2 Tot wie?

GAAN alle gebede na dieselfde plek, ongeag tot wie dit gerig word? Daar word vandag dikwels aangeneem dat dit die geval is. Die idee vind byval by baie mense wat ten gunste is van intergodsdienstige bewegings en wat wil hê dat alle godsdienste aanneemlik moet wees, ten spyte van hulle verskille. Maar is hierdie idee dalk onwaar?

Die Bybel leer dat baie gebede in werklikheid tot die verkeerde god gerig word. Toe die Bybel geskryf is, was dit iets algemeens vir mense om hulle gebede tot gesnede beelde te rig. Maar God het herhaaldelik teen hierdie gebruik gewaarsku. Psalm 115:4-6 sê byvoorbeeld van afgode: “Ore het hulle, maar hulle kan nie hoor nie.” Die punt is duidelik. Waarom bid tot ’n god wat jou nooit sal hoor nie?

’n Treffende Bybelverslag verskaf meer inligting hieroor. Die ware profeet Elia het die profete van Baäl uitgedaag om tot hulle god te bid, waarna Elia tot syne sou bid. Elia het gesê dat die ware God sou antwoord en dat die valse god nie sou nie. Die Baälprofete het die uitdaging aanvaar en het lank en vurig gebid, selfs hard uitgeroep—maar tevergeefs! Die verslag sê: “Niemand het geantwoord nie, en daar is geen aandag geskenk nie” (1 Konings 18:29). Maar hoe het Elia gevaar?

Nadat Elia gebid het, het sy God hom onmiddellik verhoor en vuur uit die hemel gestuur wat Elia se offerande verteer het. Wat het die verskil gemaak? ’n Baie belangrike leidraad word gevind in Elia se gebed, soos opgeteken in 1 Konings 18:36, 37. Dit is ’n baie kort gebed—daar is net sowat 30 woorde in die oorspronklike Hebreeus. Maar in hierdie paar sinne het Elia God drie keer op sy persoonlike naam, Jehovah, aangespreek.

Baäl, wat “eienaar” of “heer” beteken, was die god van die Kanaäniete, en daar was baie plaaslike weergawes van hierdie god. Jehovah is egter ’n unieke naam, wat op net een Persoon in die ganse heelal slaan. Hierdie God het vir sy volk gesê: “Ek is Jehovah. Dit is my naam; en aan niemand anders sal ek my heerlikheid gee nie.”—Jesaja 42:8.

Het Elia se gebed en die gebede van daardie Baälprofete na dieselfde plek gegaan? Baälaanbidding het mense verlaag met rituele prostitusie en selfs menseoffers. Daarenteen het die aanbidding van Jehovah sy volk, Israel, verhef en hulle van sulke verlagende gebruike bevry. Dink hieraan: As jy ’n brief spesifiek aan ’n hoogs gerespekteerde vriend rig, sou jy dan verwag dat dit afgelewer sou word by iemand met ’n ander naam en wie se skandelike reputasie teenstrydig is met alles waarvoor jou vriend staan? Beslis nie!

As jy tot Jehovah bid, bid jy tot die Skepper, die Vader van die mensdom.a “U, o Jehovah, [is] ons Vader”, het die profeet Jesaja in gebed gesê (Jesaja 63:16). Hy is die Een van wie Jesus Christus gepraat het toe hy vir sy volgelinge gesê het: “Ek vaar op na my Vader en julle Vader en na my God en julle God” (Johannes 20:17). Jehovah is Jesus se Vader. Hy is die God tot wie Jesus gebid het en tot wie Jesus sy volgelinge leer bid het.—Matteus 6:9.

Sê die Bybel dat ons tot Jesus, tot Maria, tot die heiliges of tot engele moet bid? Nee—net tot Jehovah. Kyk na twee redes waarom. Eerstens, gebed is ’n vorm van aanbidding, en die Bybel sê dat aanbidding uitsluitlik tot Jehovah gerig moet word (Eksodus 20:5). Tweedens, die Bybel openbaar dat hy die titel “Hoorder van die gebed” dra (Psalm 65:2). Hoewel Jehovah vryelik delegeer, is dít ’n verantwoordelikheid wat hy nog nooit aan iemand anders toevertrou het nie. Hy is die God wat belowe om self na ons gebede te luister.

As jy dus wil hê dat God na jou gebede moet luister, moet jy hierdie skriftuurlike vermaning in gedagte hou: “Elkeen wat die naam van Jehovah aanroep, sal gered word” (Handelinge 2:21). Maar luister Jehovah onvoorwaardelik na alle gebede? Of is daar nog iets wat ons moet weet as ons wil hê dat Jehovah na ons gebede moet luister?