Ons lesers vra . . . 

Sal die aarde altyd genoeg oplewer om lewe te onderhou?

▪ Ons pragtige planeet, die aarde, het ’n ontsaglike vermoë om lewe te onderhou. Maar met die groeiende bevolking en die onrusbarende tempo waarteen die aarde se oorvloedige hulpbronne opgebruik word, wonder jy dalk: ‘Kan die ondenkbare werklik gebeur? Sal daar altyd genoeg voedsel en hulpbronne wees?’

Terwyl ons oor hierdie vraag nadink, is ’n belofte wat God meer as 4 000 jaar gelede aan die mensegesin gemaak het, gerusstellend: “Al die dae dat die aarde bly staan, sal saaityd en oestyd, en koue en hitte, en somer en winter, en dag en nag nooit ophou nie” (Genesis 8:22). Net soos ons verseker weet dat die son elke dag sal skyn, kan ons vol vertroue wees dat die aarde nooit sal ophou om op te lewer wat nodig is om lewe te onderhou nie.

In ’n 2004-verslag met die titel “Kan die planeet ons voed?” het Alex Kirby, ’n korrespondent oor omgewingsake, gesê: “Die wêreld lewer genoeg op om almal te voed. Maar die voedsel is dikwels op die verkeerde plek, of onbekostigbaar, of dit kan nie lank genoeg geberg word nie. Om seker te maak dat almal genoeg het om te eet, het dus meer te doen met die politiek as met wetenskap.” As daar behoorlike toesig oor die aarde uitgeoefen word en sy hulpbronne doeltreffend bestuur word, behoort daar geen rede te wees om te vrees dat daar ’n tekort sal wees nie. In die dae van eertydse Israel het God byvoorbeeld duidelike riglyne gegee in verband met die gepaste gebruik van die grond. Soos in Levitikus 25:4 opgeteken is, het God vir die Israeliete gesê: “In die sewende jaar moet daar ’n sabbat van volkome rus vir die land wees . . . Jou land mag jy nie besaai nie.” Hoewel hulle elke sewende jaar die land nie moes bewerk nie, het God belowe dat hy sou toesien dat die volk hulle verheug oor ’n oorvloed goeie dinge en hulle nie hoef te bekommer oor ’n potensiële tekort nie.—Levitikus 26:3-5.

Al word opregte pogings vandag soms aangewend om die skade aan die aarde en sy hulpbronne te herstel, is baie mense besorg dat sulke pogings eintlik maar tevergeefs is. Die enigste blywende oplossing vind ons in Openbaring 11:18. Daar sê die Bybel dat Jehovah “die verderwers van die aarde [sal] verderf”. Jehovah sal nie net ’n einde maak aan die wanbestuur van die aarde en sy hulpbronne nie, maar hy sal ook verseker dat die aarde genoeg sal oplewer vir al sy bewoners. Enigiemand wat God se voorneme hardkoppig minag en die aarde vir eie gewin misbruik, sal vernietig word. Daarenteen sal diegene wat Jehovah se heerskappy gewilliglik ondersteun, die waarheid van die woorde in Psalm 72:16 ondervind: “Daar sal volop graan op die aarde wees; op die top van die berge sal daar ’n oorvloed wees.”

In sy oneindige liefde en wysheid het Jehovah hom voorgeneem dat die mensdom in ’n paradystuiste op aarde sal woon en daarna sal omsien (Genesis 1:28). Onder sy heerskappy sal gehoorsame mense leer om natuurlike hulpbronne wyslik te gebruik, sonder om die aarde se oorvloedige voorraadskuur leeg te maak. Hoe dankbaar is ons tog vir so ’n liefdevolle Voorsiener, wat die begeerte van alles wat lewe, sal bevredig!—Psalm 145:16.

[Lokteks op bladsy 22]

‘Om seker te maak dat almal genoeg het om te eet, het meer te doen met die politiek as met wetenskap’