daar is nou ’n Duitse gemeente in Bolivia, met 35 verkondigers, waaronder 14 voltydse evangeliedienaars. Tot dusver het 14 voormalige Mennoniete Koninkryksverkondigers geword, en 9 ander woon gereeld die vergaderinge by. ’n Middeljarige man wat onlangs gedoop is, het gesê: “Ons sien duidelik Jehovah se leiding. Hy het ervare, Duitssprekende broers en susters gestuur om ons te help. Ons is baie dankbaar.” Die man se 17-jarige dogter, wat ook gedoop is, het bygevoeg: “Die geesdrif onder die jong broers en susters wat hierheen gekom het, is aansteeklik. Die meeste van hulle is pioniers wat hulle tyd en geld gebruik om ander te help. Dit maak dat ek dit ook wil doen.”
Waarlik, diegene wat ‘oorgekom’ het om te help, put groot vreugde en bevrediging daaruit.