Is God verantwoordelik vir ons probleme?

TOE Marion se volwasse dogter ’n ernstige breinbesering opgedoen het, het Marion gedoen wat baie van ons sou.a Sy het tot God gebid vir hulp. “Ek weet nie of ek al ooit so verlore en alleen gevoel het nie”, sê Marion. Later het haar dogter se toestand versleg, en Marion het aan God begin twyfel. “Waarom gebeur hierdie dinge?” het sy gevra. Sy kon nie verstaan hoe ’n liefdevolle en besorgde God haar in die steek kon laat nie.

Marion se ondervinding is allesbehalwe uniek. Tallose mense in alle wêrelddele het al in tye van nood gevoel dat God hulle in die steek gelaat het. “Ek worstel nog steeds met die ‘waarom GOD’-vrae”, sê Lisa ná die moord op haar kleinseun. “Ek het nie heeltemal geloof in God verloor nie, maar dit is beslis nie meer dieselfde nie.” Een vrou het ná ’n sinlose tragedie waarby haar babaseuntjie betrokke was, eweneens gesê: “God het my geen vertroosting gebied ná wat gebeur het nie. Hy het my geen teken gegee of enige medelye met my gehad nie.” Sy het bygevoeg: “Ek sal God nooit vergewe nie.”

Ander raak verbitterd teenoor God wanneer hulle na die wêreld om hulle kyk. Hulle sien gemeenskappe wat gebuk gaan onder armoede en hongersnood, wanhopige oorlogsvlugtelinge, tallose vigswesies en miljoene mense wat deur ander siektes geteister word. Tydens hierdie en soortgelyke tragedies verkwalik baie God omdat hy oënskynlik niks doen nie.

Feit is egter dat God nie verantwoordelik is vir die probleme wat die mensdom teister nie. Trouens, daar is grondige redes om te glo dat God binnekort die leed wat die mensdom aangedoen is, ongedaan sal maak. Ons nooi jou om na die volgende artikel te kyk en te sien dat God werklik vir ons omgee.

[Voetnoot]