“Getrou onder beproewinge”

VROEG in April 1951 het die magtige Sowjetunie skielik ’n aanval geloods teen ’n onskuldige groep Christene in die weste van die Sowjetunie—Jehovah se Getuies. Duisende gesinne—insluitende kindertjies, swanger vrouens en bejaardes—is in goederewaens gelaai vir ’n uitmergelende, 20 dae lange treinreis na Siberië. Hulle is gevonnis tot permanente ballingskap in haglike, primitiewe toestande.

In April 2001, 50 jaar ná hierdie geskiedkundige gebeurtenis, is ’n video in Moskou vrygestel wat handel oor die dekades van verdrukking wat Jehovah se Getuies in die voormalige Sowjetunie verduur het. In die dokumentêre film vertel geskiedkundiges en ooggetuies hoe die Getuies ten spyte van uiterste druk oorleef en selfs gefloreer het.

Miljoene in Rusland en elders het nou al hierdie dokumentêre film, Faithful Under Trials—Jehovah’s Witnesses in the Soviet Union, gesien, en die algemene publiek en geskiedkundiges het dit groot lof toegeswaai. Hier volg twee kommentare deur Russiese geleerdes wat in die gebied woon waarheen die meeste Getuiegesinne verban is:

“Ek het hierdie film baie geniet. Ek het nog altyd van die verteenwoordigers van julle godsdiens gehou, maar nadat ek na die film gekyk het, dink ek selfs meer van julle. Die film was baie professioneel! Ek het veral gehou van die manier waarop julle elke persoon as ’n individu uitgebeeld het. Hoewel ek aan die Ortodokse Kerk behoort en nie van plan is om van godsdiens te verander nie, hou ek baie van die Getuies. Ek wil hê ons fakulteit moet ’n eksemplaar van hierdie film aanhou. Ek en my kollegas het besluit om dit vir ons studente te wys en om dit in die leerplan in te sluit.”—Professor Sergei Nikolajewitsj Roebtsof, dekaan van die fakulteit van geskiedenis van die Staats- Opvoedkundige Universiteit, Irkoetsk, Rusland.

“Ek verwelkom hierdie film. Wanneer ’n mens ’n film oor onderdrukking maak, is dit baie moeilik om die verhaal logies te ontwikkel. Maar julle het daarin geslaag om dit te doen. Bring gerus vir my nog van julle films.”—Professor Sergei Iljitsj Koeznetsof, dekaan van die fakulteit van geskiedenis van die Irkoetsk-Staatsuniversiteit, Rusland.

Jehovah se Getuies wat in Siberië woon, het ook die dokumentêre film grootliks waardeer. Hier is ’n paar van hulle reaksies:

“Gedurende die tyd toe die gebeure plaasgevind het wat in hierdie film uitgebeeld word, is baie mense in Rusland verkeerde inligting oor die bedrywighede van Jehovah se Getuies gegee. Maar noudat hulle na die film gekyk het, kan hulle sien dat ons organisasie nie sommer net ’n sekte is soos hulle voorheen gedink het nie. Ander wat onlangs Getuies geword het, sê: ‘Ons sou nooit kon gedink het dat ons Christenbroers in ons midde het wat soveel verduur het nie!’ Nadat hy na die film gekyk het, het een Getuie sy begeerte uitgespreek om ’n voltydse bedienaar te word.”—Anna Wowtjoek, wat na Siberië verban is.

“Gedurende die toneel in die film waar die geheime polisie aan die deur van ’n Getuiehuis klop, het ek gesidder. Dit was soos die klop aan ons deur, en ek onthou dat my ma gesê het: ‘Miskien is daar êrens ’n brand.’ Maar die film herinner my ook daaraan dat baie Getuies meer as ek gely het. Al hierdie inligting gee ons groter krag en geesdrif om voort te gaan om Jehovah te dien.”—Stepan Wowtjoek, wat na Siberië verban is.

“Ek is die seun van Getuies wat verban is. Ek het dus gedink dat ek al baie van daardie tye gehoor het. Maar nadat ek na hierdie film gekyk het, het ek besef dat ek feitlik niks weet nie. Terwyl ek na die onderhoude geluister het, het my oë vol trane geskiet. Nou is die ondervindinge vir my nie net stories nie, maar werklik. Die film het my verhouding met God versterk en het gehelp om my voor te berei om alle toekomstige moeilikhede te verduur.”—Wladimir Kowasj, Irkoetsk.

“Vir my was hierdie film baie kragtiger as ’n geskrewe verslag. Toe ek na die onderhoude met die broers gekyk en geluister het, het dit vir my gevoel asof ek al hulle ondervindinge saam met hulle deurgemaak het. Die voorbeeld van die broer wat vir sy dogtertjies poskaarte geteken het terwyl hy in die tronk was, spoor my aan om mý kinders se harte met die Bybel se waarhede te probeer bereik. Dankie! Hierdie film het Jehovah se Getuies in Rusland meer as ooit tevore laat voel dat hulle deel van Jehovah se wêreldwye organisasie is.”—Tatjana Kalina, Irkoetsk.

“Die gesegde: ‘Om iets een keer te sien, is beter as om dit honderd keer te hoor’, is beslis op hierdie film van toepassing. Dit is so kragtig, so werklik, so na aan ons! Nadat ek daarna gekyk het, het ek baie tyd nodig gehad om te dink. Hierdie film het my in staat gestel om my in te leef in die lewens van daardie Getuies wat verban is. Wanneer ek nou my omstandighede met hulle s’n vergelyk, help dit my om ons hedendaagse probleme in ’n ander lig te sien.”—Lidia Beda, Irkoetsk.

Faithful Under Trials is al in 25 tale vrygestel en word regoor die wêreld baie goed ontvang.a Die hele dokumentêre film is deur televisiestasies in St. Petersburg, Omsk en ander stede in Rusland uitgesaai, sowel as in die Oekraïense stede Winnitsa, Kertsj, Melitopol en in die gebied van Lviv. Dit het ook toekennings van internasionale filmbeoordelingsrade ontvang.

Die krag van die boodskap van hierdie dokumentêre film lê in die voorbeelde van duisende gewone mense wat buitengewone moed en geestelike krag deur lang jare van vervolging aan die dag gelê het. Jehovah se Getuies in die Sowjetunie het hulle beslis getrou bewys onder beproewinge. As jy na hierdie dokumentêre film wil kyk, sal Jehovah se Getuies dit met graagte aan jou voorsien. Kom gerus met een van hulle in jou omgewing in aanraking.

[Voetnoot]

[Foto-erkenning op bladsy 8]

Stalin: U.S. Army photo

[Foto-erkenning op bladsy 9]

Stalin: U.S. Army photo