Opgelei om ’n deeglike getuienis te gee
“Julle sal getuies van my wees in Jerusalem sowel as in die hele Judea en Samaria en tot in die mees afgeleë deel van die aarde.”—HANDELINGE 1:8.
1, 2. Wat was Petrus se opdrag, en wie het dit aan hom gegee?
“JESUS wat van Nasaret was, . . . [het] ons beveel om vir die volk te preek en om ’n deeglike getuienis te gee dat dit die Een is wat deur God verorden is om regter van die lewendes en die dooies te wees” (Handelinge 10:38, 42). Met hierdie woorde het die apostel Petrus aan Kornelius en sy gesin die opdrag verduidelik wat hy ontvang het om ’n evangeliedienaar te wees.
2 Wanneer het Jesus hierdie opdrag gegee? Petrus het waarskynlik gedink aan wat die verrese Jesus gesê het net voordat hy opgevaar het hemel toe. By daardie geleentheid het Jesus vir sy getroue dissipels gesê: “Julle sal getuies van my wees in Jerusalem sowel as in die hele Judea en Samaria en tot in die mees afgeleë deel van die aarde” (Handelinge 1:8). Maar Petrus het al ’n hele ruk voor daardie tyd geweet dat hy as ’n dissipel van Jesus met ander oor sy geloof in Jesus sou moes praat.
Drie jaar van opleiding
3. Watter wonderwerk het Jesus verrig, en watter uitnodiging het hy aan Petrus en Andreas gerig?
3 Etlike maande ná sy doop in 29 G.J. het Jesus gepreek waar Petrus en sy broer Andreas as vissers op die See van Galilea gewerk het. Hulle het die hele nag lank gewerk, maar tevergeefs. Tog het Jesus vir hulle gesê: “Vaar uit na waar dit diep is en laat sak julle nette vir ’n vangs.” Toe hulle doen wat Jesus gesê het, “het hulle ’n groot menigte visse omsluit. Trouens, hulle nette het uitmekaar begin skeur.” Toe Petrus die wonderwerk sien, het hy bevrees geword, maar Jesus het hom gekalmeer en gesê: “Hou op om bang te wees. Van nou af sal jy mense lewend vang.”—Lukas 5:4-10.
4. (a) Hoe het Jesus sy dissipels voorberei om ’n getuienis te gee? (b) Hoe sou die bediening van Jesus se dissipels met syne vergelyk?
4 Onmiddellik het Petrus en Andreas—sowel as Jakobus en Johannes, die seuns van Sebedeus—hulle bote verlaat en Jesus gevolg. Hulle het Jesus feitlik drie jaar lank op sy predikingsreise vergesel en opleiding as evangeliedienaars ontvang (Matteus 10:7; Markus 1:16, 18, 20, 38; Lukas 4:43; 10:9). Aan die einde van daardie tydperk, op 14 Nisan 33 G.J., het Jesus vir hulle gesê: “Hy wat geloof in my beoefen, hy sal ook self die werke doen wat ek doen; en hy sal groter werke as dié doen” (Johannes 14:12). Jesus se dissipels sou ’n deeglike getuienis gee, net soos Jesus gedoen het, maar op ’n baie groter skaal. Soos hulle gou uitgevind het, sou hulle en alle toekomstige dissipels tot aan “die voleinding van die stelsel van dinge” in “al die nasies” getuig.—Matteus 28:19, 20.
5. Hoe kan ons baat vind by die opleiding wat Jesus sy volgelinge gegee het?
5 Ons lewe in “die voleinding van die stelsel van dinge” (Matteus 24:3). In teenstelling met daardie eerste dissipels kan ons Jesus nie vergesel en sien hoe hy vir mense preek nie. Ons kan nietemin by sy opleiding baat vind deur in die Bybel te lees hoe hy gepreek het en watter instruksies hy sy volgelinge gegee het (Lukas 10:1-11). Maar hierdie artikel sal iets anders van groot belang bespreek wat Jesus vir sy dissipels getoon het—die regte gesindheid teenoor die predikingswerk.
Besorgdheid oor mense
6, 7. Watter eienskap van Jesus het sy bediening doeltreffend gemaak, en hoe kan ons hom in hierdie opsig navolg?
6 Waarom het Jesus so ’n doeltreffende getuienis gegee? Een rede was sy groot belangstelling in en besorgdheid oor mense. Die psalmis het voorspel dat Jesus “jammer [sou] voel vir die geringe en die arme” (Psalm 72:13). Hy het beslis daardie profesie vervul. Die Bybel sê oor een geleentheid: “Toe hy die skare sien, het hy vir hulle innig jammer gevoel, want hulle was gestroop en rondgegooi soos skape sonder ’n herder” (Matteus 9:36). Selfs growwe sondaars was bewus van sy besorgdheid en het tot hom aangetrokke gevoel.—Matteus 9:9-13; Lukas 7:36-38; 19:1-10.
7 Ons sal vandag sukses behaal as ons dieselfde besorgdheid oor mense toon. Voordat jy aan die bediening deelneem, kan jy gerus ’n oomblik neem om na te dink oor hoe nodig mense die inligting het wat jy na hulle toe neem. Dink aan die probleme wat hulle moontlik het wat net deur die Koninkryk opgelos sal word. Wees vasbeslote om positief teenoor almal te wees, aangesien jy nie weet wie na die boodskap sal luister nie. Miskien het die volgende persoon wat jy nader, gebid dat iemand soos jy hom moet kom help!
Liefde as beweegrede
8. Wat beweeg Jesus se volgelinge, in navolging van hom, om die goeie nuus te verkondig?
8 Die goeie nuus wat Jesus verkondig het, het gehandel oor die vervulling van Jehovah se wil, die heiliging van Sy naam en die regverdiging van Sy soewereiniteit—die allerbelangrikste geskille waarvoor die mensdom staan (Matteus 6:9, 10). Omdat Jesus sy Vader liefgehad het, is hy beweeg om sy onkreukbaarheid tot die einde toe te handhaaf en om ’n deeglike getuienis te gee oor die Koninkryk, wat hierdie geskille sal oplos (Johannes 14:31). Omdat Jesus se volgelinge vandag dieselfde beweegrede het, neem hulle ywerig aan die bediening deel. Die apostel Johannes het gesê: “Dít is wat die liefde vir God beteken, dat ons sy gebooie bewaar”, met inbegrip van die gebod om die goeie nuus te verkondig en dissipels te maak.—1 Johannes 5:3; Matteus 28:19, 20.
9, 10. Watter ander liefde, benewens liefde vir God, beweeg ons om ’n deeglike getuienis te gee?
9 Jesus het vir sy volgelinge gesê: “As julle my liefhet, sal julle my gebooie bewaar. Hy wat my gebooie het en hulle bewaar, dit is hy wat my liefhet” (Johannes 14:15, 21). Liefde vir Jesus moet ons dus beweeg om aangaande die waarheid te getuig en die ander dinge te gehoorsaam wat Jesus beveel het. Gedurende een van Jesus se verskynings ná sy opstanding het hy Petrus gemaan: “Voed my lammers. . . . Hou as herder toesig oor my skapies. . . . Voed my skapies.” Wat moes Petrus beweeg om dit te doen? Jesus het aangedui wat die antwoord is toe hy Petrus herhaaldelik gevra het: “Het jy my [lief]? . . . Het jy my lief? . . . Het jy geneentheid vir my?” Ja, Petrus se liefde vir Jesus, sy geneentheid vir hom, sou hom beweeg om ’n deeglike getuienis te gee, Jesus se “skapies” te vind en daarna ’n geestelike herder vir hulle te wees.—Johannes 21:15-17.
10 Vandag ken ons Jesus nie persoonlik soos Petrus hom geken het nie. Ons verstaan nietemin baie goed wat Jesus vir ons gedoen het. Ons harte word geraak deur die groot liefde wat hom beweeg het om ‘vir elke mens die dood te smaak’ (Hebreërs 2:9; Johannes 15:13). Ons voel soos Paulus gevoel het toe hy geskryf het: “Die liefde wat die Christus het, dring ons . . . Hy het vir almal gesterf, sodat dié wat lewe, nie langer vir hulleself moet lewe nie, maar vir hom” (2 Korintiërs 5:14, 15). Ons toon dat ons Jesus se liefde vir ons ernstig opneem en dat ons hom ook liefhet deur die opdrag om ’n deeglike getuienis te gee, in ’n ernstige lig te beskou (1 Johannes 2:3-5). Ons wil nooit ’n ongeërgde houding teenoor die predikingswerk aanneem nie, asof ons Jesus se offerande van gewone waarde ag nie.—Hebreërs 10:29.
Behou die regte fokus
11, 12. Waarom het Jesus in die wêreld ingekom, en hoe het hy sy fokus behou?
11 Toe Jesus voor Pontius Pilatus was, het hy gesê: “Hiervoor is ek gebore en hiervoor het ek in die wêreld ingekom, om van die waarheid te getuig” (Johannes 18:37). Jesus het nie toegelaat dat enigiets sy aandag daarvan aflei om van die waarheid te getuig nie. Dit was God se wil vir hom.
12 Satan het Jesus beslis in hierdie opsig getoets. Kort ná Jesus se doop het Satan aangebied om hom ’n vername man in die wêreld te maak, om hom “al die koninkryke van die wêreld en hulle heerlikheid” te gee (Matteus 4:8, 9). Later wou die Jode hom koning maak (Johannes 6:15). Party dink dalk aan die moontlike voordele wat Jesus se aanvaarding van hierdie aanbiedinge kon gebring het en redeneer miskien dat Jesus as ’n mensekoning baie tot voordeel van die mensdom kon gedoen het. Maar Jesus het hierdie soort denke verwerp. Hy was daarop gefokus om van die waarheid te getuig.
13, 14. (a) Waardeur is Jesus se aandag nie afgelei nie? (b) Wat het Jesus bereik al was hy materieel arm?
13 Jesus se aandag is ook nie deur ’n najaging van rykdom afgelei nie. Gevolglik het hy nie in weelde gelewe nie. Hy het nie eens sy eie huis gehad nie. By een geleentheid het hy gesê: “Jakkalse het gate en voëls van die hemel het slaapplekke, maar die Seun van die mens het geen plek om sy kop neer te lê nie” (Matteus 8:20). Toe Jesus gesterf het, was sy enigste waardevolle besitting volgens die verslag die kleed waaroor die Romeinse soldate die lot gewerp het (Johannes 19:23, 24). Was Jesus se lewe dan ’n mislukking? Glad nie!
14 Jesus het baie meer bereik as wat die rykste filantroop ooit kan. Paulus het gesê: “Julle ken die onverdiende goedhartigheid van ons Here Jesus Christus, dat hy, hoewel hy ryk was, om julle onthalwe arm geword het, sodat julle deur sy armoede ryk kon word” (2 Korintiërs 8:9; Filippense 2:5-8). Hoewel Jesus materieel arm was, het hy dit vir nederige mense moontlik gemaak om die ewige lewe in volmaaktheid te geniet. Hoe dankbaar is ons tog teenoor hom! En hoe verheug ons ons tog in die beloning wat hy ontvang het omdat hy sy fokus op die uitvoering van God se wil gehou het!—Psalm 40:8; Handelinge 2:32, 33, 36.
15. Wat is waardevoller as rykdom?
15 Christene wat vandag daarna streef om Jesus na te volg, laat ook nie toe dat die najaging van rykdom hulle aandag aflei nie (1 Timoteus 6:9, 10). Hulle erken dat rykdom die lewe gerieflik kan maak, maar hulle weet dat rykdom niks tot hulle ewige toekoms bydra nie. Wanneer ’n Christen sterf, is sy materiële rykdom vir hom net so min werd as wat Jesus se kleed vir hom was toe hy gesterf het (Prediker 2:10, 11, 17-19; 7:12). Wanneer ’n Christen sterf, is sy verhouding met Jehovah en met Jesus Christus sy enigste werklik waardevolle besitting.—Matteus 6:19-21; Lukas 16:9.
Nie afgeskrik deur teenstand nie
16. Hoe het Jesus op teenstand gereageer?
16 Teenstand het Jesus nie sy fokus laat verloor om van die waarheid te getuig nie. Selfs die wete dat sy aardse bediening met ’n offerdood sou eindig, het hom nie ontmoedig nie. Paulus het van Jesus gesê: “Vir die vreugde wat hom voorgehou is, het hy ’n folterpaal verduur, terwyl hy die skande verag het, en het hy aan die regterhand van die troon van God gaan sit” (Hebreërs 12:2). Let daarop dat Jesus “die skande verag het”. Hy het hom nie gekwel oor wat teenstanders van hom gedink het nie. Sy fokus was op die uitvoering van God se wil.
17. Wat kan ons uit Jesus se volharding leer?
17 Paulus het die les van Jesus se volharding toegepas en Christene aangespoor: “Let noukeurig op die een wat sulke teëspraak deur sondaars teen hulle eie belange verduur het, sodat julle nie moeg word en in julle siel beswyk nie” (Hebreërs 12:3). Ja, dit kan uitputtend wees om dag na dag teenstand of bespotting te verduur. Dit kan vermoeiend wees om voortdurend die verlokkinge van die wêreld te weerstaan, miskien tot teleurstelling van familielede wat ons aanspoor om “êrens in die lewe te kom”. Maar soos Jesus, vertrou ons op Jehovah vir ondersteuning terwyl ons vasbeslote bly om die Koninkryk eerste in ons lewe te stel.—Matteus 6:33; Romeine 15:13; 1 Korintiërs 2:4.
18. Watter goeie les kan ons uit Jesus se woorde aan Petrus leer?
18 Jesus se vasbeslotenheid om nie afgelei te word nie, het duidelik geblyk toe hy sy dissipels van sy komende dood begin vertel het. Petrus het Jesus aangespoor om ‘goed te wees’ vir homself en hom verseker dat hy ‘glad nie hierdie lot sou hê nie’. Jesus het geweier om na enigiets te luister wat sy voorneme kon ondermyn om Jehovah se wil te doen. Hy het sy rug op Petrus gedraai en gesê: “Gaan agter my, Satan! Jy is ’n struikelblok vir my, want jy dink nie God se gedagtes nie, maar dié van mense” (Matteus 16:21-23). Mag ons altyd net so vasbeslote wees om mense se gedagtes te verwerp. Laat ons eerder altyd deur God se gedagtes gerig word.
Blywende voordele
19. Wat was die belangrikste aspek van Jesus se bediening, hoewel hy wonderwerke verrig het?
19 Jesus het baie wonderwerke verrig om te toon dat hy die Messias was. Hy het selfs die dooies opgewek. Daardie werke het die skares getrek, maar Jesus het nie aarde toe gekom bloot om maatskaplike werk te doen nie. Hy het gekom om van die waarheid te getuig. Hy het geweet dat enige materiële voordele wat hy verskaf, tydelik is. Selfs diegene wat opgewek is, sou weer sterf. Slegs deur van die waarheid te getuig, kon hy party help om die ewige lewe te verkry.—Lukas 18:28-30.
20, 21. Watter balans handhaaf ware Christene met betrekking tot goeie werke?
20 Vandag probeer party mense Jesus se goeie werke navolg deur hospitale te bou of ander dienste onder die wêreld se armes te verrig. In party gevalle verg dit groot opoffering van hulle kant, en hulle opregtheid is prysenswaardig; maar enige verligting wat hulle voorsien, is hoogstens tydelik. Net die Koninkryk sal blywende verligting bring. Daarom lê Jehovah se Getuies hulle daarop toe om, soos Jesus, van die waarheid aangaande daardie Koninkryk te getuig.
21 Ware Christene verrig natuurlik goeie werke. Paulus het geskryf: “Solank ons die geleentheid het, laat ons dan aan almal goed doen, maar veral aan dié wat in die geloof aan ons verwant is” (Galasiërs 6:10). In krisistye of wanneer iemand in nood verkeer, huiwer ons nie om ‘goed te doen’ aan ons naaste of ons Christenbroers nie. Nietemin hou ons ons fokus waar dit hoofsaaklik hoort—om van die waarheid te getuig.
Leer uit Jesus se voorbeeld
22. Waarom getuig Christene vir hulle naaste?
22 Paulus het geskryf: “Waarlik, wee my as ek die goeie nuus nie bekend maak nie!” (1 Korintiërs 9:16). Hy het nie ’n ongeërgde houding teenoor die goeie nuus gehad nie, want die verkondiging daarvan het vir hom en sy toehoorders die lewe beteken (1 Timoteus 4:16). Ons het dieselfde beskouing van ons bediening. Ons wil ons naaste help. Ons wil ons liefde vir Jehovah toon. Ons wil ons liefde vir Jesus bewys, asook ons waardering vir sy groot liefde vir ons. Daarom verkondig ons die goeie nuus en lewe ons gevolglik “nie meer vir die begeertes van mense . . . nie, maar vir God se wil”.—1 Petrus 4:1, 2.
23, 24. (a) Watter les leer ons uit die wonderwerk in verband met die vis? (b) Wie gee vandag ’n deeglike getuienis?
23 Soos Jesus, verloor ons nie ons fokus wanneer ander ons bespot of ons boodskap woedend verwerp nie. Ons leer ’n les uit die wonderwerk wat Jesus verrig het toe hy Petrus en Andreas genooi het om hom te volg. Ons sien dat ons visvangs resultate kan oplewer as ons Jesus gehoorsaam en as ’t ware ons nette selfs in oënskynlik onvrugbare waters laat sak. Baie Christenvissers het ’n goeie vangs gehad nadat hulle jare lank in oënskynlik onvrugbare waters gewerk het. Ander kon verhuis na plekke waar die visvangs produktiewer was en het ’n goeie vangs daar gehad. Wat ons ook al doen, ons sal nie ophou om ons nette te laat sak nie. Ons weet dat Jesus nog nie gesê het dat die predikingswerk in enige deel van die aarde klaar is nie.—Matteus 24:14.
24 Meer as sesmiljoen Getuies van Jehovah is nou in meer as 230 lande besig. Die Wagtoring van 1 Februarie 2005 sal die jaarlikse wêreldrapport van hulle bedrywighede gedurende die 2004-diensjaar bevat. Daardie rapport sal toon dat Jehovah die predikingswerk ryklik seën. Mag ons in die tyd wat vir hierdie stelsel van dinge oor is, voortgaan om Paulus se aansporende woorde ter harte te neem: “Verkondig die woord, bly dringend daarmee besig” (2 Timoteus 4:2). Mag ons voortgaan om ’n deeglike getuienis te gee totdat Jehovah sê dat die werk klaar is.
Van hierdie jaar af sal die Wêreldrapport van Jehovah se Getuies vir die diensjaar nie meer in Die Wagtoring van 1 Januarie verskyn nie. Dit sal eerder in die nommer van 1 Februarie gepubliseer word.
Kan jy antwoord?
• Hoe kan ons baat vind by die opleiding wat Jesus sy dissipels gegee het?
• Wat was Jesus se gesindheid teenoor die mense vir wie hy gepreek het?
• Wat beweeg ons om ’n deeglike getuienis te gee?
• Op watter maniere kan ons, net soos Jesus, ons fokus op die uitvoering van God se wil hou?
[Prent op bladsy 15]
Ons sal sukses in ons bediening behaal as ons dieselfde besorgdheid oor mense toon as Jesus
[Prent op bladsy 16, 17]
Jesus het aarde toe gekom hoofsaaklik om van die waarheid te getuig
[Prente op bladsy 17]
Jehovah se Getuies spits hulle daarop toe om ’n deeglike getuienis te gee