Die huwelik kan slaag in vandag se wêreld
“Beklee julle . . . met liefde, want dit is ’n volmaakte band van eenheid.”—KOLOSSENSE 3:14.
1, 2. (a) Watter feit is aanmoedigend omtrent die Christengemeente? (b) Wat is ’n suksesvolle huwelik?
IS DIT nie hartverblydend om na die Christengemeente te kyk en soveel egpare te sien wat al 10, 20, 30 jaar of selfs langer aan hulle maat lojaal gebly het nie? Hulle het deur dik en dun by hulle maat gestaan.—Genesis 2:24.
2 Die meeste egpare sal erken dat hulle huwelik nie sonder uitdagings was nie. ’n Waarnemer het geskryf: “Gelukkige huwelike is nie sonder sorge nie. Daar is goeie tye en slegte tye . . . Maar op die een of ander manier . . . het hierdie mense ten spyte van die [druk] van die moderne lewe getroud gebly.” Suksesvolle egpare het geleer om die onvermydelike storms en krisisse wat met die druk van die lewe gepaardgaan, die hoof te bied, veral as hulle kinders grootgemaak het. Ondervinding het sulke egpare geleer dat ware liefde ‘nooit faal nie’.—1 Korintiërs 13:8.
3. Wat toon statistiek oor die huwelik en egskeiding, en watter vrae laat dit ontstaan?
3 In teenstelling hiermee het miljoene huwelike al op die rotse beland. ’n Verslag sê: “Na verwagting sal die helfte van al die huwelike wat daar vandag in die VSA is, op ’n egskeiding uitloop. En die helfte van daardie [egskeidings] sal binne die eerste 7,8 jaar van die huwelik plaasvind . . . Van die 75 persent wat weer trou, sal 60 persent weer skei.” Selfs in lande wat voorheen ’n betreklik lae egskeidingsyfer gehad het, het dinge verander. Byvoorbeeld, in Japan het die egskeidingsyfer in onlangse jare byna verdubbel. Wat is party van die probleme wat tot hierdie situasie aanleiding gegee het, probleme wat soms selfs binne die Christengemeente kop uitsteek? Wat is nodig om ’n sukses van die huwelik te maak ten spyte van Satan se pogings om hierdie reëling te ondermyn?
Slaggate om te vermy
4. Wat is van die faktore wat ’n huwelik kan ondermyn?
4 God se Woord help ons om die faktore te verstaan wat ’n huwelik kan ondermyn. Kyk byvoorbeeld na die apostel Paulus se woorde oor toestande wat gedurende hierdie laaste dae sal bestaan: “In die laaste dae [sal daar] kritieke tye . . . wees wat moeilik is om deur te kom. Want mense sal liefhebbers van hulleself wees, liefhebbers van geld, aanmatigend, hoogmoedig, lasteraars, ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir die goeie, verraaiers, eiesinnig, opgeblase van trots, liefhebbers van genot eerder as liefhebbers van God, wat ’n vorm van godvrugtige toegewydheid het maar die krag daarvan verloën; en keer jou van hierdie mense af.”—2 Timoteus 3:1-5.
5. Waarom stel ’n ‘liefhebber van homself’ sy huwelik in gevaar, en wat is die Bybel se raad in dié verband?
5 Wanneer ons Paulus se woorde ontleed, sien ons dat baie van die dinge wat hy noem, tot die verbrokkeling van huweliksverhoudings kan bydra. Byvoorbeeld, diegene wat “liefhebbers van hulleself” is, is selfsugtig en neem ander nie in ag nie. Mans of vrouens wat net hulleself liefhet, is vasbeslote om hulle sin te kry. Hulle is onbuigsaam, ontoegeeflik. Sal so ’n gesindheid tot ’n gelukkige huwelik bydra? Geensins. Die apostel Paulus het Christene, met inbegrip van egpare, hierdie wyse raad gegee: “[Julle moet] niks uit twisgierigheid of uit egotisme doen nie, maar [julle moet] met ootmoed die ander hoër as julleself ag, terwyl julle nie uit persoonlike belangstelling ’n oog op net julle eie sake hou nie, maar ook uit persoonlike belangstelling op dié van die ander.”—Filippense 2:3, 4.
6. Hoe kan liefde vir geld ’n huweliksverhouding ondermyn?
6 Liefde vir geld kan ’n wig tussen ’n man en vrou indryf. Paulus het gewaarsku: “Dié wat . . . vasbeslote is om ryk te wees, val in versoeking en ’n strik en talle sinnelose en skadelike begeertes, wat mense in vernietiging en verderf stort. Want die liefde vir geld is ’n wortel van allerhande skadelike dinge, en deur hierdie liefde na te streef, is party van die geloof af op ’n dwaalspoor gebring en het hulle hulleself oral met baie pyne deurboor” (1 Timoteus 6:9, 10). Ongelukkig het die dinge waarteen Paulus gewaarsku het, vandag in baie huwelike gebeur. In hulle soeke na rykdom ignoreer baie mans en vrouens die behoeftes van hulle maat, waaronder die basiese behoefte aan emosionele ondersteuning en voortdurende, liefdevolle kameraadskap.
7. Watter gedrag het in sommige gevalle tot ontrouheid in die huwelik gelei?
7 Paulus het ook gesê dat party in hierdie laaste dae “dislojaal [sou wees], sonder natuurlike geneentheid, nie bereid tot enige ooreenkoms nie”. Die huweliksgelofte is ’n plegtige belofte wat ’n permanente band tot gevolg moet hê, nie verraderlikheid nie (Maleagi 2:14-16). Party het egter romantiese aandag aan individue begin gee wat nie hulle huweliksmaat is nie. Een vrou in haar dertigerjare wie se man haar verlaat het, het verduidelik dat hy, selfs voordat hy haar verlaat het, te familiêr en te vriendelik met ander vroue was. Hy het nie onderskei watter gedrag ongepas is vir ’n getroude man nie. Dit het haar diep seergemaak toe sy dit sien gebeur, en sy het hom taktvol probeer waarsku dat hy ’n gevaarlike weg inslaan. Hy het nietemin egbreuk gepleeg. Ten spyte van vriendelike waarskuwings wou die skuldige maat nie gehoor gee nie. Hy het reguit in die strik ingeloop.—Spreuke 6:27-29.
8. Wat kan tot egbreuk aanleiding gee?
8 Hoe duidelik is die Bybel se waarskuwing teen egbreuk tog! “Iemand wat met ’n vrou egbreuk pleeg, het nie ’n verstandige hart nie; hy wat dit doen, stort sy eie siel in die verderf” (Spreuke 6:32). Gewoonlik is egbreuk nie ’n spontane, impulsiewe daad nie. Soos die Bybelskrywer Jakobus getoon het, vind ’n sonde soos egbreuk gewoonlik eers plaas nadat die gedagte ontstaan het en gekoester is (Jakobus 1:14, 15). Die skuldige maat raak geleidelik minder lojaal teenoor die maat aan wie hy of sy beloof het om lewenslank getrou te bly. Jesus het gesê: “Julle het gehoor dat daar gesê is: ‘Jy mag nie egbreuk pleeg nie.’ Maar ek sê vir julle dat elkeen wat aanhou om na ’n vrou te kyk om hartstog vir haar te hê, reeds in sy hart met haar egbreuk gepleeg het.”—Matteus 5:27, 28.
9. Watter verstandige raad word in Spreuke 5:18-20 gevind?
9 Die verstandige en lojale weg is dus die een wat in die boek Spreuke aangemoedig word: “Laat jou waterbron geseënd wees, en verheug jou met die vrou van jou jeug, ’n lieflike takbokooitjie en ’n bekoorlike bergbokkie. Laat haar borste jou te alle tye bedwelm. Mag jy voortdurend met haar liefde in ekstase wees. Waarom sou jy dan, my seun, met ’n vreemde vrou in ekstase wees of die boesem van ’n uitlandse vrou omhels?”—Spreuke 5:18-20.
Moenie oorhaastig trou nie
10. Waarom is dit verstandig om tyd te neem om ’n voornemende maat te leer ken?
10 Probleme in die huwelik kan ontstaan as ’n paartjie hulle te vroeg in daardie verhouding begewe. Hulle is miskien te jonk en onervare. Of dalk het hulle nie die tyd geneem om mekaar te leer ken nie—die dinge waarvan hulle hou en nie hou nie, hulle doelwitte in die lewe, hulle familieagtergrond. Dit is verstandig om geduldig te wees en tyd te neem om die voornemende maat te leer ken. Dink aan Jakob, die seun van Isak. Hy moes sewe jaar lank vir sy toekomstige skoonvader werk voordat hy met Ragel kon trou. Hy was gewillig om dit te doen omdat sy gevoelens op ware liefde gegrond was, nie bloot op fisiese aantrekking nie.—Genesis 29:20-30.
11. (a) Wat word deur die huwelik saamgevoeg? (b) Waarom is dit belangrik om spraak verstandig te gebruik in die huwelik?
11 Die huwelik is nie net ’n romantiese verhouding nie. Die huweliksband bind twee mense saam wat verskillende familieagtergronde, persoonlikhede en emosionele samestellings het en wat dikwels uiteenlopende opvoedkundige agtergronde het. Soms is dit ’n samevoeging van twee kulture, selfs van twee tale. Op sy minste bring dit twee stemme bymekaar wat die vermoë het om verskillende menings oor allerhande sake uit te spreek. Hierdie twee stemme vorm ’n wesenlike deel van ’n huwelik. Hulle kan gedurig krities en vol klagtes wees, of hulle kan op hartlike wyse aanmoedig en opbou. Ja, ons woorde kan ons maat óf seermaak óf goed laat voel. Onbeheerste spraak kan geweldige druk op ’n huwelik plaas.—Spreuke 12:18; 15:1, 2; 16:24; 21:9; 31:26.
12, 13. Watter realistiese beskouing van die huwelik word aanbeveel?
12 Dit is derhalwe verstandig om die tyd te neem om ’n voornemende huweliksmaat goed te leer ken. ’n Ervare Christensuster het eenkeer gesê: “Wanneer jy na ’n voornemende huweliksmaat kyk, dink aan sowat tien basiese dinge wat jy graag in die persoon wil sien. As jy net sewe kan vind, moet jy jou afvra: ‘Is ek gewillig om die drie wat hy of sy kortkom, oor te sien? Sal ek elke dag met daardie tekortkominge kan saamleef?’ As jy twyfel, moet jy eers wag en weer dink.” Jy moet natuurlik realisties wees. As jy graag wil trou, moet jy besef dat jy nooit ’n volmaakte maat sal vind nie. Maar aan die ander kant sal die persoon met wie jy uiteindelik trou, ook nie ’n volmaakte maat gevind het nie!—Lukas 6:41.
13 Die huwelik behels opofferings. Paulus het dit beklemtoon toe hy gesê het: “Ek wil hê dat julle sonder sorge moet wees. Die ongetroude man is besorg oor die dinge van die Here, hoe hy die Here se goedkeuring kan verkry. Maar die getroude man is besorg oor die dinge van die wêreld, hoe hy sy vrou se goedkeuring kan verkry, en hy is verdeeld. Verder is die ongetroude vrou, en die maagd, besorg oor die dinge van die Here, sodat sy in haar liggaam sowel as in haar gees heilig kan wees. Die getroude vrou is egter besorg oor die dinge van die wêreld, hoe sy haar man se goedkeuring kan verkry.”—1 Korintiërs 7:32-34.
Waarom party huwelike op die rotse beland
14, 15. Wat kan veroorsaak dat die huweliksband verswak?
14 ’n Christenvrou het onlangs die trauma van ’n egskeiding deurgemaak toe haar man haar ná 12 jaar van getroude lewe verlaat het en ’n verhouding met ’n ander vrou begin het. Het sy voor die tyd enige waarskuwingstekens gesien? Sy verduidelik: “Hy het die punt bereik waar hy nie meer gebid het nie. Hy het swak verskonings gebruik om van Christelike vergaderinge af weg te bly en nie aan die predikingswerk deel te neem nie. Hy was glo te besig of te moeg om tyd saam met my deur te bring. Hy wou nie met my gesels nie. Ons het wat geestelike sake betref, van mekaar vervreemd geraak. Dit was so tragies. Hy was nie meer die man met wie ek getrou het nie.”
15 Ander meld soortgelyke tekens, waaronder ’n versuim om persoonlike Bybelstudie te doen, te bid of Christelike vergaderinge by te woon. Met ander woorde, baie individue wat hulle huweliksmaat uiteindelik verlaat het, het toegelaat dat hulle verhouding met Jehovah verswak. Gevolglik het hulle geestelike visie verdof. Jehovah was nie meer vir hulle ’n lewende God nie. Die beloofde nuwe wêreld van regverdigheid was nie meer ’n werklikheid nie. In sommige gevalle het hierdie toestand van geestelike swakheid ingetree nog voordat die ontroue maat ’n verhouding buite die huwelik aangeknoop het.—Hebreërs 10:38, 39; 11:6; 2 Petrus 3:13, 14.
16. Wat versterk ’n huwelik?
16 In teenstelling hiermee skryf ’n baie gelukkige egpaar die sukses van hulle huwelik toe aan die sterk geestelike band tussen hulle. Hulle bid saam en studeer saam. Die man sê: “Ons lees die Bybel saam. Ons gaan saam uit in die bediening. Ons geniet dit om dinge saam te doen.” Die les is duidelik: As ’n mens ’n goeie verhouding met Jehovah handhaaf, sal dit grootliks bydra tot ’n sterk huweliksband.
Wees realisties en kommunikeer
17. (a) Watter twee dinge dra by tot ’n suksesvolle huwelik? (b) Hoe beskryf Paulus Christelike liefde?
17 Daar is twee ander dinge wat tot ’n suksesvolle huwelik bydra: Christelike liefde en kommunikasie. Wanneer twee mense op mekaar verlief is, is hulle geneig om mekaar se foute te ignoreer. Die paartjie begin die huwelik dalk met baie hoë verwagtinge, wat miskien gegrond is op wat hulle in liefdesverhale gelees of in rolprente gesien het. Maar uiteindelik moet die paartjie die werklikheid onder die oë sien. Dan kan onbeduidende foute of gewoontes wat effens irriterend is, groot probleme word. As dit gebeur, moet Christene die vrugte van die gees openbaar, waarvan een liefde is (Galasiërs 5:22, 23). Liefde is inderdaad baie kragtig—nie romantiese liefde nie, maar Christelike liefde. Paulus het hierdie Christelike liefde so beskryf: “Die liefde is lankmoedig en goedhartig. . . . [Dit] soek nie sy eie belang nie, raak nie ergerlik nie. Dit hou nie boek van die kwaad nie. . . . Dit verdra alles, glo alles, hoop alles, verduur alles” (1 Korintiërs 13:4-7). Dit is duidelik dat ware liefde menslike swakhede in aanmerking neem. Dit is realisties en verwag nie volmaaktheid nie.—Spreuke 10:12.
18. Hoe kan kommunikasie ’n verhouding versterk?
18 Kommunikasie is ook noodsaaklik. Ongeag hoeveel jare verbygegaan het, huweliksmaats moet met mekaar praat en werklik na mekaar luister. Een man sê: “Ons praat openlik, maar op ’n vriendelike manier, oor ons gevoelens.” Namate hulle ondervinding opdoen, leer ’n man of ’n vrou om nie net te let op wat gesê word nie, maar ook op wat nie gesê word nie. Met ander woorde, met die verloop van die jare leer ’n egpaar wat gelukkig getroud is, om onuitgesproke gedagtes of gevoelens te onderskei. Party vrouens het al gesê dat hulle mans nie werklik na hulle luister nie. Party mans het al gekla dat hulle vrouens op die mees ongeleë tye wil kommunikeer. Kommunikasie behels deernis en begrip. Doeltreffende kommunikasie is voordelig vir die man sowel as die vrou.—Jakobus 1:19.
19. (a) Waarom kan dit moeilik wees om verskoning te vra? (b) Wat sal ons beweeg om verskoning te vra?
19 Kommunikasie sluit soms in dat ’n mens verskoning moet vra. Dit is nie altyd maklik nie. Dit verg nederigheid om ’n mens se foute te erken. Maar wat ’n verskil maak dit tog in ’n huwelik! As ’n mens opreg verskoning vra, kan dit iets wat in die toekoms onenigheid kan veroorsaak, uit die weg ruim en die weg baan vir ware vergifnis en ’n oplossing vir die probleem. Paulus het gesê: “Hou aan om mekaar te verdra en mekaar vryelik te vergewe as iemand rede tot klagte teen ’n ander het. Net soos Jehovah julle vryelik vergewe het, so moet julle ook doen. Maar beklee julle, benewens al hierdie dinge, met liefde, want dit is ’n volmaakte band van eenheid.”—Kolossense 3:13, 14.
20. Hoe moet ’n Christen sy huweliksmaat behandel wanneer hulle alleen is en wanneer hulle in die teenwoordigheid van ander is?
20 Wedersydse ondersteuning is ook noodsaaklik in ’n huwelik. ’n Christenman en -vrou moet mekaar kan vertrou, op mekaar kan staatmaak. Die een moenie teen die ander werk of op ander maniere sy of haar maat se selfvertroue ondermyn nie. Ons prys ons huweliksmaats liefdevol; ons kritiseer hulle nie op ongevoelige wyse nie (Spreuke 31:28b). Ons verneder hulle beslis nie deur hulle die voorwerp van ligsinnige en onbedagsame grappe te maak nie (Kolossense 4:6). Hierdie wedersydse ondersteuning word versterk deur gereelde blyke van toegeneentheid. ’n Aanraking of ’n sagte minsame woord kan sê: “Ek is nog lief vir jou. Ek is bly dat jy by my is.” Dit is ’n paar faktore wat ’n invloed op ’n verhouding kan hê en kan help dat ’n huwelik in vandag se wêreld slaag. Daar is ook ander faktore, en die volgende artikel sal verdere skriftuurlike raad voorsien oor hoe om ’n sukses van die huwelik te maak.a
[Voetnoot]
a Vir breedvoeriger inligting, sien die publikasie Die geheim van gesinsgeluk, uitgegee deur Jehovah se Getuies.
Kan jy verduidelik?
• Watter faktore kan ’n huwelik ondermyn?
• Waarom is dit onverstandig om oorhaastig te trou?
• Watter rol speel geestelikheid in ’n huwelik?
• Watter faktore dra by tot die bestendigheid van ’n huwelik?
[Prent op bladsy 12]
Die huwelik is nie net ’n romantiese verhouding nie
[Prente op bladsy 14]
’n Sterk verhouding met Jehovah help ’n egpaar om ’n sukses van die huwelik te maak