Waar het ons vandaan gekom?
WAAROM IS DIE ANTWOORD VAN BELANG? Baie mense word geleer dat lewe op aarde per toeval ontstaan het. Daar word vir hulle gesê dat evolusie die mensdom, met al sy emosionele, intellektuele en geestelike vermoëns, deur ’n reeks onwaarskynlike, willekeurige gebeure voortgebring het.
Maar dink net: As ons werklik die produk van evolusie is en daar geen Skepper is nie, is die mensdom as ’t ware ’n weeskind. Die mensdom sou geen bron van hoër wysheid hê om te raadpleeg nie—niemand om ons te help om ons probleme op te los nie. Ons sou op mensewysheid moes staatmaak om omgewingsrampe te voorkom, om politieke konflikte op te los en om ons deur ons persoonlike krisisse te lei.
Gee hierdie vooruitsigte jou gemoedsrus? Indien nie, oorweeg dan die alternatief. Dit is nie net ’n aantrekliker vooruitsig nie, maar dit maak ook meer sin.
Wat die Bybel sê
Die Bybel leer dat die mensdom regstreeks deur God geskep is. Ons is nie die produk van emosielose, blinde evolusie nie. Ons is eerder die kinders van ’n liefdevolle, intelligente Vader. Let op hierdie duidelike verklarings in die Bybel.
Genesis 1:27. “God het die mens na sy beeld begin skep, na God se beeld het hy hom geskep; man en vrou het hy hulle geskep.”
Psalm 139:14. “Ek sal u prys, omdat ek op ’n vreesinboesemende wyse wonderbaar gemaak is. U werke is wonderbaar, soos my siel alte goed weet.”
Matteus 19:4-6. “Het julle nie gelees dat hy wat hulle geskep het, hulle van die begin af man en vrou gemaak het nie en gesê het: ‘Daarom sal ’n man sy vader en sy moeder verlaat en sy vrou aankleef, en die twee sal een vlees wees’? Sodat hulle nie meer twee is nie, maar een vlees. Wat God dan onder een juk saamgevoeg het, moet geen mens skei nie.”
Handelinge 17:24, 25. “Die God wat die wêreld en alles daarin gemaak het, die Een wat Here van hemel en aarde is, woon nie in handgemaakte tempels nie, en ook word hy nie deur mensehande bedien asof hy enigiets nodig het nie, omdat hy self aan almal lewe en asem en alles gee.”
Openbaring 4:11. “U is waardig, Jehovah, ja, ons God, om die heerlikheid en die eer en die krag te ontvang, want u het alles geskep, en weens u wil het hulle bestaan en is hulle geskep.”
Hoe die Bybel se antwoord ware gemoedsrus gee
Die wete dat “elke familie . . . op die aarde sy naam te danke het” aan God, verander die manier waarop ons ander mense beskou (Efesiërs 3:15). Hierdie kennis het ook ’n uitwerking op hoe ons onsself en ons probleme beskou. Ons denke sal op die volgende maniere beïnvloed word.
Wanneer ons voor moeilike besluite te staan kom, sal ons nie te veel waarde heg aan die mens se teenstrydige menings nie. Ons sal eerder met vertroue op die Bybel se raad staatmaak. Waarom? Want “die hele Skrif is deur God geïnspireer en is nuttig om te onderrig, om tereg te wys, om dinge reg te stel, om in regverdigheid te dissiplineer, sodat die mens van God volkome bevoeg kan wees, ten volle toegerus vir elke goeie werk”.—2 Timoteus 3:16, 17.
Om die Bybel se raad toe te pas, verg weliswaar inspanning en selfdissipline. Soms vereis die leiding wat dit gee, selfs dat ons op maniere optree wat moontlik in stryd is met wat ons geneig is om te doen (Genesis 8:21). Maar as ons aanvaar dat ons deur ’n liefdevolle hemelse Vader geskep is, is dit net logies om tot die slotsom te kom dat hy weet watter weg vir ons die beste is om te volg (Jesaja 55:9). Sy Woord verseker ons dus: “Vertrou op Jehovah met jou hele hart en moenie op jou eie begrip steun nie. Slaan ag op hom in al jou weë, en hy sal jou paaie reguit maak” (Spreuke 3:5, 6). As ons hierdie raad toepas, sal baie van die angstigheid verdwyn wat ons ervaar wanneer ons voor uitdagings en besluite te staan kom.
Wanneer ons met vooroordeel te kampe het, sal ons nie met minderwaardigheidsgevoelens belas word en dink dat ons in die een of ander opsig minder waarde het as mense van ’n ander ras of kulturele agtergrond nie. Ons sal eerder gesonde selfrespek ontwikkel. Waarom? Omdat ons Vader, Jehovah God, “nie partydig is nie, maar in elke nasie is die mens wat hom vrees en regverdigheid beoefen, vir hom aanneemlik”.—Handelinge 10:34, 35.
Hierdie kennis sal ook voorkom dat ons weens vooroordeel ’n verkeerde gesindheid teenoor ander het. Ons sal besef dat daar geen geldige rede is om te voel dat ons beter as mense van ’n ander ras is nie, aangesien God “uit een mens elke nasie van die mense gemaak [het] om op die hele oppervlak van die aarde te woon”.—Handelinge 17:26.
Die wete dat ons geskep is en dat ons Skepper vir ons omgee, lê inderdaad die grondslag om ware gemoedsrus te verkry. Maar meer is nodig om innerlike vrede te behou.
[Lokteks op bladsy 4]
Het die menseras geëvolueer?
[Prent op bladsy 5]
Die wete dat ons Skepper vir ons omgee, kan ware gemoedsrus meebring