Die nuwe studie-uitgawe van Die Wagtoring
DIE tydskrif wat jy nou lees, is die eerste nommer van die studie-uitgawe van Die Wagtoring. Ons wil graag sommige van die kenmerke van die nuwe formaat van hierdie tydskrif beskryf.
Die studie-uitgawe word vir Jehovah se Getuies en progressiewe Bybelstudente gepubliseer. Dit sal een keer per maand verskyn en sal vier of vyf studieartikels bevat. Die rooster vir die bespreking van hierdie studieartikels word op die voorblad van die tydskrif gedruk. In teenstelling met die uitgawe vir die publiek sal elke nommer van die studie-uitgawe van Die Wagtoring nie ’n ander prent op die voorblad hê nie, aangesien dit nie in die veldbediening aangebied sal word nie.
Op bladsy 2 van die tydskrif sal jy ’n baie nuttige, kort opsomming van die doel van elke studieartikel of -reeks sowel as ’n lys van die sekondêre artikels vind. Wagtoring-studiehouers sal hierdie kenmerk baie nuttig vind wanneer hulle voorberei vir ’n betekenisvolle bespreking van die artikels by die gemeentelike vergadering.
Jy sal opmerk dat die studieartikels effens korter as voorheen is. Gevolglik sal daar meer tyd wees om sleuteltekste tydens die Wagtoring-studie te bespreek. Ons spoor jou hartlik aan om elke week al die teksverwysings na te slaan. By party teksverwysings staan daar “lees”, wat aandui dat dit tydens die Wagtoring-studie gelees en bespreek moet word. Ander tekste kan ook na gelang van die tyd gelees word. In party artikels sal jy tekste vind wat “vergelyk” moet word. Aangesien hierdie tekste nie die hoofpunte in die paragraaf direk staaf nie, sal dit gewoonlik nie by die gemeentelike vergadering gelees word nie. Nogtans bevat tekste wat “vergelyk” moet word, interessante aanvullende inligting, of dalk voorsien dit indirekte bevestiging vir die punte onder bespreking. Ons spoor jou aan om dit na te slaan terwyl jy vir die Wagtoring-studie voorberei. Dalk sal jy in jou kommentare daarna kan verwys.
Die jaarverslag sal nie meer in Die Wagtoring verskyn nie. Vanaf 2008 sal dit as ’n byvoegsel tot Ons Koninkryksbediening sowel as in die Jaarboek verskyn. Maar soos hierbo aangedui is, bevat die studie-uitgawe wel sekondêre artikels. Hoewel baie hiervan nie by ’n gemeentelike vergadering bespreek sal word nie, word jy aangemoedig om dit noukeurig te lees. Dit bevat ook geestelike voedsel van “die getroue en verstandige slaaf”.—Matt. 24:45-47.
Laastens, die studie-uitgawe van Die Wagtoring en die uitgawe vir die publiek is nie twee verskillende tydskrifte nie. Dit is albei Die Wagtoring—Kondig Jehovah se Koninkryk aan. Albei het op bladsy 2 ’n identiese paragraaf wat die doel van Die Wagtoring verduidelik. Albei sal in die jaarlikse bundel ingesluit word. En materiaal uit albei sal gevind word in die artikel “Onthou jy?”, wat in die studie-uitgawe sal verskyn.
Sedert 1879 het Die Wagtoring gedurende tye van oorlog, ekonomiese teëspoed en vervolging waarhede oor God se Koninkryk getrou verkondig. Ons bid dat dit met Jehovah se seën sal voortgaan om dieselfde in die nuwe formaat te doen. En ons bid dat Jehovah jou, die leser, sal seën terwyl jy goed gebruik maak van die nuwe studie-uitgawe van Die Wagtoring.